కుప్పకూలిన విమానం.. 110 మంది మృతి..?

ఘోర విమాన ప్రమాదం జరిగింది. కొలంబియాకు చెందిన మిలిటరీ ఎయిర్ క్రాఫ్ట్ కుప్పకూలిన ఘటనలో 110 మందికి పైగా మృతి చెందినట్లు స్పష్టం అవుతోంది. విమానం టేకాఫ్ అయిన కొద్ది సేపటికే ఈ ప్రమాదం సంభవించినట్లు తెలుస్తోంది. కొలంబియాలోని దక్షిణ అమెజాన్ ప్రాంతంలో ఈ ఘటన జరిగినట్లు సమాచారం అందుతోంది. ఈ ఘోర ప్రమాదంలో లాక్ హీడ్ మార్టిన్ హెరెకులెస్ ప్లేన్ సీ-130 ధ్వంసం అయింది. ఈ విషయాన్ని కొలంబియా డిఫెన్స్ మినిస్ట్రీ ధ్రువీకరించింది.

పెరూ సరిహద్దులోని పీయర్టో లెగుజామో ప్రాంతంలో ఈ విమాన ప్రమాదం జరిగినట్లు సమాచారం. విమానం టేకాఫ్ అయిన సమయంలో అందులో 110 మందికిపైగా సైనికులు ఉన్నట్లు స్థానిక మీడియా పేర్కొంది. అయితే మరో కథనం ప్రకారం 57 మందిని సురక్షిత ప్రాంతాలకు తరలించినట్లు తెలుస్తోంది. ఇక మృతుల సంఖ్యపై క్లారిటీ రావాల్సి ఉంది.

ఈ ఘటనపై కొలంబియా డిఫెన్స్ మినిస్టర్ పెడ్రో చెజ్ మాట్లాడారు. విమానం టేకాఫ్ అయిన కొద్దిసేపటికే ఈ ఘటన జరిగినట్లు స్పష్టం చేశారు. అయితే ఈ ప్రమాదంలో ఎంతమంది మృతి చెందారో తెలియాల్సి ఉందని ఈ మేరకు అధికారులు మృతుల సంఖ్యను అధ్యయనం చేస్తున్నట్లు తెలిపారు. ప్రమాదం జరిగిన వెంటనే ఎమర్జెన్సీ బృందాలు ఘటనాస్థలికి చేరుకుని సహాయక చర్యలు చేపట్టినట్లు పేర్కొన్నారు.

ఇక ఈ ఘటనపై కొలంబియా అధ్యక్షుడు గుస్తావో పెట్రో ఆందోళన వ్యక్తం చేశారు. ఇలాంటి ఘటనలు ఎప్పుడూ జరగకూడదని తాను కోరుకుంటున్నట్లు తెలిపారు. అలాగే అందరూ బతికే ఉంటారని తాను ఆశిస్తున్నట్లు పేర్కొన్నారు. కొలంబియా మిలిటరీ విమానాలను మరింత అత్యాధునిక భద్రతా ప్రమాణాలతో తీర్చి దిద్దాల్సిన అవసరం ఉందని నొక్కి చెప్పారు. ఈ ప్రమాదానికి గల కారణాలపై దర్యాప్తు జరిపి సంబంధిత అధికారులను శిక్షించాలని ఆదేశించారు.