జగన్ 2019 నినాదం, పథకాలతో బరిలోకి విజయ్- అక్కడే బిగ్ ట్విస్ట్..!!

Published: Sunday, March 29, 2026, 16:32 [IST]

తమిళనాట ఎన్నికల రాజకీయం ఆసక్తి కరంగా మారింది. ఇప్పుడు అక్కడ టీవీకే విజయ్ సెంటర్ ఆఫ్ ఎట్రాక్షన్ గా మారారు. తన పార్టీ నుంచి పోటీ చేసే అభ్యర్ధుల జాబితా ప్రకటించారు. ఎన్నికల హామీలను కురిస్తున్నారు. రెండు ప్రధాన కూటములను టార్గెట్ చేస్తున్నారు. ఫ్యాన్ ఫాలోయింగ్ .. ఆ రెండు పార్టీల పైన వ్యతిరేకత తనకు కలిసి వస్తాయని అంచనా వేస్తున్నారు. కాగా, 2019 లో జగన్ ను అధికారంలోకి తెచ్చిన నినాదం.. పథకాలే అస్త్రాలుగా ఇప్పుడు విజయ్ ఎన్నికల బరిలోకి దిగుతున్నారు. ప్రచారంలో పదే పదే ప్రస్తావిస్తున్నారు.

తమిళనాట విజయ్ సాధించే సీట్లు... ఓట్ల పైన భిన్నాభిప్రాయాలు ఉన్నాయి. సర్వే సంస్థలు సైతం పలు నివేదికలను విడుదల చేసాయి. ఇదే సమయంలో ఏపీలో 2019లో ఎన్నికలు ముందు వైసీపీ అధినేత జగన్ ఒక్క ఛాన్స్ ఇవ్వాలన్న స్లోగన్ తో ప్రజల్లోకి వెళ్లారు. ఆ ఎన్నికల్లో ఆ స్లోగన్ బాగా పనిచేసింది. జగన్ కు జనం అవకాశం ఇచ్చారు. కాగా, ప్రస్తుతం తొలిసారిగా ఎన్నికల్లో తలపడుతున్న విజయ్ కూడా తనకు ఒక ఛాన్స్ ఇచ్చి చూడాలని కోరుతున్నారు.. తమిళనాడులో ఇప్పటికే అనేక సార్లు తమిళ పార్టీలకు అవకాశం ఇచ్చారు. ఈసారి నన్ను గెలిపించండి. ప్రతీ కుటుంబానికి మంచి చేసి చూపిస్తాను అని విజయ్ కోరుతున్నారు. అదే విధంగా జగన్ 2019 లో ఇచ్చిన హామీలనే ఇప్పుడు విజయ్ ఫాలో అవుతున్నారు. అందులో భాగంగా పరిశ్రమల్లో 75 శాతం స్థానికులకే ఉద్యోగాలు..ఉన్నత చదువుకు ఆర్దిక సాయం వంటివి ఉన్నాయి.

జగన్ తరహా సచివాలయ వ్యవస్థ పై హామీ

అదే విధంగా 2019 లో వైసీపీ అధికారంలోకి వచ్చిన తరువాత గ్రామ వాలంటీర్ల వ్యవస్థను తీసుకుని వచ్చారు. గ్రామాల్లో ప్రభుత్వం తరఫున అన్ని చేసేలా కార్యక్రమాలన్నీ వాలంటీర్ల ద్వారానే అందించారు.. ప్రస్తుతం విజయ్ కూడా వాలంటీర్ తరహా వ్యవస్థను తీసుకు వస్తామని, నియమించిన ఆ సిబ్బంది సీఎం తరపున ప్రజా సేవకులుగా పనిచేస్తారని చెప్పుకొచ్చారు. కూటమి ప్రభుత్వం 2024 లో అధికారంలోకి వచ్చిన తరువాత కూడా సచివాలయ వ్యవస్థను కొనసాగిస్తు న్నారు. విజయ్ ఈ ఎన్నికల్లో రెండు చోట్ల పోటీ చేయనున్నారు. చెన్నై లోని పెరంబూరు, తిరుచ్చి ఈస్ట్ నుంచి పోటీ చేయనున్నారు. అయితే.. ఇప్పుడు జగన్ తరహా ఎన్నికల హామీలతో విజయ్ ప్రజల్లోకి వెళ్లటంతో తమిళనాడు ప్రజలు ఏ విధంగా విజయ్ కు మద్దతుగా నిలుస్తారనేది ఇప్పుడు ఆసక్తి కరంగా మారుతోంది.

Published On March 29, 2026