భారీగా పెరిగిన సిలిండర్ ధర - వినియోగదారుకు షాక్..!!

సిలిండర్ ధర మరోసారి పెరిగింది. 19 కేజీల ఎల్​పీజీ సిలిండర్ ధరను రూ.102.5 మేర పెంచుతూ చమురు సంస్థలు నిర్ణయం తీసుకున్నాయి. దీంతో రూ.2253గా ఉన్న ఈ సిలిండర్ ధర రూ.2355.50కు పెరిగింది. ఐదు కేజీల ఎల్​పీజీ సిలిండర్ ధర రూ.655కు పెరిగింది. ప్రతి నెల ఒకటో తేదీన సిలిండర్ ధరలను చమురు సంస్థలు సవరిస్తాయి. దేశంలోని అన్ని రాష్ట్రాలు, కేంద్ర పాలిత ప్రాంతాల్లో నెలనెలా సిలిండర్ల రేట్లను సవరిస్తుంటాయి చమురు సంస్థలు. ఏప్రిల్​లోనూ వాణిజ్య ఎల్​పీజీ రేట్లను రూ.250 మేర పెంచాయి. అయితే, డొమెస్టిక్ వినియోగదారుల పైన ప్రభావం లేకుండా నిర్ణయం తీసుకున్నారు.

ఇంటి అవసరాలకు వినియోగించే వంట గ్యాస్ ధరలు మాత్రం యధాతధంగా ఉండనున్నాయి. ఇప్పటికే పెరిగిన పెట్రో ఉత్పత్తుల ధరలతో సామాన్యులకు భారంగా మారింది. తాజాగా.. ప్రధాని మోదీ సైతం తాము పెట్రో ఉత్పత్తుల పైన ఎక్సైజ్ పన్ను తగ్గించామని..రాష్ట్రాలు సైతం వ్యాట్ తగ్గింపు నిర్ణయం తీసుకోవాలని కోరుకుంటున్నట్లుగా ప్రధాని సూచించారు. దీని పైన రాజకీయంగా విమర్శలు వెల్లు వెత్తాయి. కేంద్రం వసూలు చేస్తున్న సెస్ మినహాయిస్తే పెట్రోల్ ధరలు తగ్గుముఖం పడతాయని ప్రతిపక్షాలు చెప్పుకొచ్చాయి.

ఇక, తెలుగు రాష్ట్రాల్లో వ్యాట్ తగ్గింపు పైన ప్రధాని సూచనలు చేసారు. దీని పైన తెలంగాణ సీఎం కేసీఆర్ ఓపెన్ గానే తన అభిప్రాయం తేల్చి చెప్పారు. తాము ధరలు పెంచలేదని..తగ్గించాలని తమను ఎలా కోరుతారని ప్రశ్నించారు. ఏపీ ప్రభుత్వం మాత్రం ప్రధాని సూచన పైన అధికారికంగా స్పందించ లేదు. ఇక, ఇప్పుడు వాణిజ్య సిలిండర్ ధర పెంచటం ద్వారా.. కమర్షియల్ వినియోగదారుల పైన భారం పడనుంది.

English summary

Commercial LPG cylinder rates were raised by Rs 102.50, a 19-kg cylinder will now cost Rs 2355.50 from May 1.