వీ సెంటిమెంట్.. అక్కడ నుండి పోటీ చేస్తే విజయ్ కు విక్టరీ!

తమిళనాడు రాజకీయాలు వేడెక్కుతున్నాయి. రాబోయే శాసనసభ ఎన్నికల్లో తమిళగ వెట్రి కళగం పార్టీ పైన ఆసక్తికర చర్చ జరుగుతుంది. సినిమాలలో తనదంటూ స్థానాన్ని సంపాదించుకుని రాజకీయంగానూ ముందుకు వచ్చిన విజయ్ పార్టీ పైన ఇప్పటికే ప్రత్యర్ధులు దాడి చేస్తున్న వేళ, ముఖ్యంగా డిఎంకె విజయ్ రాజకీయాన్ని సవాల్ గా తీసుకుని ఎన్నికలలో గట్టి గుణపాఠం చెప్పాలని భావిస్తున్న వేళ విజయ్ పోటీ చేసే నియోజకవర్గం ఏది అన్న ఆసక్తికరచర్చ జరుగుతుంది.

అక్కడ నుండి పోటీకి విజయ్ పరిశీలన

మరోవైపు విజయ్ కూడా వి అనే అక్షరం పైన ప్రత్యేక సెంటిమెంట్ ఉండడంతో వి పేరుతో స్టార్ట్ అయ్యే నియోజకవర్గాలలో పోటీకి సంబంధించి ప్రధానంగా పరిశీలిస్తున్నట్లుగా తెలుస్తోంది. వి అక్షరం ఉన్న నియోజకవర్గం నుంచి పోటీ చేస్తే గెలుపు తధ్యమని విజయ్ కు ఒక జ్యోతిష్యుడు సూచించారని ఇప్పుడు ప్రస్తుతం తమిళనాట చర్చ జరుగుతుంది. విరుగంబాక్కం, వేళ్ళచ్చేరి, విక్రంవాడి, వేదారణ్యం, వేద సంతూర్ నియోజకవర్గాలను విజయ్ పరిశీలన చేస్తున్నట్టు తెలుస్తోంది.

ఆ నియోజకవర్గాలలో దేనికదే ప్రత్యేకం

ఈ ప్రాంతాలలో విజయ్ కు అభిమానుల బలం ఉండడంతో పాటు, రాజకీయంగా కూడా అనుకూల పరిస్థితులు ఉన్నాయని సమాచారం. విరుగంబాక్కంలో విజయ్ తల్లిదండ్రులు నివసిస్తుండగా , పనైయూర్ నివాసానికి, పార్టీ కార్యాలయానికి వేళచ్చేరి కొద్ది దూరంలోనే ఉంది. ఇక టీవీకే తొలి రాజకీయ మహానాడు జరిగిన ప్రాంతం విక్రంవాడి కావడం, అక్కడినుండే విజయ్ తన రాజకీయ లక్ష్యాలను, పార్టీ విధానాలను ప్రకటించడం కూడా ఈ స్థానం పైన ఆసక్తిని రేకెత్తిస్తుంది.

విజయ్ ను ఓడించాలని డీఎంకే ప్లాన్

అయితే విజయ్ ఇప్పటివరకు తన పోటీచేసే నియోజకవర్గం పైన అధికారికంగా ఎటువంటి ప్రకటన వెల్లడించలేదు. అయినప్పటికీ వీ సెంటిమెంట్ చుట్టూ ఈ చర్చలు సాగుతున్నాయి. ఇవి తమిళనాడు రాజకీయాలలో ఆసక్తిని రేకెత్తిస్తున్నాయి. ఇక విజయ్ పోటీ చేసే నియోజకవర్గాన్ని తెలుసుకొని, అక్కడ విజయ్ ను ఓడించాలని డీఎంకే భావిస్తోంది.

ఎక్కడ నుండి పోటీలో ఉంటారో సస్పెన్స్

ఆయన పోటీ చేసే నియోజకవర్గంలో తమ పార్టీ అభ్యర్థిని రంగంలోకి దించాలని, భారీ మెజారిటీతో రాజకీయాలలో విజయ్ కు బలమైన దెబ్బ కొట్టాలని డీఎంకే ఆలోచిస్తోంది. అయితే అందుకే విజయ్ తాను ఏ స్థానం నుంచి పోటీ చేస్తారనే విషయాన్ని ముందుగా వెల్లడించవద్దని నిర్ణయించుకున్నట్టు సమాచారం. ఏది ఏమైనా తమిళనాడు విజయ్ రాజకీయాలతో ఈసారి అసెంబ్లీ ఎన్నికలు కొత్త రూపాన్ని తీసుకోబోతున్నాయి.

English summary

Actor Vijay, TVK party chief, is likely to contest the upcoming assembly elections. Speculation is rife that he may choose a constituency starting with the letter ‘V’ following astrological advice.