కన్నతండ్రికి మత్తుమందు ఇచ్చి.. ప్రియుడితో చంపించిన కూతురు!

గుజరాత్‌లోని వడోదరలో అత్యంత కిరాతకమైన, విస్తుపోయే ఘటన వెలుగులోకి వచ్చింది. ప్రేమ పేరుతో కళ్లు మూసుకుపోయిన ఓ మైనర్ బాలిక.. తన తండ్రినే హతమార్చడానికి స్కెచ్ వేసింది. ప్రేమకు అడ్డుపడుతున్నాడనే కోపంతో ఓ 17 ఏళ్ల బాలిక తన కన్నతండ్రిని దారుణంగా అంతమొందించింది. నిద్రమాత్రలు ఇచ్చి తండ్రిని స్పృహ తప్పేలా చేసి.. ప్రియుడు ఆయనను కత్తులతో పొడుస్తుంటే కిటికీలోంచి చూస్తూ ఆనందించిన ఈ ఘటన వడోదరలో కలకలం రేపింది.

హత్యకు కారణం ఇదే..!
మృతుడు షానా చావడా తన కూతురు, రంజిత్ గజేంద్రభాయ్ వాఘేలా(24) మధ్య ఉన్న వివాహేతర సంబంధాన్ని తీవ్రంగా వ్యతిరేకించాడు. జులై నెలలో వీరిద్దరూ పారిపోగా.. తండ్రి ఫిర్యాదు మేరకు పోలీసులు రంజిత్‌పై పోక్సో చట్టం కింద కేసు నమోదు చేసి జైలుకు పంపారు. ఆగస్టులో బెయిల్‌పై బయటకు వచ్చిన రంజిత్.. తన ప్రేమికురాలితో కలిసి తమకు అడ్డుగా ఉన్న తండ్రిని తొలగించుకోవాలని పథకం వేశాడు.

పథకం ప్రకారం పక్కాగా..
తండ్రి తన భార్యను, కూతురిని రాత్రి పూట ఒకే గదిలో ఉంచి, బయట నుంచి తాళం వేసి కీని తన వద్దే ఉంచుకునేవాడు. దీంతో అతడిని అడ్డు తొలగించుకోవడానికి కూతురు మూడు నెలల పాటు ప్లాన్ చేసింది. డిసెంబర్ 18 రాత్రి కూతురు తన తల్లిదండ్రుల ఆహారంలో నిద్రమాత్రలు కలిపింది. అవి తిన్న తండ్రి గాఢ నిద్రలోకి జారుకున్నాడు. అర్ధరాత్రి సమయంలో రంజిత్, అతని స్నేహితుడు భవ్య మహేష్‌భాయ్ వాసవ(23) ఇంట్లోకి ప్రవేశించారు. నిద్రిస్తున్న షానా చావడాను కత్తులతో పలుమార్లు పొడిచి కిరాతకంగా చంపారు. ప్రియుడు తన తండ్రిని చంపుతున్నంత సేపు ఆ బాలిక కిటికీ గుండా చూస్తూనే ఉంది. తండ్రి మరణించాడని నిర్ధారించుకున్నాకే శాంతించింది.

పోలీసుల దర్యాప్తు
మొదట మిస్టరీగా కనిపించిన ఈ హత్య కేసును పోలీసులు ఛేదించగా.. అసలు నిజాలు వెలుగులోకి వచ్చాయి. నిందితులు రంజిత్, అతని స్నేహితుడిని పోలీసులు అరెస్ట్ చేశారు. మైనర్ కావడంతో ఆ బాలికను బాలల సంరక్షణ కేంద్రానికి తరలించారు. హత్యకు ఉపయోగించిన ఆయుధాల కోసం పోలీసులు గాలిస్తున్నారు. ఈ ఘటన సమాజంలో నైతిక విలువల పతనాన్ని సూచిస్తోంది. కన్నతండ్రిని అడ్డుగా భావించి ప్రాణాలు తీయించిన ఈ బాలిక రాక్షసత్వంపై సర్వత్రా విమర్శలు వ్యక్తమవుతున్నాయి.

English summary

A shocking crime in Vadodara, Gujarat, where a 17-year-old girl allegedly planned her father’s murder with her lover after he opposed their relationship. Police arrested the accused and sent the minor to a juvenile home.