మీ ఏడుపే మా ఎదుగుదల.. కాళేశ్వరంపై ఆలోచింపజేసే పోస్ట్ పెట్టిన కేటీఆర్

తెలంగాణ మాజీ మంత్రి కేటీఆర్ కాళేశ్వరం ప్రాజెక్టు పై సుదీర్ఘమైన పోస్ట్ పెట్టారు. దగా పడ్డ తెలంగాణ నేల దశాబ్దాలుగా జరిపిన గోదావరి జలాల సాధన పోరాటాలకు సమాధానం కాళేశ్వరం అంటూ సామాజిక మాధ్యమంలో ఆయన ఆసక్తికర పోస్ట్ పెట్టారు. తెలంగాణ రాష్ట్రంలో వర్షాలు లేక, సాగునీరు అందక రైతులు పడుతున్న అవస్థలను సోషల్ మీడియా వేదికగా చెబుతున్న కేటీఆర్ తెలంగాణా రైతాంగానికి కాళేశ్వరం ఒక వరం అన్నారు.

వంకర బుద్ధిగాళ్లకు ఈర్ష్య అసూయ పుట్టించిన కాళేశ్వరం
కాళేశ్వరాన్ని కుట్రలతో నాశనం చేస్తున్నారని చెప్పే ప్రయత్నం చేశారు. కాళేశ్వరం ప్రాజెక్టు గురించి కేటీఆర్ పెట్టిన పోస్ట్ ప్రస్తుతం ఆసక్తికరంగా మారింది. మా కరువులకు, కన్నీళ్ళకు శాశ్వత పరిష్కారం కాళేశ్వరం అంటూ పేర్కొన్న ఆయన తెలంగాణ తెర్లిపోతే సంకలు గుద్దుకుందామని చూసిన వంకర బుద్ధిగాళ్లకు ఈర్ష్య అసూయ పుట్టించి కన్ను కుట్టించిన మా వరప్రదాయని కాళేశ్వరం అంటూ తెలిపారు.

శ్రీరాంసాగర్ కు పునరుజ్జీవనం
సముద్ర మట్టానికి ఎత్తున ఉన్న మా చేను, చెలకలు నదీ జనాలతో తడవాలంటే ఎత్తిపోతలే శరణ్యమని పేర్కొన్నారు. తలాపున గోదారి గలగల పారుతున్న తనువంతా ఎడారై ఎండిన శాపానికి విమోచనం కాళేశ్వరం అని వెల్లడించారు. శిధిల శివాలయం గా పాడుబడిపోయిన శ్రీరాంసాగర్ కు పునరుజ్జీవనం ఇచ్చిన పుణ్య వరం కాళేశ్వరమని కొనియాడారు.

నిజాంసాగర్ నిండు కుండలా మార్చిన కాళేశ్వరం
నీళ్లు రాక ఒట్టిపోయిన నిజాంసాగర్ ను నిండుకుండగా మార్చిన అండదండ కాళేశ్వరం అని తేల్చి చెప్పారు. మండుటెండల్లో చెరువులను మత్తళ్ళు దూకించిన మహత్యం కాళేశ్వరం కు ఉందని, మా తపనకు, ఆలోచనకు, అన్వేషణకు, జలదౌత్యానికి నిదర్శనం కాళేశ్వరం అంటూ పేర్కొన్నారు.

మా కరువులకు కన్నీళ్ల కు
శాశ్వత పరిష్కారం కాళేశ్వరం.!

తెలంగాణ తెర్లై పోతే సంకలు
గుద్దుకుందామని చూసిన వంకరబుద్ధిగాళ్లకు
ఈర్ష్య అసూయ పుట్టించి.. కన్నుకుట్టించిన
మా వరప్రదాయిని కాళేశ్వరం!

తలాపున గోదారి గలగల పారుతున్న
తనువంతా ఎడారై ఎండిన శాపానికి
విమోచనం కాళేశ్వరం!

సముద్ర…

— KTR (@KTRBRS) July 2, 2024

మీ ఏడుపే మా ఎదుగుదల
కాళేశ్వరం అంటే ఒక బారేజ్ కాదని తెలియని మీ అజ్ఞానం అంటూ కాంగ్రెస్ పార్టీని పరోక్షంగా దెప్పిపొడిచారు. ఎక్కడో ఒక లోపం సహజం సరిదిద్దుకోగలం అని ఆయన పేర్కొన్నారు. రాజకీయ కుళ్ళు. కుతంత్రాలను దిష్టిచూపులను తట్టుకోగలమని, మీ ఏడుపే మా ఎదుగుదల అంటూ కాళేశ్వరం ప్రాజెక్టు గురించి బీఆర్ఎస్ వర్కింగ్ ప్రెసిడెంట్, ఎమ్మెల్యే కేటీఆర్ పోస్ట్ పెట్టారు. కాళేశ్వరం గొప్పతనం చెప్పటం ద్వారా ప్రజలలోనూ ఆలోచన రేకెత్తించే ప్లాన్ చేశారు.

English summary

Ex minister KTR interesting post on Kaleshwaram project. in this post KTR said that about how kaleshwaram benefits telangana and how it protected telangana with water sources. KTR indirectly targeted congress govt.