ట్రంప్-పుతిన్ భేటీ తర్వాత జెలెన్స్కీ స్పందన: యుద్ధంపై బిగ్ ట్విస్ట్!
అలస్కాలో అమెరికా అధ్యక్షుడు డొనాల్డ్ ట్రంప్, రష్యా అధ్యక్షుడు వ్లాదిమిర్ పుతిన్ల మధ్య కీలక సమావేశం తర్వాత ఉక్రెయిన్ అధ్యక్షుడు తొలిసారిగా స్పందించారు. ఈ సమావేశం అనంతరం జెలెన్స్కీ డొనాల్డ్ ట్రంప్తో ఫోన్లో మాట్లాడారు. ఈ చర్చల తర్వాత సోమవారం నాడు వాషింగ్టన్లో డొనాల్డ్ ట్రంప్తో సమావేశం కానున్నట్లు జెలెన్స్కీ వెల్లడించారు. ఈ భేటీ ప్రధాన ఉద్దేశం రష్యా-ఉక్రెయిన్ యుద్ధాన్ని ముగించే అవకాశాలపై చర్చించడమేనని తెలుస్తోంది.
జెలెన్స్కీ-ట్రంప్ ఫోన్ సంభాషణ
డొనాల్డ్ ట్రంప్, వ్లాదిమిర్ పుతిన్తో జరిపిన సమావేశంలోని ముఖ్యమైన అంశాలను జెలెన్స్కీకి ఫోన్లో వివరించారు. ఈ చర్చ అనంతరం బ్రిటన్ ప్రధాన మంత్రి కీర్ స్టార్మర్, ఫ్రాన్స్ అధ్యక్షుడు ఇమ్మాన్యుయేల్ మాక్రాన్, జర్మనీ ఛాన్సలర్ ఫ్రెడరిక్ మర్జ్, నాటో సెక్రటరీ జనరల్ మార్క్ రూట్, యూరోపియన్ కమిషన్ చీఫ్ ఉర్సులా వాన్ డెర్ లేయెన్ వంటి యూరోపియన్ నాయకులు కూడా ఈ కాల్లో పాల్గొన్నారు.
యూరోపియన్ దేశాల ఆందోళన
అలస్కా శిఖరాగ్ర సమావేశం గురించి ముందుగా ఎటువంటి సమాచారం ఇవ్వకపోవడంతో యూరోపియన్ దేశాలు ఆందోళన వ్యక్తం చేశాయి. అందుకే తర్వాత వారు ట్రంప్, జెలెన్స్కీలతో విడివిడిగా మాట్లాడారు. తమ ప్రయోజనాలను దెబ్బతీసే విధంగా అమెరికా, రష్యాతో ఒంటరిగా ఒక ఒప్పందాన్ని కుదుర్చుకుంటుందేమోనని యూరోపియన్ యూనియన్ ఆందోళన వ్యక్తం చేస్తోంది.
యుద్దం కొనసాగింపు.. తదుపరి సమావేశం
ట్రంప్-పుతిన్ సమావేశం తర్వాత కూడా, రష్యా రాత్రిపూట 85 డ్రోన్లను, ఒక బాలిస్టిక్ మిస్సైల్ను ప్రయోగించిందని ఉక్రెయిన్ ఆరోపించింది. దీనితో ఉద్రిక్తతలు మళ్లీ పెరిగాయి. ట్రంప్, పుతిన్ల మధ్య జరిగిన చర్చలు సానుకూలంగా ఉన్నప్పటికీ, ఎలాంటి నిర్దిష్ట ఒప్పందాలకు రాలేదు. ట్రంప్ మాట్లాడుతూ "ఇంకా కొన్ని అంశాలపై పని చేయాల్సి ఉంది" అని అన్నారు. దీనికి పుతిన్ బదులిస్తూ "తదుపరి సమావేశం మాస్కోలో" అంటూ నవ్వారు. 2022లో ట్రంప్ అమెరికా అధ్యక్షుడిగా ఉండి ఉంటే బహుశా ఉక్రెయిన్పై దాడి జరిగి ఉండేది కాదని పుతిన్ వ్యాఖ్యానించారు. అంతా ఇప్పుడు వాషింగ్టన్లో జెలెన్స్కీ, ట్రంప్ల మధ్య జరగబోయే సమావేశం వైపు చూస్తున్నారు. ఈ సమావేశం యుద్ధం ముగింపుపై ట్రంప్ ఎంతవరకు చిత్తశుద్ధితో ఉన్నారో తెలుపుతుంది.
Click it and Unblock the Notifications
Sign in with Google