మేడారం జాతరకు కేంద్ర మంత్రులు.. వారిముందు మంత్రుల కీలక డిమాండ్!

ఆసియా ఖండంలోనే అతిపెద్ద జాతర ఆయన మేడారం సమ్మక్క సారలమ్మ జాతర కొనసాగుతోంది. కోట్లాదిమంది భక్తులు అమ్మవార్లను దర్శించుకుని మొక్కులు చెల్లించుకుంటున్నారు. ఇక మేడారం జాతర కొనసాగుతున్న వేళ రాష్ట్ర, కేంద్ర మంత్రులు అమ్మవార్లను దర్శించుకుంటున్నారు. నేడు కేంద్ర గిరిజన వ్యవహారాల శాఖ మంత్రి జువల్ ఓరం, కేంద్ర మంత్రి కిషన్ రెడ్డి నిలువెత్తు బంగారాన్ని నివేదించి, అమ్మవార్లను దర్శించుకుని మొక్కులు చెల్లించుకున్నారు.

మేడారం జాతరకు కేంద్ర నిధులు

రాష్ట్ర మంత్రులు సీతక్క, పొంగులేటి శ్రీనివాసరెడ్డి, అడ్లూరి లక్ష్మణ్ తదితరులు కేంద్ర మంత్రులను, గిరిజన సంప్రదాయాలతో స్వాగతించారు. ఈ సందర్భంగా మీడియా సమావేశంలో మాట్లాడిన కేంద్ర మంత్రి కిషన్ రెడ్డి మేడారం జాతర అభివృద్ధికి కేంద్ర ప్రభుత్వం కృషి చేస్తుందని వెల్లడించారు. ఈసారి జాతరకు కేంద్ర ప్రభుత్వం ప్రత్యేక నిధులు కేటాయించిందని కిషన్ రెడ్డి అన్నారు.

మేడారంలో ట్రైబల్ యూనివర్సిటీపై కిషన్ రెడ్డి

ఉభయ తెలుగు రాష్ట్రాలలో రామప్పకు మొట్టమొదటి యునెస్కో గుర్తింపు వచ్చేలా మోడీ ప్రభుత్వం కృషి చేసిందని ఆయన అన్నారు. మేడారం జాతర కోసం భారీగా నిధులు వెచ్చించి రాష్ట్ర ప్రభుత్వం నిర్మాణాలు చేయడం హర్షించదగ్గ విషయమన్నారు. రాష్ట్ర ప్రభుత్వాన్ని కేంద్ర ప్రభుత్వం తరఫున అభినందిస్తున్నామని కేంద్రమంత్రి కిషన్ రెడ్డి పేర్కొన్నారు.మేడారంలో ట్రైబల్ యూనివర్సిటీ ఏర్పాటు చేస్తే గిరిజన యువత అభివృద్ధికి మరింత దోహదం చేస్తుందని కిషన్ రెడ్డి అన్నారు.

కేంద్ర మంత్రులకు మంత్రుల విజ్ఞప్తి

మేడారం జాతరకు జాతీయ హోదా ఇవ్వాలని రాష్ట్ర ప్రభుత్వం తరఫున కేంద్ర మంత్రులకు మంత్రులు సీతక్క, పొంగులేటి శ్రీనివాస్ రెడ్డి, అడ్లూరి లక్ష్మణ్ వినతిపత్రం ఇచ్చారు. దేశంలోనే ఈ తరహా జాతర ఎక్కడా లేదని, కోట్లాదిగా భక్తులు తరలివచ్చే ఈ జాతరను అరుదైన జాతరగా గుర్తించి జాతీయ హోదా ఇవ్వాల్సిన అవసరం ఉందని మంత్రులు కేంద్ర మంత్రులకు తెలియజేశారు.

మేడారం జాతరకు జాతీయ హోదా వస్తే అభివృద్ధి

మేడారం జాతరకు జాతీయ హోదా వస్తే ఈ ప్రాంతం అభివృద్ధి చెందుతుందని, ఇక్కడ గిరిజన యువతకు ఉద్యోగాలు వస్తాయని, ఉపాధి కలుగుతుందని వారు అభిప్రాయం వ్యక్తం చేశారు. జాతీయ హోదా ఇవ్వడం వల్ల ప్రపంచంలో దృష్టి మేడారం పైన పడుతుందని, విస్తృతమైన ప్రచారం లభిస్తుందని వారన్నారు.

English summary

medaram jathara.. ministers seethakka, ponguleti requested union ministers for medaram national status. today union ministers visited