మేడారం జాతరలో దుమ్ము రేపుతున్న సీతక్క డ్యాన్స్.. వైరల్ వీడియో!

ప్రపంచ ప్రఖ్యాతిగాంచిన గిరిజన కుంభమేళా మేడారం సమ్మక్క సారలమ్మ జాతర. ఈసారి మేడారం జాతర మంత్రి సీతక్క పూర్తిగా తన భుజస్కంధాలపై వేసుకుని నడిపిస్తున్నారు. కోట్లాదిమంది భక్తులు తరలివచ్చే ఈ జాతరలో ఎటువంటి అవాంఛనీయ సంఘటనలు జరగకుండా పక్కా ప్రణాళికతో మంత్రి సీతక్క ఆదేశాలతో అధికారులు పనిచేస్తున్నారు.

మేడారం జాతర కోసం సీతక్క శ్రమ

జాతరకు నెల రోజుల ముందు నుండి మేడారం లోనే ఉండి పనులను పరిశీలించిన, పర్యవేక్షించిన సీతక్క ఈ జాతరను సక్సెస్ చేయడం కోసం అహర్నిశలు శ్రమిస్తున్నారు. ప్రపంచ దేశాలను దృష్టిని ఆకర్షించడం కోసం కూడా సీతక్క తన వంతుగా శ్రమిస్తున్నారు. ఈ క్రమంలోనే ఇటీవల న్యూజిలాండ్ దేశ మావోరి తెగకు చెందిన గిరిజనులను మేడారం జాతరకు ఆహ్వానించారు. వారు తమ ట్రైబల్ డాన్సులతో సమ్మక్క సారలమ్మలను దర్శించుకున్నారు.

సారలమ్మ గుడి వద్ద సీతక్క డ్యాన్స్

ఈ సమయంలో వారితో కలిసి డాన్స్ చేసిన సీతక్క, నిన్న రాత్రి సారలమ్మను గద్దెకు తీసుకొస్తున్న క్రమంలో కూడా సీతక్క పోలీస్ అధికారులతో కలిసి డాన్స్ చేశారు. సారలమ్మను గద్దెపైకి స్వాగతించటానికి కన్నెపల్లిలోని సారలమ్మ గుడికి వెళ్ళిన మంత్రి సీతక్క అమ్మవారి పవిత్ర సన్నిధిలో పోలీసులు, ఆదివాసి గిరిజనులతో కలిసి డాన్స్ చేసిన వీడియో ప్రస్తుతం సోషల్ మీడియాలో వైరల్ అవుతుంది.

సమ్మక్క, సారలమ్మలపై సీతక్క భక్తి

సమ్మక్క సారలమ్మల జాతర గిరిజనుల ఆత్మగౌరవానికి ప్రతీక అని, ఒక ఆదివాసి స్త్రీగా తను సమ్మక్క సారలమ్మల జాతరను ఇంత ప్రత్యేకంగా నిర్వహించుకునే అదృష్టం దక్కించుకున్నారని సీతక్క సంతోషం వ్యక్తం చేసిన సందర్భాలు ఉన్నాయి. సమ్మక్క సారలమ్మ జాతరను ఒక పండుగగా కాకుండా గిరిజన సంస్కృతి సంప్రదాయాలకు నిలువెత్తు నిదర్శనంగా ప్రభుత్వం చూస్తోందని అనేకమార్లు స్పష్టం చేశారు.

సోషల్ మీడియాలో సీతక్క పాట, డ్యాన్స్ వైరల్

మొత్తంగా మేడారం జాతరను ఘనంగా నిర్వహించాలని ప్రయత్నం చేస్తున్న మంత్రి సీతక్క జాతర వేళ చేస్తున్న హంగామా సోషల్ మీడియాలో వైరల్ అవుతుంది. ఒకపక్క మేడారం జాతర పాటలతో హోరెత్తిస్తున్న మంత్రి సీతక్క ఇంకో వైపు గిరిజన నృత్యాలతోనూ హల్చల్ చేస్తూ జాతరలో అందరి దృష్టిని ఆకర్షిస్తున్నారు.

English summary

minister seethakka tribal dance near saralamma temple in kannepalli went viral. in medaram jathara minister seethakka playing a key role and focusing the tribal festival to run in a great manner.