అమెరికా, కెనడాలను కుదిపేస్తున్న మంచు తుఫాను, 38 మృతి

By Bbc Telugu

Updated: Monday, December 26, 2022, 17:52 [IST]

వణికిస్తున్న చలి కారణంగా కనీసం అమెరికా, కెనడాలలో 38 మంది మరణించినట్లు అధికారులు ప్రకటించారు.

గత కొద్ది రోజులుగా విపరీతంగా కురుస్తున్న మంచుతోపాటు చలిగాలులకు ఈ రెండు దేశాలు తీవ్రంగా ఇబ్బందులు పడుతున్నాయి.

ఒక్క అమెరికాలోనే 34 మంది మరణించారని అధికారులు తెలిపారు. న్యూయార్క్ రాష్ట్రంలోని బఫెలో నగరం అత్యంత ప్రభావిత ప్రాంతంగా మారింది.

మంచులోనే మరణాలు

కెనడాలోని బ్రిటీష్ కొలంబియా రాష్ట్రానికి చెందిన మెరిట్ పట్టణానికి సమీపంలో మంచుతో నిండిన రహదారిపై బస్సు బోల్తా పడడంతో నలుగురు మరణించారు.

గత కొద్దిరోజులుగా తీవ్రంగా ఉన్న చలి, మంచు కారణంగా విద్యుత్ సంక్షోభం కూడా ఏర్పడింది. అయితే, ఇప్పుడిప్పుడే విద్యుత్‌ను పునరుద్ధరిస్తున్నారు.

అమెరికాలో ఆదివారం మధ్యాహ్నానికి కనీసం 2 లక్షలమంది విద్యుత్ లేక ఇబ్బందులు పడుతూ ఉన్నారని, అయితే అంతకు ముందున్న 17లక్షల నుంచి తగ్గి ఈ స్థాయికి చేరుకుందని అసోసియేటెడ్ ప్రెస్ వెల్లడించింది.

మంచు తీవ్రత కారణంగా వేలాది విమానాలను రద్దు చేశారు. క్రిస్మస్ వేడుకలకు చాలామంది ఇళ్లకు చేరుకోలేకపోయారు.

ఆదివారం నాటికి సుమారు అయిదున్నర కోట్లమంది అమెరికన్లు తీవ్ర చలి హెచ్చరికలను ఎదుర్కోవాల్సి వచ్చింది.

న్యూయార్క్ లోని ఓ రెస్టారెంట్ ను కప్పేసిన మంచు

'ఇంత దారుణమైన చలి ఎప్పుడూ చూడలేదు’

మంచు తుఫాను కారణంగా ఏర్పడిన పరిస్థితులు కనివిని ఎరుగని రీతిలో ఉన్నాయని, ఇవి కెనడా నుంచి దక్షిణాన ఉన్న టెక్సాస్ వరకు విస్తరించినట్లు అధికారులు వెల్లడించారు.

"బాంబు సైక్లోన్"గా చెబుతున్న ఈ శీతాకాలపు తుఫాను- వాతావరణంలో పీడనం తగ్గడంవల్ల ఏర్పడుతుంది. దీని కారణంగా భారీ మంచు కురవడంతోపాటు, చలి గాలులు వీస్తాయి.

ఈ బాంబ్ సైక్లోన్ కారణంగా అమెరికా వ్యాప్తంగా ప్రయాణాలకు అంతరాయం తీవ్ర అంతరాయం కలిగింది.

''ఈ తుఫాన్ బఫెలో నగరానికి అత్యంత వినాశకరంగా మారింది. ఇది చరిత్రలో నిలిచిపోతుంది’’ అని న్యూయార్క్ రాష్ట్ర గవర్నర్ కాథీ హోచుల్ అన్నారు.

ఈ ప్రాంతంలో చనిపోయిన ఏడుగురిలో కొందరు కార్లలో, మరికొందరు మంచు తిన్నెల్లో కనిపించినట్లు ఎరీ కౌంటీ ఎగ్జిక్యూటివ్ మార్క్ పోలోన్‌కార్జ్ తెలిపినట్లు రాయిటర్స్ వార్తా సంస్థ వెల్లడించింది.

ఇంకా బ కార్లలో చిక్కుకున్న అనేకమందిని సిబ్బంది రక్షించినట్లు కూడా పేర్కొంది.

https://twitter.com/Reuters/status/1607168061424943105