North Korea: కిమ్ సంచలన నిర్ణయం.. రష్యాకు 30 వేల అదనపు సైనికులు!

North Korea: ఉక్రెయిన్‌పై జరుగుతున్న యుద్ధంలో రష్యాకు భారీ సహాయం చేయాలని ఉత్తర కొరియా నియంత కిమ్ జోంగ్ నిర్ణయించుకున్నారు. సీఎన్ఎన్ నివేదిక ప్రకారం.. రష్యాకు సహాయం చేయడానికి 30 వేల మంది అదనపు సైనికులను పంపాలని ఉత్తర కొరియా నిర్ణయించుకుంది. ఉక్రెయిన్ గూఢచార పత్రాల ఆధారంగా ఈ సైనికులు నవంబర్ నాటికి రష్యాకు చేరుకోవచ్చని సీఎన్ఎన్ తెలిపింది. ఉత్తర కొరియా నుంచి సైనికులను రవాణా చేసేందుకు ఇప్పటికే రష్యా రవాణా విమానాలు సిద్ధమవుతున్నాయని ఉక్రెయిన్ ఇంటెలిజెన్స్ వర్గాలు తెలిపాయి. వీరిని సైబీరియా మీదుగా ఉక్రెయిన్‌లోకి చేర్చనున్నట్లు సమాచారం. భారీ ఎత్తున దాడి సైనిక కార్యకలాపాలతో సహా రష్యన్ దళాలను బలోపేతం చేసేందుకు వీరిని పంపనున్నారు. ఉపగ్రహ చిత్రాలు రష్యా సన్నాహాలకు సంకేతాలను చూపించాయి.

ఉత్తర కొరియా మోహరింపు కోసం గతంలో ఉపయోగించిన నౌకలు రష్యన్ పోర్టులలో కనిపించాయి. ఉత్తర కొరియాలోని ఓ ఎయిర్‌పోర్టులో మాస్కో కార్గో విమానం కనిపించడం అనుమానాలను బలపరుస్తోంది. ఇదిలా ఉండగా.. ఉత్తర కొరియా గత ఏడాది రష్యా తరఫున పోరాడడానికి 11,000 మంది సైనికులను పంపింది. రష్యా అధ్యక్షుడు వ్లాదిమిర్ పుతిన్ ఏప్రిల్‌లో వారి ఉనికిని ధ్రువీకరించారు. ఉక్రెయిన్‌కు వాయు రక్షణ క్షిపణులను పంపడాన్ని ఆపివేయాలని అమెరికా నిర్ణయించిన సమయలో ఈ పరిణామం చోటుచేసుకుంది.

రష్యా-ఉక్రెయిన్ శాంతి చర్చలు
రష్యా, ఉక్రెయిన్ సుదీర్ఘ పోరాటం తర్వాత ఇప్పుడు శాంతి దిశగా అడుగులు వేస్తున్నాయి. రెండు రౌండ్ల చర్చలు దాదాపు విజయవంతమయ్యాయి. ఇప్పుడు క్రెమ్లిన్ రష్యా-ఉక్రెయిన్ చర్చల మూడో రౌండ్ తేదీ త్వరలో ఖరారు కావచ్చని ఆశిస్తోంది. క్రెమ్లిన్ ప్రతినిధి డిమిత్రి పెస్కోవ్ మాట్లాడుతూ.. దీనిపై త్వరలో ఒక అంగీకారం కుదురుతుందని తాము ఆశిస్తున్నామని అన్నారు. చర్చల కార్యక్రమం ఇరుపక్షాల సమ్మతితోనే నిర్ణయించబడుతుందని ఆయన పేర్కొన్నారు. ఇప్పటివరకు ఎటువంటి ఖచ్చితమైన తేదీ నిర్ణయించబడలేదని.. ఈ ప్రక్రియ పరస్పర అంగీకారంపై ఆధారపడి ఉంటుందని పెస్కోవ్ స్పష్టం చేశారు.

ఖైదీల మార్పిడి
రష్యా-ఉక్రెయిన్ మధ్య జరిగిన మొదటి సమావేశంలో ఖైదీల మార్పిడిపై అంగీకారం కుదిరింది. రెండో సమావేశంలో 6000 ఉక్రేనియన్ సైనికుల మృతదేహాలను తిరిగి అప్పగించడం, అనారోగ్యంతో ఉన్న, 25 ఏళ్ల లోపు ఖైదీల మార్పిడిపై అంగీకారం కుదిరింది. మొదటి రౌండ్ చర్చలు మే 16న ఇస్తాంబుల్‌లో జరిగాయి. ఇరు దేశాల మధ్య రెండో రౌండ్ చర్చలు జూన్ 2న టర్కీలో జరిగాయి. గత సమావేశంలో ఉక్రెయిన్ రక్షణ మంత్రి రుస్తుం ఉమెరోవ్ మూడో సమావేశాన్ని జూన్ సమావేశాన్ని జూన్ చివరి వారంలో నిర్వహించాలని ప్రతిపాదించారు. కానీ ఈ చర్చలు జరగలేదు.

అయితే జూన్ 2న కుదిరిన అంగీకారం ఉన్నప్పటికీ క్రెమ్లిన్ కాల్పుల విరమణ కోసం రెండు ప్రతిపాదనలు ఇచ్చిందని రష్యన్ మీడియా నివేదించింది. అందులో ఉక్రేనియన్ సైన్యం నాలుగు ప్రాంతాల(డొనెట్స్క్, లుగాన్స్క్, ఖేర్సన్, జాపోరిజ్జియా) నుంచి వైదొలగాలని డిమాండ్ చేయబడింది. వీటిని రష్యా తన భూభాగంగా భావిస్తోంది. దీనితో పాటు 100 రోజులలోపు ఉక్రెయిన్‌లో అధ్యక్ష ఎన్నికలు నిర్వహించాలనే షరతు విధించబడింది. ఉక్రెయిన్ అధ్యక్షుడు వోలోడిమిర్ జెలెన్స్కీ ఈ డిమాండ్లను శాంతి ఆశయాలకు విరుద్ధంగా పేర్కొన్నారు. జెలెన్స్కీ వైపు నుంచి కొత్త ఆంక్షలు డిమాండ్ చేయబడ్డాయి. ఈ డిమాండ్లు వాస్తవానికి ఉక్రెయిన్ లొంగిపోవడానికి షరతులని, వాటిని తాను అంగీకరించబోనని జెలెన్స్కీ అభిప్రాయపడ్డారు.

English summary

In a shocking decision, North Korea's Kim Jong-un plans to send 30,000 additional troops to aid Russia in the Ukraine war.