మృతదేహాలనే మార్చేసిన ఎంజీఎం మార్చురీ సిబ్బంది నిర్వాకం

వరంగల్: వరంగల్ ఎంజీఎం ఆస్పత్రి మార్చురీ విభాగంలో సిబ్బంది నిర్లక్ష్యం కారణంగా ఊహించని ఘటన చోటుచేసుకుంది. రెండు మృతదేహాలను తారుమారు చేసి వారి కుటుంబ సభ్యులకు ఇచ్చి పంపించిన ఘటన స్థానికంగా చర్చనీయాంశమైంది. వరంగల్ ఎంజీఎం మార్చురీలో రెండు మృత దేహాలకు పోస్టుమార్టం నిర్వహించిన వైద్యులు ఆపై కట్లు కట్టి మృతదేహాలను కుటుంబ సభ్యులకు అప్పగించారు. తీరా ఇంటికి వెళ్లిన తర్వాత కట్లు విప్పి చూసిన కుటుంబ సభ్యులు ఒక్కసారిగా షాక్ అయ్యారు. ఆసుపత్రి మార్చురీ సిబ్బంది తమకు ఇచ్చిన మృతదేహం తమ వారిది కాకపోవడంతో తీవ్ర ఆగ్రహానికి గురయ్యారు. ఈ ఘటన వివరాల్లోకి వెళితే

స్టేషన్ ఘనపూర్ మండలం తానేదార్ పల్లికి చెందిన రాగుల రమేష్ కుటుంబ కలహాలతో పురుగుల మందు తాగి ఎంజీఎం ఆసుపత్రిలో చికిత్స పొందుతూ మృతి చెందాడు. దీంతో వైద్యులు అతని మృతదేహాన్ని పోస్టుమార్టం నిమిత్తం ఎంజీఎం మార్చురీ తరలించారు. ఇదే క్రమంలో భీమదేవరపల్లి మండలం వంగర గ్రామానికి చెందిన ఆషాడపు పరమేష్ నాలుగు రోజుల క్రితం రోడ్డు ప్రమాదంలో తీవ్ర గాయాలు కాగా, ఎంజీఎం ఆస్పత్రిలో చికిత్స పొందుతూ మరణించాడు. ఇతని మృతదేహాన్ని సైతం పోస్టుమార్టం నిమిత్తం ఎంజిఎం మార్చురీకి తరలించారు.

ఇరువురి మృతి దేహాలకు పోస్టుమార్టం నిర్వహించిన వైద్యులు పూర్తిస్థాయిలో మృతదేహాలకు కట్లు కట్టి కుటుంబ సభ్యులకు అప్పగించారు. ఇక మృతదేహాలను తీసుకొని ఇళ్లకు వెళ్లిన సదరు బాధిత కుటుంబాలు రోధిస్తున్న క్రమంలో మృతదేహాల కట్లు విప్పి చూడగా తమ వారి మృతదేహం కాకుండా వేరొకరి మృత దేహం ఉండడంతో ఒక్కసారిగా ఖంగుతిన్నారు. వెంటనే స్థానిక పోలీసులను సంప్రదించి మృతదేహాలను మళ్లీ ఎంజీఎం ఆసుపత్రికి తీసుకువెళ్లారు.

తీవ్ర ఆగ్రహానికి లోనైన వారు ఎంజీఎం మార్చురీ సిబ్బందితో వాగ్వాదానికి దిగారు. కొద్దిసేపు సిబ్బంది నిర్వాకంపై ఆందోళన వ్యక్తం చేశారు. దీంతో అక్కడికి చేరుకున్న పోలీసులు తారుమారైన మృతదేహాలను మళ్లీ ఎవరివి వారికి అప్పగించి వారిని అక్కడనుండి పంపేశారు. ఇక ఈ ఘటనపై ఎంజీఎం పరిపాలనాధికారులు విచారణ జరిపి చర్యలు తీసుకుంటామని పేర్కొన్నారు.

English summary

The MGM mortuary staff changed the dead bodies with negligence. After two dead bodies were postmortem and given to the family members, the dead bodies were brought back to MGM after they went home and found that they were not theirs.