ట్రంప్ మరో బిగ్ షాక్..! హెచ్1బీ సహా ప్రీమియం ఫీజులన్నీ పెంపు..!

అమెరికాలో రెండోసారి అధ్యక్ష బాధ్యతలు చేపట్టిన నాటి నుంచి వలసలపై ఉక్కుపాదం మోపుతున్న డొనాల్డ్ ట్రంప్.. ఇదే క్రమంలో హెచ్1బీ వీసా దారులపై కక్షసాధింపు చర్యలకు దిగుతున్నారు. దీంతో హెచ్1బీ వీసాల్లో అత్యధికులుగా ఉన్న భారతీయులకు వరుస షాక్ లు తప్పడం లేదు. ఇదే క్రమంలో తాజాగా హెచ్1బీ వీసాల వార్షిక ఫీజుల్ని లక్ష డాలర్లకు పెంచేసిన ట్రంప్.. ఇప్పుడు ప్రీమియం ప్రాసెసింగ్ ఫీజులపై మరో షాక్ ఇచ్చారు.

హెచ్1బీ వీసాలతో పాటు ఇతర ఇమ్మిగ్రేషన్ ప్రయోజనాల ప్రీమియం ప్రాసెసింగ్ ఫీజుల్ని పెంచుతున్నట్లు ఇవాళ అమెరికా పౌరసత్వం, వలసదారుల సేవల సంస్థ (USCIS) ప్రకటించింది. ఈ ఫీజుల పెంపు మార్చి 1 నుండి అమలులోకి తెస్తున్నట్లు తెలిపింది. జూన్ 2023 నుండి జూన్ 2025 వరకు ద్రవ్యోల్బణం ప్రకారం హెచ్1బీ వీసాల ప్రీమియం ప్రాసెసింగ్ ఫీజు పెంచినట్లు వెల్లడించింది. ఈ మార్పులు అమెరికాలో పనిచేస్తున్న లేదా చదువుతున్న భారతీయ పౌరులతో సహా విదేశీ నిపుణులు విస్తృతంగా ఉపయోగించే కీలకమైన ఉపాధి ఆధారిత, వలసల సేవల్ని ప్రభావితం చేస్తాయి.

సవరించిన ఫీజుల ప్రకారం H-2B లేదా R-1 వలసేతర స్టేటస్ కోసం ఫారమ్ I-129 పిటిషన్ల ప్రీమియం ప్రాసెసింగ్ రుసుము $1,685 నుండి $1,780కి పెరుగుతుంది. హెచ్ -1బీ , ఎల్-1, ఓ-1, పీ1-1, టీఎన్ వీసాలతో సహా అందుబాటులో ఉన్న అన్ని ఇతర ఫారమ్ ఐ-129 ల ప్రీమియం ప్రాసెసింగ్ ఫీజు $2,805 నుండి $2,965కి పెరుగుతుంది. ఉపాధి ఆధారిత వర్గాలలోని విదేశీ కార్మికుల కోసం ఫారమ్ ఐ-140 వలసదారుల పిటిషన్లకు అదే $2,965 ప్రీమియం ప్రాసెసింగ్ ఫీజు వర్తిస్తుంది.

వలసేతర స్థితిని పొడిగించడానికి లేదా మార్చడానికి కొన్ని దరఖాస్తులకు ప్రీమియం ప్రాసెసింగ్ రుసుములు కూడా పెరగబోతున్నాయి. ఎఫ్-1, ఎఫ్-2 విద్యార్థులు, జె-1, జె-2 ఎక్స్ఛేంజ్ సందర్శకులు, ఎం-1, ఎం-2 వృత్తి విద్యార్థులను కవర్ చేసే ఫారమ్ ఐ-539 దరఖాస్తుల ఫీజు $1,965 నుండి $2,075 కు పెరుగుతుంది. వేగంగా ఉపాధి అవకాశం కోరుకునే దరఖాస్తుదారుల కోసం ఫారమ్ ఐ-765 దరఖాస్తుల కోసం ప్రీమియం ప్రాసెసింగ్ ఫీజు ఐచ్ఛిక ప్రాక్టికల్ శిక్షణ, స్టెమ్ ఓపీటీ తో సహా $1,685 నుండి $1,780 కు పెరగబోతోంది. ఈ వీసా ఫీజుల పెంపు భారతీయ నిపుణులు, విద్యార్థులు, యజమానులపై ప్రత్యక్ష ప్రభావాన్ని చూపనుంది.