వారసురాలికి కిమ్ స్పెషల్ ట్రైనింగ్.. యుద్ధ ట్యాంకుపై తండ్రీకూతుళ్ల రచ్చ!

ఉత్తర కొరియా అధినేత కిమ్ జోంగ్ ఉన్ మరోసారి వార్తల్లో నిలిచారు. ఈ సారి ఆయన తన గారాల పట్టి కిమ్ జు ఏతో కలిసి దేశం సరికొత్తగా అభివృద్ధి చేసిన యుద్ధ ట్యాంకును స్వయంగా నడుపుతూ కనిపించారు. గురువారం జరిగిన భారీ స్థాయి సైనిక విన్యాసాల్లో తండ్రీ కూతుళ్లిద్దరూ ఒకే రకమైన లెదర్ జాకెట్లు ధరించి యుద్ధ ట్యాంకుపై కనిపించడం విశేషం.

ట్యాంకుపై కిమ్.. హాచ్ నుంచి జు ఏ!
స్థానిక మీడియా విడుదల చేసిన ఫోటోల ప్రకారం.. కిమ్ జోంగ్ ఉన్ తన ట్రేడ్‌మార్క్ లెదర్ జాకెట్ ధరించి యుద్ధ ట్యాంకుపై కూర్చొని ఉండగా.. ఆయన కుమార్తె జు ఏ ట్యాంకు లోపలి నుంచి తల బయటపెట్టి ఉత్సాహంగా కనిపిస్తోంది. ప్యాంగ్యాంగ్ ట్రైనింగ్ బేస్ నంబర్ 60 వద్ద జరిగిన ఈ విన్యాసాల్లో క్షిపణులు, డ్రోన్లను ఎదుర్కొనే అత్యాధునిక రక్షణ వ్యవస్థ కలిగిన ట్యాంకులను ప్రదర్శించారు.

వారసురాలిగా స్థిరపడిందా?
గత కొన్ని నెలలుగా కిమ్ జోంగ్ ఉన్ తన కుమార్తెను దాదాపు అన్ని కీలక సైనిక కార్యక్రమాలకు వెంటబెట్టుకొని వెళ్తున్నారు. గత వారం కిమ్ కూతురు పిస్టల్‌తో కాల్పులు జరుపుతున్న ఫోటోలు వైరల్ అయ్యాయి. తాజాగా యుద్ధ ట్యాంకు పరీక్షల్లో కిమ్ జు ఏ పాలుపంచుకోవడం చూస్తుంటే.. కిమ్ తన తర్వాతి వారసురాలిగా ఆమెను సిద్ధం చేస్తున్నారని దక్షిణ కొరియా నిఘా వర్గాలు విశ్లేషిస్తున్నాయి.

సైనిక పటిమపై కిమ్ జోంగ్ ఉన్ సంతృప్తి
"మన సైన్యం ధైర్యసాహసాలకు ఈ యుద్ధ ట్యాంకుల కవాతు నిదర్శనం" అని కిమ్ జోంగ్ ఉన్ ఈ సందర్భంగా వ్యాఖ్యానించారు. అమెరికా, దక్షిణ కొరియా సంయుక్తంగా నిర్వహించిన సైనిక విన్యాసాలకు ప్రతిచర్యగా ఉత్తర కొరియా ఈ ప్రదర్శన చేపట్టినట్లు తెలుస్తోంది.

English summary

North Korean leader Kim Jong Un and daughter Ju Ae showcased their military might by testing a new battle tank. Experts believe Ju Ae is being groomed as the next heir.