దేశానికి గర్వకారణంగా తెలుగమ్మాయి: చరిత్ర సృష్టించిన భవిత మండవ!

హైదరాబాద్‌కు చెందిన 25 ఏళ్ల భవిత మండవ చరిత్ర సృష్టించింది. న్యూయార్క్‌లో జరిగిన 'షానెల్ మేటియర్స్ డిఆర్ట్' షోను ప్రారంభించి, అంతర్జాతీయ వేదికపై భారతీయ ప్రాతినిధ్యాన్ని సగర్వంగా నిలబెట్టింది ఈ హైదరాబాద్ అమ్మాయి. ప్రపంచ ప్రఖ్యాత లగ్జరీ హౌస్ అయిన షానెల్ షోను ప్రారంభించిన మొట్టమొదటి ఇండియన్ మోడల్‌గా ఆమె నిలవడం విశేషం. కాఫీ రంగులో ఉన్న సౌకర్యవంతమైన క్వార్టర్-జిప్ స్వెటర్, క్లాసిక్ డెనిమ్ జీన్స్ లో మెరుస్తూ భవిత మండవ చరిత్రలో నిలిచిపోయారు. తెలుగు గడ్డ నుంచి వెళ్లి 25 ఏళ్లకే లగ్జరీ ఫ్యాషన్ హౌస్ అయిన షానెల్ షోను ప్రారంభించిన మొట్టమొదటి ఇండియన్ మోడల్‌గా ఆమె రికార్టు సృష్టించారు. 2018 తర్వాత న్యూయార్క్ నగరంలో షానెల్ ఇంత పెద్ద షోను నిర్వహించడం ఇదే తొలిసారి.

గ్లోబల్ మోడల్‌గా ఎదిగిన భవిత మండవ
మోడలింగ్ ప్రపంచంలోకి అడుగుపెట్టిన చాలా తక్కువ కాలంలోనే ఇంత గొప్ప ఘనతను భవిత మండవ సాధించడం గమనార్హం. లైసెన్స్ పొందిన ఆర్కిటెక్ట్, ప్రొడక్ట్ డిజైనర్ అయిన భవిత మండవ.. ఏడాది క్రితం వరకు అమెరికాలో భారతీయ విద్యార్థిని. సరిగ్గా 2024 అక్టోబర్‌లో న్యూయార్క్ సబ్‌వేలో ఒకరు ఆమెను చూసి మోడలింగ్‌కు ఆహ్వానించారు. భవిత 2025లో న్యూయార్క్ యూనివర్సిటీ నుంచి ఇంటిగ్రేటెడ్ డిజైన్ అండ్ మీడియా, హ్యూమన్-కంప్యూటర్ ఇంటరాక్షన్‌లో మాస్టర్స్ డిగ్రీ పూర్తి చేశారు. ఆమె అంతకుముందు హైదరాబాద్‌లోని జవహర్‌లాల్ నెహ్రూ టెక్నలాజికల్ యూనివర్సిటీ (JNTU)లో ఆర్కిటెక్చర్‌లో బ్యాచిలర్ డిగ్రీ చేశారు. ఎన్.వై.యు (NYU) నుంచి డిగ్రీ పూర్తి చేసిన భవిత, స్థిరమైన టెక్నాలజీ కెరీర్, మోడలింగ్‌లో ఉన్న అనిశ్చితి మధ్య ఎంపికను నిర్ణయించుకోవాల్సిన పరిస్థితి వచ్చింది. ఆ సమయంలో ఆమె తల్లిదండ్రులు ఈ నిర్ణయాన్ని తీసుకోవడానికి సహాయం చేశారు.

మెటియర్స్ డి'ఆర్ట్ అంటే ఏమిటి?
షానెల్ అనే సంస్థ ఏటా నిర్వహించే ఈ ప్రత్యేక షో, చేతిపనుల నైపుణ్యాన్ని, సంప్రదాయాలను ప్రదర్శిస్తుంది. ఈ ప్రతిష్టాత్మక వేదికపై మొదటి స్థానంలో నడవడం ద్వారా భవిత అంతర్జాతీయ ఫ్యాషన్ ఎలైట్‌లో తన స్థానాన్ని సుస్థిరం చేసుకుంది. ఈ షోకు ప్రముఖ డిజైనర్ మాథ్యూ బ్లేజీ నాయకత్వం వహించారు. భవిత మండవ గతంలోనూ మాథ్యూ బ్లేజీతో కలిసి పని చేశారు. అక్టోబర్‌లో పారిస్‌లో జరిగిన బ్లేజీ షానెల్ తొలి షోలో ఆమె నడిచారు. బ్లేజీ బోటెగా వెనెటా బ్రాండ్‌లో ఉన్నప్పుడు కూడా భవిత కలిసి పనిచేశారు.

భవిత భావోద్వేగం
"నేను ఏది చేసినా నా తల్లిదండ్రులు ఎల్లప్పుడూ చాలా మద్దతుగా ఉన్నారు. మోడలింగ్ అంటే ఏంటో మాలో ఎవరికీ సరిగ్గా తెలియకపోయినా, వారు నాకు నిస్సందేహంగా మద్దతు ఇచ్చారు. నా మొదటి షో పూర్తయ్యాక, నేను వెంటనే నాన్నకు ఫోన్ చేశాను. ఆ కొత్త ప్రపంచాన్ని వివరించే ప్రయత్నంలో నేను పూర్తిగా ఆశ్చర్యంలో మునిగిపోయాను. ఆ క్షణం నాకు ఇంకా గుర్తుంది షానెల్ నుంచి ప్రత్యేకమైన కాంట్రాక్ట్ రావడంతో, నేను 'ఎక్కువ రిస్క్ తీసుకుంటే, ఎక్కువ ప్రయోజనం ఉంటుంది' అని అనుకున్నాను," అని ఆమె చెప్పింది. షానెల్ షోకు ముందు మాథ్యూ బ్లేజీ మోడల్స్‌కు చాలా సరళమైన సలహా ఇచ్చారు. "మాథ్యూ ఎప్పుడూ మమ్మల్ని సరదాగా ఉండమని చెబుతారు. మేము నడవడం ప్రారంభించడానికి ముందు మోడల్స్ అందరికీ చెప్పే మాట అది," అని భవిత పేర్కొంది.

అవకాశం తలుపుతట్టిన తీరు
తన కెరీర్ ఊహించని విధంగా ఎలా మొదలైందో భవిత వివరించింది. "నేను అట్లాంటిక్ అవెన్యూలో వెళ్తుంటే ఒక స్కౌట్ నన్ను ఆపాడు. 'మీరు మోడల్ అవ్వాలనుకుంటున్నారా?' అని అడిగాడు. నేను వద్దు అన్నాను. అయితే, నేను తీసుకున్న లోన్ చెల్లించవచ్చని అతను చెప్పాడు. దాంతో నేను, 'సరే, ప్రయత్నిద్దాం' అన్నాను." ఆమె మొదటి పెద్ద అసైన్‌మెంట్ అందరినీ ఆశ్చర్యపరిచింది. "నిజానికి, బాటిగా (Bottega) అంటే ఏమిటో నాకు తెలియదు. నేను మధ్యతరగతి కుటుంబం నుంచి వచ్చాను. ఫ్యాషన్, కౌచర్ ప్రపంచానికి చాలా దూరం. నా క్లాస్‌కి తిరిగి వెళ్ళినప్పుడు, అందరూ 'నువ్వు ఇప్పుడే బాటిగా షోలో నడిచావా?' అని అడిగితేనే అది ఎంత పెద్ద విషయమో నాకు తెలిసింది," అని ఆమె తెలిపింది. షో తర్వాత క్రియేటర్ డైలాన్ కెల్లీ (Dylan Kelly)తో చేసిన వీడియోలో, అతను భవితను 'షానెల్‌ను ప్రారంభించిన మోడల్'గా పరిచయం చేశాడు. దానికి ఆమె చిరునవ్వుతో, "నేను నా మాస్టర్స్ కూడా పూర్తి చేశాను," అని సరదాగా అంది.

భవిత తల్లిదండ్రుల కళ్లలో ఆనంద భాష్పాలు
చారిత్రాత్మకమైన షానెల్ న్యూయార్క్ షో ఓపెనింగ్ తర్వాత, భవిత తన తల్లిదండ్రుల ఆనందాన్ని చూపించే ఒక వీడియోను పంచుకుంది. ఆమె బౌరీ స్టేషన్ మెట్లపై నుండి ర్యాంప్‌పైకి నడుస్తున్నప్పుడు, తల్లిదండ్రులు ఆనందంతో కన్నీళ్లు పెట్టుకుంటూ ఆమెను ఉత్సాహపరిచారు. "ఈ విజయం నాకెంత ముఖ్యమైనదో మాటల్లో చెప్పలేను. షానెల్‌కు ధన్యవాదాలు" అని ఆమె తన ఇన్‌స్టాగ్రామ్ క్యాప్షన్‌లో రాసుకొచ్చారు.

ప్రాతినిధ్యం, స్ఫూర్తి
షానెల్ షోను ప్రారంభించిన తొలి భారతీయ మోడల్‌గా భవిత మండవ నిలవడం అనేది ఫ్యాషన్ చరిత్రలో ఒక మైలురాయి. ఈ ఘనత కేవలం భవిత వ్యక్తిగత విజయం మాత్రమే కాదు, దక్షిణాసియా దేశాల వారికి అంతర్జాతీయ వేదికలపై లభిస్తున్న గుర్తింపునకు నిదర్శనం. భవిత ముఖ్యంగా కాస్టింగ్ డైరెక్టర్ అనితా బిట్టన్‌కు ధన్యవాదాలు చెప్పింది. అనితా బిట్టన్ దశాబ్దాలుగా ఫ్యాషన్ పరిశ్రమలో వైవిధ్యం, సమర్థవంతమైన ప్రాతినిధ్యం కోసం కృషి చేస్తున్నారు. భవిత తన విజయ సందేశంలో చెప్పినట్లుగా, ప్రజలు "ఇది మా వ్యక్తిగత విజయంలా అనిపిస్తోంది, ఈ ప్రాతినిధ్యం మా గాయాలను మాన్పింది" అని చెప్పడం, ఫ్యాషన్ ప్రపంచంలో భిన్నత్వం లేకపోవడం వల్ల చాలా మంది అనుభవించిన అంతరాన్ని భవిత పూరించినట్లు స్పష్టమవుతోంది. ఇది 'కేవలం ఆరంభం' అని భవిత చెప్పిన మాట, రాబోయే తరాల భారతీయ మోడళ్లకు స్ఫూర్తినిస్తుంది.

English summary

Bhavitha Mandava, a 25-year-old from Hyderabad, made history as the first Indian model to open the prestigious Chanel show in New York.