దెబ్బకు దిగింది: పెప్సీ, కోకాకోలా బ్యాన్: వీటికి భలే గిరాకీ వచ్చేసింది

చెన్నై: జల్లికట్టును అడ్డుకుంటున్న పేటా సంస్థను నిషేధించాలని తమిళనాడులో విద్యార్థి సంఘాలు డిమాండ్ చేస్తున్నాయి. విద్యార్థి సంఘాలకు పలు వ్యాపార సంఘాలు, సినీ పరిశ్రమ ప్రముఖులు, అనేక రాజకీయ పార్టీల నాయకులు మద్దతు ఇస్తున్నారు.

జల్లికట్టు నిర్వహణ కోసం విద్యార్థులు చేస్తున్న ఆందోళనకు మద్దతు ఇస్తూ తమిళనాడులో విదేశీ శీతల పానీయాలైన పెప్సీ, కోకాకోలా విక్రయాలు నిలిపివేస్తున్నామని వ్యాపార సంఘాలు తేల్చిచెప్పాయి.

ఇప్పటికే తమిళనాడులోని అనేక సినిమా థియేటర్లలో పెప్సీ, కోకాకోలా శీతలపానీయాల విక్రయాలు బ్యాన్ చేశారు. పెప్సీ, కోకాకోలా స్థానంలో స్వదేశీయంగా తయారు అవుతున్న గోలీ సోడా, కలర్ సోడా, నిమ్మకాయ సోడాలు అందుబాటులోకి తీసుకు వచ్చారు.

ఫ్రీజర్ లలో పెట్టిన గోలీ సోడా, నిమ్మకాయ సోడా, కలర్ సోడాలు ఇప్పుడు సినిమా థియేటర్లలో హాట్ కేకుల్లా అమ్ముడు పోతున్నాయి. ఎలాగైనా మన దేశంలో తయారు అవుతున్న సోడాలకు ఇప్పుడు భలే గిరాకి వచ్చిందని సినిమా థియేటర్లకు వెలుతున్న సినీ అభిమానులు అంటున్నారు.

అంతే కాకుండా చెన్నై నగరంతో పాటు తమిళనాడులోని వివిద జిల్లాల్లో గోలీ సోడాల విక్రయాలు ఊపందుకున్నాయి. జల్లికట్టు ఆందోళన పుణ్యమా అంటూ మా వ్యాపారాలు జోరందుకున్నాయని గోలీ సోడాలు విక్రయిస్తున్న చిరు వ్యాపారులు అంటున్నారు.

English summary

Jallikattu: Will the desi cool drinks get the market space again in Tamilnadu as Pepsi and Coke get traders oppose.