ముగిసిన ట్రంప్ రెండు రోజుల భారత పర్యటన

న్యూఢిల్లీ: అమెరికా అధ్యక్షుడు డొనాల్డ్ ట్రంప్ రెండో రోజు పర్యటన రాష్ట్రపతి భవన్‌లో త్రివిధ దళాల నుంచి గౌరవవందనం స్వీకరించడంతో ప్రారంభమైంది. అనంతరం రాష్ట్రపతి దంపతులు ప్రధాని మోడీలు కలిసి ట్రంప్ దంపతులకు భారత బృందాన్ని పరిచయం చేశారు. ఆ తర్వాత ట్రంప్ అమెరికా బృందాన్ని కోవింద్ దంపతులకు ప్రధాని మోడీకి పరిచయం చేశారు. అక్కడి నుంచి రాజ్‌ఘాట్‌కు బయలు దేరి వెళ్లారు అమెరికా అధ్యక్షుడు ట్రంప్.

రాజ్‌ఘాట్‌కు చేరుకున్న ట్రంప్ దంపతులు అక్కడ మహాత్మాగాంధీకి నివాళులు అర్పించారు. అనంతరం అక్కడే ఒక మొక్కను కూడా నాటారు. గతంలో ఒబామా సందర్శించిన సమయంలో కూడా ఒక మొక్కను నాటారు. ఇక కాసేపు రాజ్‌ఘాట్ ప్రాంతంలో సయమం గడిపిన ట్రంప్ దంపతులు నేరుగా హైదరాబాద్ హౌజ్‌కు చేరుకున్నారు. అక్కడ ప్రధాని మోడీ వీరికి స్వాగతం పలికారు. ద్వైపాక్షిక చర్చల కోసం ట్రంప్ మోడీ సమావేశం కాగా.. అమెరికా ప్రథమ మహిళ మెలానియా ట్రంప్‌ సర్వోదయ కో ఎడ్ సీనియర్ సెకండరీ స్కూలు సందర్శనకు వెళ్లారు. అక్కడ ఆమె విద్యార్థులతో ముచ్చటించారు. హ్యాపీ కరుక్యులమ్ గురించి తెలుసుకున్నారు. అదే సమయంలో యోగా తరగతుల గురించి కూడా మెలానియా ట్రంప్ తెలుసుకున్నారు.

ద్వైపాక్షిక చర్చల్లో భాగంగా ట్రంప్ మోడీ పలు అంశాలపై సుదీర్ఘంగా చర్చించారు. రక్షణ రంగంలో 3 బిలియన్ డాలర్ల మేరా ఒప్పందాలు కుదుర్చుకున్నట్లు ఇరునేతలు సంయుక్త మీడియా సమావేశంలో చెప్పారు. ఆయిల్ రంగంలో అమెరికా భారత్‌లో పెట్టుబడులు పెట్టేందుకు సిద్ధంగా ఉందని ట్రంప్ చెప్పారు. ఉగ్రవాదంపై ఉమ్మడి పోరు చేస్తామని ప్రకటించారు. సీఏఏపై చర్చించలేదని చెప్పిన ట్రంప్ అది భారత అంతర్గత విషయం అని సరైన సమయంలో మోడీ సరైన నిర్ణయం తీసుకుంటారన్న ఆశాభావం ట్రంప్ వ్యక్తం చేశారు. అనంతరం సాయంత్రం ఐదుగంటలకు మీడియా సమావేశంలో మాట్లాడిన ట్రంప్ ఆ తర్వాత రాష్ట్రపతి ఏర్పాటు చేసిన విందుకు హాజరయ్యారు. ఆ కార్యక్రమం ముగిసిన తర్వాత ట్రంప్ కుటుంబం అమెరికాకు బయలుదేరి వెళ్లడంతో ట్రంప్ రెండ్రోజుల భారత పర్యటన ముగిసింది.

ట్రంప్ రెండురోజుల పర్యటన సందర్భంగా మినిట్ టూ మినిట్ అప్‌డేట్స్ మీకోసం

English summary

US President Donald Trump is all set to embark on a 36-hour-long visit to India and his schedule is jam-packed. Starting from addressing 'Namaste Trump' event in Ahmedabad to visiting Taj Mahal in Agra, President Trump has a lot on his plate during his stay in India.