కోవిడ్-19: ఆరు రోజుల తర్వాత దేశంలో స్వల్పంగా తగ్గిన కరోనా కేసులు, భారత్ పరిస్థితి ఆందోళనకరంగా ఉందన్న డబ్ల్యుహెచ్ఓ

By Bbc Telugu

Updated: Tuesday, April 27, 2021, 19:45 [IST]

భారత్‌లో గత 24 గంటల్లో కొత్తగా 3,23,144 కరోనా కేసులు నమోదయ్యాయి. కోవిడ్ వల్ల కొత్తగా 2771 మంది చనిపోయారు.

దీంతో దేశంలో మొత్తం కేసుల సంఖ్య 1,76,36,307కు చేరాయని, మొత్తం మరణాల సంఖ్య 1,97,894కు పెరిగిందని ఆరోగ్య మంత్రిత్వ శాఖ చెప్పింది.

https://twitter.com/ANI/status/1386895208323829761

తాజా కేసులతో దేశంలో మొత్తం యాక్టివ్ కేసుల సంఖ్య కూడా 28,82,204కు చేరుకుంది.

గత 24 గంటల్లో దేశవ్యాప్తంగా 2,51,827 మంది ఆస్పత్రుల నుంచి డిశ్చార్జ్ అయ్యారు. దీంతో కరోనా నుంచి కోలుకున్న వారి సంఖ్య 1,45,56,209కు చేరింది.

దేశంలో ఇప్పటివరకూ 14,52,71,186 వ్యాక్సీన్ డోసులు వేసినట్లు ఆరోగ్య మంత్రిత్వ శాఖ చెప్పింది.

భారత్‌లో సోమవారం మొత్తం 3,52,991 కేసులు, 2812 మరణాలు నమోదయ్యాయి.

గత ఆరు రోజులుగా పెరుగుతూ వచ్చిన కరోనా కేసులు మొదటి సారి స్వల్పంగా తగ్గాయి.

దేశంలో మరణాల సంఖ్య కూడా 13 రోజులు వేగంగా పెరిగిన తర్వాత స్వల్పంగా తగ్గింది.

https://twitter.com/AFP/status/1386711844174368769

భారత్‌లో పరిస్థితి ఘోరం: డబ్ల్యుహెచ్ఓ చీఫ్

భారత్‌లో ప్రస్తుత కరోనా పరిస్థితిపై ప్రపంచ ఆరోగ్య సంస్థ చీఫ్ చీఫ్ టెడ్రోస్‌ అద్నామ్‌ గెబ్రియేసస్‌ విచారం వ్యక్తం చేశారు.

ఏప్రిల్ 26న మీడియా బ్రీఫింగ్ సమయంలో ఆయన భారత్‌లో కరోనా కేసులు పెరగడం గురించి మాట్లాడారు.

"ప్రపంచ వ్యాప్తంగా కరోనా మహమ్మారి విజృంభణ కొనసాగుతోంది. వరుసగా తొమ్మిదోవారం కరోనా కేసులు పెరగడం చూస్తున్నాం. దానితోపాటూ ఆరు వారాల నుంచి వరసగా మరణాల సంఖ్య కూడా పెరుగుతూ వస్తోంది" అని గెబ్రియేసస్ అన్నారు.

"చాలా దేశాల్లో కరోనా వేగంగా వ్యాపిస్తోంది. భారత్‌లో పరిస్థితిని హృదయ విదారకం కంటే ఘోరంగా ఉంది" అని ఆయన అన్నారు.

మహమ్మారిని ఎదుర్కోడానికి ప్రపంచ ఆరోగ్య సంస్థ ఎన్ని చేయాలో అన్నీ చేస్తోందని గెబ్రియెసస్ అన్నారు.

"మేం ప్రస్తుత పరిస్థితిని ఎదుర్కోడానికి చాలా ముఖ్యమైన పరికరాలు, వాటి సరఫరా కొనసాగేలా చూస్తున్నాం. వాటిలో ఆక్సిజన్, మొబైల్ ఫీల్డ్ ఆస్పత్రులు, ల్యాబ్స్ ఉన్నాయి" అన్నారు.