మాతృత్వం: బిడ్డ కోసం సింహంతో పోరాడింది!

కొలరాడో: ఓ మాతృమూర్తి తన కన్న బిడ్డను రక్షించుకునేందుకు ఏకంగా సింహంతోనే పోరాటం చేసింది. సింహాన్ని వెంబడించి, దాని నోటిలో చిక్కుకుని విలవిల్లాడుతున్న తన ఐదేళ్ల చిన్నారిని కాపాడుకుంది. కొలరాడోలోని అస్ఫెన్‌ పరిసరాల్లో శుక్రవారం ఈ ఘటన చోటు చేసుకుంది.

వివరాల్లోకి వెళితే.. కొలరాడోలోని అస్ఫెన్‌ పరిసరాల్లో బాధిత చిన్నారి, అతడి సోదరుడుతో ఆడుకుంటున్నాడు. ఒక్కసారిగా అరుపులు వినిపించడంతో వారి తల్లి బయటకు వచ్చిచూసింది. తన చిన్న కుమారుడు కొండల్లో సంచరించే సింహం నోటిలో చిక్కుకోవడం చూసి నిశ్చేష్టురాలైంది.

వెంటనే తేరుకుని సింహాన్ని వెంబడించింది. బలవంతంగా సింహం నోటిని తెరచి దాని నుంచి చిన్నారిని విడిపించింది. అనంతరం ఒక్క ఉదుటన పరుగు లంకించుకొని బిడ్డతో సహా ప్రాణాలతో బయటపడింది.

అయితే సింహం నోటబట్టడంతో బాలుడి తల, మొహం, మెడకు తీవ్ర గాయాలయ్యాయి. అతడి తల్లికి సైతం సింహం గోరు గాట్లు, పళ్ల గాట్లు పడ్డాయి. సమాచారం అందుకున్న పోలీసులు, అధికారులు వారిద్దరినీ డెన్వర్‌ ఆస్పత్రికి తరలించి చికిత్స అందిస్తున్నారు. కన్న బిడ్డ కోసం ఇంతటి సాహసం చేసిన ఆమె ఒక 'హీరో' అంటూ అధికారులు ప్రశంసించారు. కాగా, దాడికి పాల్పడిన సింహాన్ని పోలీసులు హతమార్చారు.

English summary

A Colorado woman managed to fight off a mountain lion that was attacking her 5-year-old son.