ట్రంప్ ఫోటోతో 250 డాలర్ల నోటు.. ఫోటో వైరల్ !!
అమెరికా అధ్యక్షుడు డొనాల్డ్ ట్రంప్ మరోసారి సంచలన నిర్ణయంతో అందరికీ షాక్ ఇచ్చారు. రెండోసారి అధికారం చేపట్టిన తర్వాత పలు వివాదాస్పద నిర్ణయాలకు కేరాఫ్ అడ్రస్గా మారిన ఆయన.. ఈసారి ఏకంగా దేశ కరెన్సీని టార్గెట్ చేసినట్టు తెలుస్తోంది. ట్రంప్ చిత్రంతో 250 డాలర్ల నోటు నమూనాలను సిద్ధం చేసినట్లు ఆర్థిక మంత్రి స్కాట్ బెసెంట్ వెల్లడించారు. దీంతో అమెరికా రాజకీయ వర్గాలు, ఆర్థిక రంగాల్లో ఈ వ్యవహారం తీవ్ర చర్చకు తెరలేపింది.
2026లో అమెరికా స్వాతంత్ర్యానికి 250 సంవత్సరాలు పూర్తికానున్నాయి. ఈ చారిత్రక మైలురాయిని పురస్కరించుకుని ప్రత్యేక కరెన్సీ నోటును విడుదల చేసే ఆలోచనలో ట్రంప్ ప్రభుత్వం ఉన్నట్లు సమాచారం. ఈ నేపథ్యంలోనే 250 డాలర్ల విలువైన నోటుపై ట్రంప్ చిత్రాన్ని ముద్రించే ప్రతిపాదన ముందుకు వచ్చినట్లు తెలుస్తోంది. ఆర్థిక మంత్రి స్కాట్ బెసెంట్ ప్రకారం, అమెరికా చరిత్రలో కీలక ఘట్టాన్ని గుర్తు చేసేలా ఈ ప్రత్యేక నోటును తీసుకురావాలనే ఆలోచన ఉంది. ట్రంప్ పాలనలో సాధించిన విజయాలను కూడా ఇందులో ప్రతిబింబించాలనే ప్రతిపాదనలు వినిపిస్తున్నాయి.
160 ఏళ్ల నిబంధన అడ్డంకి..
అయితే ట్రంప్ చిత్రం కరెన్సీపై రావడం అంత సులభం కాదు. 1866లో అమెరికా కాంగ్రెస్ ఆమోదించిన చట్టం ప్రకారం జీవించి ఉన్న వ్యక్తుల ఫొటోలను డాలర్ నోట్లపై ముద్రించకూడదు. ప్రస్తుతం చలామణిలో ఉన్న అన్ని అమెరికా కరెన్సీ నోట్లపై మరణించిన అధ్యక్షులు లేదా జాతీయ నాయకుల చిత్రాలే ఉంటాయి. అందువల్ల ట్రంప్ చిత్రంతో నోటు విడుదల కావాలంటే దాదాపు 160 ఏళ్ల చట్టాన్ని సవరించాల్సి ఉంటుంది. ఇందుకోసం రిపబ్లికన్ పార్టీకి చెందిన కొందరు సభ్యులు ఇప్పటికే కాంగ్రెస్లో బిల్లులు ప్రవేశపెట్టినట్లు సమాచారం.
రిపబ్లికన్ల మద్దతు.. డెమొక్రాట్ల వ్యతిరేకత
ట్రంప్ అనుచరులు ఈ ప్రతిపాదనకు మద్దతు తెలుపుతున్నారు. అమెరికా రాజకీయ, ఆర్థిక వ్యవస్థపై ట్రంప్ చూపిన ప్రభావాన్ని గుర్తించే చర్యగా వారు దీన్ని అభివర్ణిస్తున్నారు. అయితే డెమొక్రాటిక్ పార్టీ మాత్రం తీవ్రంగా వ్యతిరేకిస్తోంది. అధికారంలో ఉన్న వ్యక్తి చిత్రాన్ని కరెన్సీపై ముద్రించడం ప్రజాస్వామ్య విలువలకు విరుద్ధమని, ఇది వ్యక్తి ఆరాధనకు దారితీసే ప్రమాదం ఉందని విమర్శిస్తోంది.
ట్రెజరీ శాఖలో అంతర్గత చర్చలు..
ఈ ప్రతిపాదన అమెరికా ట్రెజరీ శాఖలో కూడా వివాదానికి దారితీసినట్లు తెలుస్తోంది. ట్రంప్ చిత్రంతో కొత్త నోటు జారీ అంశంపై జరిగిన చర్చల నేపథ్యంలో బ్యూరో ఆఫ్ ఎంగ్రేవింగ్ అండ్ ప్రింటింగ్ మాజీ డైరెక్టర్ పట్రిషియా సోలిమేన్ బదిలీ వార్తలు కూడా ప్రాధాన్యం సంతరించుకున్నాయి. అయితే ఆ బదిలీకి ఈ వ్యవహారమే కారణమా అన్న విషయంపై అధికారిక స్పష్టత లేదు.
మరోవైపు అమెరికా మీడియా కథనాల ప్రకారం, 250 డాలర్ల నోటు ప్రాథమిక నమూనాలను ట్రంప్ స్వయంగా పరిశీలించినట్లు సమాచారం. డిజైన్లో కొన్ని మార్పులపై ఆయన సూచనలు కూడా చేసినట్లు వార్తలు వెలువడ్డాయి. దీంతో ఈ ప్రాజెక్టు కేవలం ప్రతిపాదన స్థాయిలోనే కాకుండా, అధికారిక పరిశీలన దశకు చేరిందనే అభిప్రాయాలు వ్యక్తమవుతున్నాయి. ఒకవేళ కాంగ్రెస్ చట్ట సవరణకు ఆమోదం తెలిపి, 250 డాలర్ల నోటు విడుదలైతే అది అమెరికా కరెన్సీ చరిత్రలో అరుదైన సంఘటనగా నిలుస్తుంది. సజీవంగా ఉన్న వ్యక్తి చిత్రం అధికారిక కరెన్సీపై ముద్రించబడిన అత్యంత అరుదైన సందర్భంగా ఇది గుర్తింపు పొందే అవకాశం ఉంది.
అంతేకాకుండా తన పదవీకాలంలోనే అమెరికా కరెన్సీపై కనిపించిన తొలి అధ్యక్షుడిగా ట్రంప్ చరిత్ర సృష్టించే అవకాశమూ ఉంటుంది. ఇదిలా ఉండగా, ట్రంప్ సంతకంతో కూడిన కొత్త డాలర్ నోట్లు కూడా త్వరలో చలామణిలోకి రానున్నట్లు సమాచారం. 100 డాలర్ల నోట్లతో పాటు మరికొన్ని కరెన్సీ నోట్లపై కూడా ట్రంప్ సంతకాన్ని ముద్రించేందుకు ట్రెజరీ శాఖ అనుమతి ఇచ్చినట్లు నివేదికలు చెబుతున్నాయి. ఈ ముద్రణ ప్రక్రియ ఇప్పటికే ప్రారంభమైనట్లు తెలుస్తోంది.
Click it and Unblock the Notifications
Sign in with Google