"దేవుళ్లు కూడా ఆశ్చర్యపోయేలా క్రాకర్స్ పేలుళ్లు"-సుప్రీం అభ్యంతరం..!

బాణాసంచా వాడకంపై పరిశీలన సందర్భంగా 'సమతుల్య వైఖరి'ని అవలంబిస్తామని, మతపరమైన మనోభావాలను దెబ్బతీయబోమని సుప్రీంకోర్టు (Supreme Court) స్పష్టం చేసింది. బాణాసంచా కాల్చడం వల్ల ఏర్పడుతున్న కాలుష్యంపై దాఖలైన పిటిషన్లపై విచారణ సందర్భంగా.. భారత ప్రధాన న్యాయమూర్తి జస్టిస్ సూర్యకాంత్ నేతృత్వంలోని ధర్మాసనం, ప్రజలకు విజ్ఞప్తి చేయడానికి, బాణాసంచా వాడకాన్ని నిర్దిష్ట గంటలకు పరిమితం చేసే విషయాన్ని పరిశీలించడానికి ఇంకా తగినంత సమయం ఉందని పేర్కొంది.

శీతాకాలంలో తీవ్రమైన వాయు కాలుష్యం ఏర్పడి, పండుగలు కూడా వచ్చే సమయంలో ఢిల్లీ రాజధాని ప్రాంతంలో బాణాసంచాపై ఆంక్షలకు సంబంధించిన దీర్ఘకాలంగా పెండింగ్‌లో ఉన్న కేసును సుప్రీంకోర్టు విచారిస్తోంది. ఈ సందర్భంగా తాము మతపరమైన మనోభావాలను దెబ్బతీయమని, కానీ సమతుల్య వైఖరి ఎలా ఉండగలదో చూస్తామని సీజేఐ సూర్యకాంత్ తెలిపారు. ఈ సమస్యపై ఆచరణాత్మక విధానం అవసరమని, ప్రజలలో అవగాహన, పౌర బాధ్యత యొక్క ప్రాముఖ్యతను గుర్తుచేశారు. పౌరులు, పౌర సమాజం ప్రస్తుత పరిస్థితిపై అవగాహన కలిగి ఉండి, తమ బాధ్యతలను అర్థం చేసుకుంటే అది సహాయకరంగా ఉంటుందని ప్రధాన న్యాయమూర్తి తెలిపారు.

విచారణ సందర్భంగా ఓ కీలక పరిణామం చోటు చేసుకుంది. బాణాసంచా కాల్చడం మత స్వేచ్ఛ అనే ప్రాథమిక హక్కులో భాగం కాదని విచారణలో ఓ న్యాయవాది వాదించారు. పూజ అనేది మత విశ్వాసానికి ఒక వ్యక్తీకరణ అయితే, బాణసంచా కాల్చడం మాత్రం కాదని న్యాయవాది అన్నారు. బాణాసంచా కాలుస్తున్న తీరు చూసి దేవుడు కూడా ఆశ్చర్యపోతాడన్నారు. దీనిపై ఆగ్రహం వ్యక్తం చేసిన సుప్రీంకోర్టు జడ్జి జస్టిస్ జోయ్ మాల్యా బాగ్చీ.. బాణసంచాను మతంతో ఎందుకు ముడిపెడుతున్నారని లాయర్ ను ప్రశ్నించారు. బాణసంచాకు మతంతో ఏం సంబంధమన్నారు. చివరికి దీపావళికి ముందు ఈ అంశంపై నిర్ణయం తీసుకోవాలని సుప్రీంకోర్టు నిర్ణయించింది. ఇప్పటికే సెప్టెంబర్ 30న ఇదే తరహాలో జరిగిన మరో విచారణలో, జస్టిస్‌లు ఎంఎం సుందరేష్, పీబీ వరాలేలతో కూడిన ధర్మాసనం షరతులతో బాణసంచాను అనుమతించాలనే సూచనను అంగీకరించడానికి మొగ్గు చూపుతున్నట్లు తెలిపింది.