అమెరికాలో హైదరాబాద్ విద్యార్థి కిడ్నాప్.. కుటుంబానికి బెదిరింపు కాల్

క్లీవ్‌లాండ్/హైదరాబాద్: అమెరికాలో ఉన్నత చదువుల కోసం వెళ్లిన హైదరాబాద్ నగరానికి చెందిన అబ్దుల్ మహమ్మద్ అనే విద్యార్థి మార్చి 7వ తేదీ నుంచి అదృశ్యమయ్యాడు. అతడు క్లీవ్‌ల్యాండ్ విశ్వవిద్యాలయంలో ఐటీ మాస్టర్స్ డిగ్రీ అభ్యసిస్తున్నాడు. అయితే, తమకు గుర్తు తెలియని వ్యక్తుల నుంచి బెదిరింపు కాల్ వచ్చిందని అబ్దుల్ తండ్రి మహమ్మద్ సలీం తెలిపారు.

అబ్దుల్‌ను కిడ్నాప్ చేశామని, 1200 డాలర్లు చెల్లించాలని వారు డిమాండ్ చేస్తున్నారని.. లేనిపక్షంలో తమ కుమారుడి కిడ్నీ విక్రయిస్తామని హెచ్చరించినట్లు తెలిపారు. తాము అందుకు అంగీకరించి.. అబ్దుల్ వాళ్ల ఆధీనంలోనే ఉన్నట్లు ఆధారాలు చూపమని కోరామన్నారు. అయితే, దీనికి కిడ్నాపర్లు తీవ్ర ఆగ్రహం వ్యక్తం చేసి.. ఫోన్ పెట్టేశారని, మళ్లీ కాల్ చేయలేదని తెలిపారు.

అయితే, కిడ్నాపర్ మాట్లాడటానికి ముందు ఫోన్లో ఏడుపు వినిపించిందని అబ్దుల్ తండ్రి చెప్పారు. తమకు బెదిరింపు కాల్ వచ్చిన నెంబర్‌ను అమెరికాలోని తమ బంధువులకు పంపి.. క్లీవ్ ల్యాండ్ పోలీసులకు అందజేయాలని చెప్పినట్లు ఆయన తెలిపారు. కాగా, అబ్దుల్ అదృశ్యమైన విషయంపై అతడి బంధువులు మార్చి 8వ తేదీనే క్లీవ్ ల్యాండ్ పోలీసులకు ఫిర్యాదు చేశారు. దీంతో వారు ఒక లుకౌట్ నోటీసు జారీ చేశారు.

మరోవైపు, అబ్దుల్ కుటుంబసభ్యులు 18వ తేదీన చికాగోలోని భారత దౌత్య కార్యాయాన్ని సంప్రదించారు. తమ కుమారుడి ఆచూకీ కనుగొనడంలో సాయం చేయాలని కోరారు. ఈ ఘటనపై క్లీవ్ ల్యాండ్ పోలీసులు దర్యాప్తు చేస్తున్నారు. తన కుమారుడితో చివరిసారిగా మార్చి 7వ తేదీన మాట్లాడినట్లు ఓ పత్రికతో అబ్దుల్ తల్లి తెలిపారు.

ఇది ఇలావుండగా, ఇటీవల అమెరికాలోని చికాగోలో హైదరాబాద్ కు చెందిన విద్యార్థి సయ్యద్ మజాహిర్ అలీపై గుర్తు తెలియని దుండగులు దాడి చేసిన విషయం తెలిసిందే. సయ్యద్ ఇండియానా వెస్లయన్ విశ్వవిద్యాలయంలో చదువుతున్నాడు. అక్కడ భారత దౌత్య కార్యాలయం అతడికి అవసరమైన అందించింది.

English summary

Hyderabad student missing in America, threatening calls to his parents.