తెలంగాణ మండలి డిప్యూటీ చైర్మన్‌ ఖరారు..!!

తెలంగాణ శాసన మండలి డిప్యూటీ ఛైర్మన్ ను ముఖ్యమంత్రి కేసీఆర్ ఖరారు చేసారు. ఎమ్మెల్సీ బండా ప్రకాశ్ ముదిరాజ్ ను ఎంపిక చేస్తూ నిర్ణయం తీసుకున్నారు. ఈ రోజు (శనివారం) ప్రకాశ్ నామినేషన్ దాఖలు చేయనున్నారు. మండలి డిప్యూటీ చైర్మన్‌గా వ్యవహరించిన ఎమ్మెల్సీ నేతి విద్యాసాగర్‌ పదవీకాలం 2021, జూన్‌ 3న పూర్తయింది. దీంతో అప్పటినుంచి డిప్యూటీ చైర్మన్‌ పదవి ఖాళీగా ఉన్నది. ఈనేపథ్యంలో డిప్యూటీ చైర్మన్‌ ఎన్నికకు శుక్రవారం నోటిఫికేషన్‌ వెలువడింది. నేడు నామినేషన్లను స్వీకరించనున్నారు. 12న ఉదయం 10 గంటలకు శాసన మండలి ప్రారంభమైన అనంతరం డిప్యూటీ చైర్మన్‌ ఎన్నిక ప్రక్రియను పూర్తిచేసి బాధ్యతలు అప్పగించనున్నారు.

వరంగల్ జిల్లాకు చెందిన బండా ప్రకాశ్ 1981 నుంచి రాజకీయంగా యాక్టివ్ గా ఉన్నారు. వరంగల్ మున్సిపల్ కౌన్సిలర్ నుంచి రాజ్యసభ ఎంపీ దాకా పని చేసారు. తెలంగాణ ముదిరాజ్ మహాసభ అధ్యక్షుడిగా వ్యవహరిస్తున్నారు. బండా ప్రకాష్‌ 2018 మార్చిలో బీఆర్‌ఎస్‌ తరఫున రాజ్యసభకు ఎన్నికయ్యారు. అయితే ఎంపీగా ఆరేండ్ల పదవీకాలం పూర్తికాకముందే.. 2021 నవంబర్‌ ఎమ్మెల్యే కోటాలో శాసన మండలికి ఎంపికయ్యారు.

అనంతరం అదేఏడాది డిసెంబర్‌ మొదటివారంలో తన రాజ్యసభ సభ్యత్వానికి రాజీనామా చేశారు. రాజ్యసభ సభ్యుడిగా పలు కమిటీల్లో పని చేసారు. రాజ్యసభలో టిఆర్‌ఎస్ పక్ష ఉపనాయకుడిగా బండ ప్రకాష్‌ వ్యవహరించారు. రాజ్యసభ పదవీ కాలం పూర్తి కాకుండానే రాజీనామా చేయటంతో..ఇప్పుడు ప్రకాశ్ కు మండలి డిప్యూటీ ఛైర్మన్ గా అవకాశం కల్పించినట్లు తెలుస్తోంది.

రాజ్యసభ సభ్యుడిగా రాజీనామా చేసిన తరువాత ప్రకాశ్ కు మంత్రి పదవి ఇస్తారనే ప్రచారం సాగింది. ఈటల రాజేందర్ పార్టీ వీడటంతో..అదే సామాజిక వర్గానికి చెందిన ప్రకాశ్ కు కేబినెట్ లో స్థానం దక్కుతుందని భావించారు. ఇప్పుడు మండలి ఛైర్మన్ గా అవకాశం దక్కింది. ఇక.. మండలిలో చీఫ్ విప్...రెండు విప్ పదవులను భర్తీ చేయాల్సి ఉంది.

ఇందుకోసం రేసులో సీనియర్లు ఉన్నారు. వరంగల్ జిల్లాకు చెందిన బండా ప్రకాశ్ ఇప్పుడు డిప్యూటీ ఛైర్మన్ గా నియామకం కావటంతో..ఆ జిల్లాకు చెందిన సీనియర్లకు ఎటువంటి అవకాశం దక్కుతుందనేది ఆసక్తి కరంగా మారుతోంది. శనివారం ఆయన ఒక్కరే నామినేషన్ దాఖలు చేస్తారని బీఆర్ఎస్ వర్గాలు తెలిపాయి. డిప్యూటీ చైర్మన్ ఎన్నిక ఏకగ్రీవం కావటం ఖాయంగా కనిపిస్తోంది.

English summary

CM KCR Finalised BRS MLC Banda Prakash as the Legilative Council Deputy Chairman.