7.6 తీవ్రతతో వణికించిన పెను భూకంపం: సునామీ అలలు: అల్లకల్లోలం.. పశ్చిమ తీరం

Japan earthquake: జపాన్‌లో మరోసారి పెను భూకంపం సంభవించింది. పశ్చిమ తీర ప్రాంతాన్ని వణికించింది. భూకంప తీవ్రత అనూహ్యంగా ఉండటంతో అధికారులు అప్రమత్తం అయ్యారు. సునామీ హెచ్చరికలను జారీ చేశారు. ముందు జాగ్రత్త చర్యలను తీసుకున్నారు. తీర ప్రాంతాలన్నింటినీ ఖాళీ చేయించారు.

తీర ప్రాంతంలోని ఇషికవా ప్రీఫెక్షర్ రీజియన్‌ను భూకంప కేంద్రంగా గుర్తించారు. రిక్టర్ స్కేలుపై దీని తీవ్రత 7.4గా రికార్డయింది. జపాన్ పశ్చిమ ప్రాంతంలో ఉంటుందీ ఇషికవా ప్రీఫెక్షర్. స్థానిక కాలమానం ప్రకారం సాయంత్రం 4:10 నిమిషాలకు ఈ భూకంపం సంభవించినట్లు యునైటెడ్ స్టేట్స్ జియోలాజికల్ సర్వే తెలిపింది.

ఇషికావ ప్రీఫెక్షర్ పరిధిలో ఉపరితలం నుంచి 10 కిలోమీటర్ల లోతున ఫలకాల్లో సంభవించిన పెను కదలికల వల్ల భూమి ప్రకోపించింది. దీని తీవ్రత.. తీర ప్రాంతంలోని ఇషికావ, నిగిట, టొయొమా, యమగట ప్రీఫెక్షర్స్‌లో అల్లకల్లోలాన్ని సృష్టించింది. ఈ మూడు రీజియన్ల పరిధిలో ఉన్న నగరాలను భయభ్రాంతులకు గురి చేసింది.

తీర నగరాలైన వజీమా, నొటో, కషివజక్కిల్లో భూ ప్ర్రకంపనలు నమోదయ్యాయి. ఈ భూకంపం వల్ల ఇప్పటి వరకు ప్రాణ, ఆస్తినష్టం సంభవించినట్లు సమాచారం అందలేదు. కొన్ని భవనాలు బీటలు వారినట్లు చెబుతున్నారు. ప్రధాన భూకంపం తరువాత కూడా స్వల్ప స్థాయిలో ప్రకంపనలు నమోదు కావడం వల్ల స్థానికులు ఇళ్లల్లోకి వెళ్లడానికి భయపడ్డారు.

కాగా భూకంపం అనంతరం సముద్రంలో అలలు పోటెత్తాయి. అనమిఝు, ననావో, న్యూజెన్, కురొబె-షి తీరాల్లో అయిదు మీటర్ల వరకు అలలు ఎగిసిపడినట్లు జపాన్ న్యూస్ అవుట్‌లెట్ ఎన్‌హెచ్‌కే తెలిపింది. సునామీ హెచ్చరికలను జారీ చేసినట్లు వివరించింది.

WATCH: Tsunami waves observed along the coast of western Japan. People being urged to evacuate pic.twitter.com/sY3bdpVZVc

— BNO News (@BNONews) January 1, 2024

ముందు జాగ్రత్త చర్యగా తీర ప్రాంతం మొత్తాన్నీ అధికారులు ఖాళీ చేయించారు. పర్యాటకులను సురక్షిత ప్రదేశాలకు వెళ్లాల్సిందిగా ఆదేశాలను జారీ చేశారు. కొన్ని ప్రాంతాల్లో సముద్రం ముందుకు చొచ్చుకుని రావడం, అలలు ఉవ్వెత్తున ఎగిసిపడటం వంటి ఘటనలకు చెందిన వీడియోలు సోషల్ మీడియాలో వైరల్ అవుతున్నాయి.

English summary

National Center for Seismology said that the Earthquake of Magnitude 7.2 on the Richter Scale strikes near West Coast of Japan.