ముదురుతున్న యుద్ధ మేఘాలు: ట్రంప్‌కు సౌదీ అరేబియా బిగ్ షాక్!

ఇరాన్ పై అమెరికా సైనిక దాడి చేసే అవకాశం ఉందన్న వార్తలు ప్రస్తుతం ప్రపంచవ్యాప్తంగా కలకలం రేపుతున్నాయి. అమెరికా అధ్యక్షుడు డొనాల్డ్ ట్రంప్ సోషల్ మీడియా వేదికగా ఇరాన్ నిరసనకారులకు మద్దతుగా "సహాయం వస్తోంది" (Help is on its way) అని చేసిన ప్రకటన, పశ్చిమాసియాలో యుద్ధం తథ్యమనే సంకేతాలను ఇచ్చింది. ఈ పరిణామం పట్ల తీవ్ర ఆందోళన వ్యక్తం చేస్తున్న సౌదీ అరేబియా, ఖతార్, ఒమన్ వంటి గల్ఫ్ దేశాలు అమెరికాను ఈ నిర్ణయం నుంచి విరమింపజేసేందుకు ముమ్మరంగా ప్రయత్నిస్తున్నాయి.

గల్ఫ్ దేశాల దౌత్య పోరాటం
వాల్ స్ట్రీట్ జర్నల్ నివేదిక ప్రకారం.. ఇరాన్‌పై సైనిక చర్యను అడ్డుకునేందుకు సౌదీ అరేబియా ఓ బృహత్తర దౌత్య చొరవను చేపట్టింది. అమెరికా దాడి చేస్తే అది కేవలం ఇరాన్‌కే పరిమితం కాకుండా మొత్తం గల్ఫ్ ప్రాంతాన్ని అస్థిరపరుస్తుందని వైట్ హౌస్‌కు ఈ దేశాలు స్పష్టం చేశాయి. ముఖ్యంగా ప్రాంతీయ భద్రత, ఇంధన సరఫరా, మౌలిక సదుపాయాలపై పడే ప్రతికూల ప్రభావాల గురించి గల్ఫ్ పాలకులు తీవ్రంగా భయపడుతున్నారు.

చమురు సంక్షోభం, ఆర్థిక భయం
ఈ యుద్ధం వల్ల ప్రపంచ ఆర్థిక వ్యవస్థ అతలాకుతలం అవుతుందని గల్ఫ్ దేశాలు హెచ్చరిస్తున్నాయి. ప్రపంచ చమురు రవాణాలో ఐదో వంతు వాటా ఉన్న హార్ముజ్ జలసంధి ద్వారా రవాణా నిలిచిపోతే చమురు ధరలు ఆకాశాన్నంటుతాయని ఆ దేశాలు ఆందోళన చెందుతున్నాయి. సౌదీ అరేబియా తన ప్రతిష్టాత్మక ఆర్థిక సంస్కరణల ప్రాజెక్టు 'విజన్ 2030' దెబ్బతింటుందని భావిస్తుండగా.. ఇతర దేశాలు తమ దేశాల్లోని అంతర్గత శాంతిభద్రతలపై ఆందోళన వ్యక్తం చేస్తున్నాయి.

అమెరికాకు సౌదీ షాక్ - ఆకాశ మార్గం నిరాకరణ
ఈ వివాదంలో సౌదీ అరేబియా అత్యంత కీలక నిర్ణయాన్ని తీసుకుంది. ఇరాన్‌పై దాడులు చేయడానికి అమెరికా తన గగనతలాన్ని ఉపయోగించుకోవడానికి వీల్లేదని కచ్చితంగా చెప్పేసింది. తాము ఈ యుద్ధంలో తటస్థంగా ఉంటామని, అమెరికా నేతృత్వంలోని ఎటువంటి సైనిక చర్యల్లోనూ భాగస్వామ్యం వహించబోమని సౌదీ అరేబియా ఖరాకండిగా ప్రకటించింది. ఈ మేరకు ఇప్పటికే ఇరాన్ రాజధాని టెహ్రాన్‌కు కూడా సౌదీ అధికారులు తమ మద్దతు, తటస్థ వైఖరి గురించి సమాచారం అందించారు.

ప్రస్తుత పరిస్థితి
ఇరాన్‌లో ప్రస్తుతం ప్రభుత్వ వ్యతిరేక నిరసనలు ఉధృతంగా కొనసాగుతున్నాయి. ఈ నిరసనలను అణచివేయడానికి ఇరాన్ ప్రభుత్వం తీసుకున్న చర్యల్లో ఇప్పటికే సుమారు 2,500 మందికి పైగా పౌరులు మరణించినట్లు సమాచారం. ఈ మానవ హక్కుల ఉల్లంఘనను సాకుగా చూపి, ఇరాన్ పాలకులను గద్దె దించడానికి ట్రంప్ ప్రభుత్వం సిద్ధమవుతోంది. అయితే వ్యవస్థను కూల్చివేయడం వల్ల కలిగే పరిణామాలు ఊహాతీతమని గల్ఫ్ దేశాలు హెచ్చరిస్తూనే ఉన్నాయి.

English summary

Tensions escalate as Donald Trump hints at US action against Iran. Saudi Arabia delivers a major shock by denying airspace access, warning of regional instability and oil crisis.