BIO liquor: మద్యం ప్రియులకు తీపి కబురు, సిటీ మార్కెట్లోకి బయో లిక్కర్

హైదరాబాద్: మద్యం ప్రియులకు ఇది ఒక తీపికబురే. ఆరోగ్యానికి ఎటువంటి హానీ చేయనటువంటి బయో లిక్కర్(Bio Liqour) అందుబాటులోకి వచ్చింది. హైదరాబాద్ మార్కెట్లోకి బయో లిక్కర్‌​ని ప్రవేశపెడుతున్నట్టు బయో లిక్కర్స్ అండ్ డిస్టిల్లరీస్ ప్రైవేట్ లిమిటెడ్ ప్రకటించింది. ఈ మేరకు ఓ ప్రైవేటు హోటల్​లో ఏర్పాటు చేసిన కార్యక్రమంలో బయో లిక్కర్స్ వ్యవస్థాపకులు డాక్టర్ బి శ్రీనివాస అమర్నాథ్, పలు బయో లిక్కర్ ఉత్పత్తులను విడుదల చేశారు.

ఈ సందర్భంగా డాక్టర్ శ్రీనివాస అమర్నాథ్ మాట్లాడుతూ.. ప్రపంచంలోనే ఇది మొట్టమొదటి బయో లిక్కర్ అని చెప్పారు. తులసీ, అల్లం, పసుపు, లవంగ, యాలుకలు, కలబంద వంటి ఆయుర్వేద పదార్థాలను కలిపి ఈ లిక్కర్‌​ని తయారు చేస్తున్నట్లు శ్రీనివాస అమర్నాథ్ తెలిపారు. దీనికి యూఎస్​ఎఫ్​డీఏ(US FDA) అనుమతి కూడా లభించినట్లు వెల్లడించారు. బయో విస్కీ, బయో బ్రాందీ, వైల్డ్ పాక్స్ విస్కీని తెలంగాణ రాష్ట్రంలో విక్రయించనున్నట్లు తెలిపారు.

అంతేగాక, ఈ ఉత్పత్తుల్లో ఎటువంటి సింథటిక్ రుచులు, రంగులను ఉపయోగించకుండా ఉత్తమ బొటానికల్స్, హై క్వాలిటీ స్పిరిట్, మాల్ట్, బయో ఆల్కలాయిడ్స్​‌‌తో వీటిని రూపొందించినట్లు తెలిపారు. మద్యపానం చేసే వారి అవయవాలపై చెడు ప్రభావం పడకూడదన్న లక్ష్యంతో వీటిని తయారు చేసినట్లు స్పష్టం చేశారు. అందరికీ ఆరోగ్య కరమైన జీవితం ప్రసాదించేందుకు ఈ ప్రయోగం చేశారమని నిర్వాహకులు చెప్పారు. అయితే, వీటి ధరలు తెలియాల్సి ఉంది.

English summary

BIO India first time launches bio liquor in Hyderabad