వెనిజులా చమురు నౌకను సీజ్ చేసిన అమెరికా.. రంగంలోకి రష్యా..!

జనవరి 3న వెనిజులాపై అమెరికా సైన్యం వైమానిక దాడులను చేపట్టిన విషయం తెలిసిందే. వెనిజులా రాజధాని కరాకస్ లోని ఏడు కీలక ప్రాంతాలపై దాడులకు పాల్పడింది అమెరికాకు చెందిన డెల్టా ఫోర్స్. అనంతరం వెనిజులా అధ్యక్షుడు నికోలస్ మదురో అతని భార్య సిలియా ఫ్లోర్స్ ను కస్టడీలోకి తీసుకుని న్యూయార్క్ కు తరలించింది. అయితే తాజాగా వెనిజులాకు చెందిన చమురు నౌకను అమెరికా స్వాధీనం చేసుకున్నట్లు తెలుస్తోంది. దాదాపు 2 వారాలపాటు ఛేజింగ్ చేసి మరీ చమురు నౌకను తమ అధీనంలోకి తీసుకున్నట్లు సమాచారం.

అమెరికా సైన్యం వెనిజులాపై దాడులు చేపట్టిన తర్వాత వెనిజులాకు చెందిన చమురు నౌక మరినెరా ను అమెరికా బలగాలు స్వాధీనం చేసుకున్నాయి. రష్యా జెండా ఉన్న ఈ నౌక నార్త్ అట్లాంటిక్ సముద్రం గుండా ప్రయాణిస్తున్న క్రమంలో నౌకపై దాదాపు 2 వారాలుగా అమెరికా సైన్యం నిఘా పెట్టింది. ఆ నౌకలో రష్యా సైన్యం ఉన్నట్లు వార్తలు వస్తున్న నేపథ్యంలో అమెరికా ఆ నౌకను తమ అధీనంలోకి తీసుకుంది. ఇదే విషయాన్ని యూఎస్ మిలిటరీస్ యూరోపియన్ కమాండ్ తన అధికారిక ఎక్స్ ఖాతాలో పోస్టు చేసింది. అమెరికా రక్షణ దళానికి చెందిన జస్టిస్ డిపార్ట్ మెంట్ ఈ నౌకను స్వాధీనం చేసుకున్నట్లు తెలిపింది.

ఈ నౌకకు మొదటగా బెల్లా 1 అనే పేరు పెట్టారు. వెనిజులాలోని ఆయిల్ కంపెనీలకు చెందిన నౌక ఇది. అయితే ఈ నౌకను అమెరికా నిషేధించింది. నౌకను స్వాధీనం చేసుకునేందుకు అమెరికన్ కోస్టు గార్డు ప్రయత్నించగా వారి నుంచి తప్పించుకున్న నౌక ఇంటర్నేషనల్ వాటర్ లో ప్రయాణిస్తోంది. ఈ క్రమంలో నౌక పేరును మరినెరా గా మార్చారు. రష్యన్ సంస్థ నుంచి రిజిస్ట్రేషన్ పొంది.. ఆ దేశ జెండాతో ప్రయాణం సాగించింది. అయితే తాజాగా ఈ నౌకను అమెరికా సైన్యం అధీనంలోకి తీసుకోవడంతో రష్యా- అమెరికా మధ్య ఉద్రిక్త పరిస్థితులు ఎదురయ్యే అవకాశం ఉన్నట్లు తెలుస్తోంది.

The @TheJusticeDept & @DHSgov, in coordination with the @DeptofWar today announced the seizure of
the M/V Bella 1 for violations of U.S. sanctions. The vessel was seized in the North Atlantic pursuant to a warrant issued by a U.S. federal court after being tracked by USCGC Munro. pic.twitter.com/bm5KcCK30X

— U.S. European Command (@US_EUCOM) January 7, 2026

మరోవైపు రష్యాకు వెనిజులాతో మంచి సంబంధాలు ఉన్నాయి. రష్యా- వెనిజులా మధ్య ఆర్థిక, రాజకీయ సంబంధాలు ఇటీవలి కాలంలో మరింత బలోపేతం అయ్యాయి. అలాగే వెనిజులాపై అమెరికా విధిస్తున్న ఆంక్షల్ని రష్యా తప్పుబడుతూ వస్తోంది. ఈ క్రమంలో రష్యన్ ఫ్లాగ్ ఉన్న చమురు నౌకను అమెరికా ఆధీనంలోకి తీసుకోవడం ప్రాధాన్యం సంతరించుకుంది. ఇదే విషయంపై రష్యా స్పందించాల్సి ఉంది.