ఏమిటీ వింత? తెల్ల పులికి పుట్టిన పసుపు పిల్లలు..

మధ్యప్రదేశ్‌లోని గ్వాలియర్ గడ్డపై రాజసం ఉట్టిపడింది! గాంధీ జూలాజికల్ పార్క్‌లో ఆదివారం మధ్యాహ్నం ఒక అరుదైన దృశ్యం ఆవిష్కృతమైంది. 'మీరా' అనే తెల్ల పులి మూడు ముద్దుల కూనలకు జన్మనిచ్చి, జూలో పండుగ వాతావరణాన్ని నింపింది.

తెల్ల పులి 'మీరా'కు పుట్టిన ఈ మూడు కూనల్లో ఒక విశేషం ఉంది. ఇందులో ఒకటి అరుదైన తెల్ల పులి కూన కాగా, మిగిలిన రెండు పసుపు రంగులో మెరిసిపోయే రాయల్ బెంగాల్ పులి కూనలు. ఈ కొత్త అతిథుల రాకతో గ్వాలియర్ జూలో పులుల సంఖ్య ఇప్పుడు రెండంకెల స్థాయికి అంటే 10కి చేరింది. ప్రస్తుతం ఈ జూలో నాలుగు తెల్ల పులులు, ఆరు రాయల్ బెంగాల్ పులులు సందడి చేస్తున్నాయి. తల్లి పులి మీరా తన బిడ్డలకు నిరంతరం పాలిస్తూ కంటికి రెప్పలా కాపాడుకుంటోందని, తల్లితో పాటు కూనలు కూడా పూర్తి ఆరోగ్యంగా ఉన్నాయని జూ క్యూరేటర్ గౌరవ్ పరిహార్ ధృవీకరించారు.

పులుల పెంపకంలో గ్వాలియర్ జూ 'రికార్డ్'!

పులుల జాతి సంరక్షణలో గ్వాలియర్ జూ దేశానికే ఆదర్శంగా నిలుస్తోంది. ఇక్కడ పుట్టిన పులులను దేశవ్యాప్తంగా ఉన్న వివిధ జూలకు పంపిస్తూ జంతు మార్పిడి కార్యక్రమాల్లో కీలక పాత్ర పోషిస్తోంది. ఇప్పటివరకు సుమారు 21 నుంచి 22 పులులను ఇతర ప్రాంతాలకు అందించి ఈ జూ రికార్డ్ సృష్టించింది. విశేషమేమిటంటే, ఇప్పుడు తల్లి అయిన మీరా కూడా ఇదే జూలో జన్మించింది. గతంలో ఢిల్లీ నుంచి తీసుకువచ్చిన తెల్ల పులికి మీరా పుట్టగా, ఇప్పుడు ఆమె వరుసగా కూనలకు జన్మనిస్తూ జూ వంశవృక్షాన్ని పెంచుతోంది.

క్రాస్-మేటింగ్ వ్యూహం.. బహుళ వర్ణాల సంతతి!

ఆరోగ్యకరమైన - బలమైన సంతానాన్ని పొందడానికి జూ అధికారులు ఒక ప్రత్యేకమైన 'బ్రీడింగ్ స్ట్రాటజీ'ని అనుసరిస్తున్నారు. తెల్ల పులుల సంఖ్య తక్కువగా ఉన్నందున, జన్యుపరమైన లోపాలు తలెత్తకుండా ఉండేందుకు తోబుట్టువుల మధ్య సంపర్కాన్ని నివారిస్తున్నారు. దీనికోసం తెల్ల పులులను రాయల్ బెంగాల్ పులులతో 'క్రాస్-మేటింగ్' చేయిస్తున్నారు. ఈ వ్యూహం వల్లే మీరాకు జన్మించిన మూడు కూనల్లో తెల్ల పులితో పాటు పసుపు రంగు పులులు కూడా పుట్టాయని నిపుణులు వివరిస్తున్నారు.

బాలింత పులికి 'రాజభోగం'!

కూనలకు పాలిచ్చే తల్లి పులి మీరా ఆరోగ్యంపై జూ సిబ్బంది ప్రత్యేక శ్రద్ధ తీసుకుంటున్నారు. ఆమెకు ప్రస్తుతం పోషక విలువలు అధికంగా ఉండే ప్రత్యేక ఆహారాన్ని అందిస్తున్నారు. చికెన్, వేడివేడి చికెన్ సూప్, గుడ్లు మరియు పాలు వంటి తేలికపాటి, బలవర్ధకమైన ఆహారాన్ని మెనూలో చేర్చారు. ఈ కొత్త కూనల రాకతో గ్వాలియర్ జూ వైభవం మరోసారి దేశవ్యాప్తంగా చర్చనీయాంశమైంది.

English summary

A white tigress named Meera gave birth to three healthy cubs at Gwalior’s Gandhi Zoological Park. The litter includes one white and two yellow Royal Bengal cubs, taking the zoo's total tiger count to 10.