స్ట్రీట్‌ఫైటరా.. రియల్ ఫైటర్ కావాలా - ఈటల సంచలనం..!!

తెలంగాణలో బీజేపీ కీలక అడుగులు వేస్తోంది. తాజాగా జరిగిన పార్లమెంట్ ఎన్నికల్లో ఎనిమిది స్థానాలు గెలుచుకుంది. వచ్చే స్థానిక సంస్థలు..అసెంబ్లీ ఎన్నికల కోసం కొత్త వ్యూహాలతో ముందుకు వెళ్తోంది. ఇందులో భాగంగా బీజేపీ రాష్ట్ర అధ్యక్ష బాధ్యతల పై చర్చ జరుగుతోంది. ఇదే అంశం పైన బీజేపీ నేత రాజాసింగ్ కీలక వ్యాఖ్యలు చేసారు. దీనికి ప్రతిస్పందనగా ఎంపీ ఈటల రాజేందర్ చేసిన సంచలన వ్యాఖ్యలు వైరల్ అవుతున్నాయి.

బీజేపీ రాష్ట్ర అధ్యక్షుడిగా అవకాశం ఎవరికి దక్కుతుందనేది ఇప్పుడు పార్టీలో చర్చగా మారింది. ఈ అంశం పైన ఎవరి వాదన వారు వినిపిస్తున్నారు. ఈ క్రమంలోనే దేశభక్తి, పార్టీ భక్తి, దైవభక్తి ఉన్నవాళ్లనే అధ్యక్షుడిగా నియమించాలన్న రాజాసింగ్‌ వ్యాఖ్యలు పార్టీలో చర్చకు దారితీసింది. ఇదే సమయంలో పార్టీ రాష్ట్ర అధ్యక్ష రేసులో ఎంపీలు డీకే అరుణ, అరవింద్, రఘునందన్‌, ఎమ్మెల్యే పాయల్‌ శంకర్‌తో పాటు పార్టీ సీనియర్ నేతలు చింతల రాంచంద్రారెడ్డి, మురళీధర్ రావు, పేరాల చంద్రశేఖర్, ఆచారి లాంటివారి పేర్లు సైతం వినపడుతున్నాయి.

రాజాసింగ్ వ్యాఖ్యల పైన ఎంపీ ఈటల స్పందించారు. ఫైటర్ కావాలి.. స్ట్రీట్‌ఫైటరా.. రియల్ ఫైటరా.. ఐదుగురు ముఖ్యమంత్రులతో కొట్లాడా.. అంటూ మల్కాజ్ గిరి బీజేపీ ఎంపీ ఈటల రాజేందర్‌ తనదైన శైలిలో కీలక వ్యాఖ్యలు చేశారు. పార్టీ అధ్యక్షుడిగా ఫైటర్ కావాలంటున్నారన్న ఈటల.. ఎలాంటి ఫైటర్ కావాలని ప్రశ్నించారు. తాను ఐదుగురు ముఖ్యమంత్రులతో కొట్లాడానని తెలిపారు. సందర్భం వచ్చినప్పుడు కుంభస్థలాన్ని కొట్టే దమ్మున్నోడు కావాలని.. గల్లీల్లో కొట్లాడేవాళ్లు కాదని అన్నారు. దీంతో..ఇప్పుడు తెలంగాణ బీజేపీ పగ్గాలు ఎవరికి చిక్కుతాయనేది రాజకీయంగా ఆసక్తిని పెంచుతోంది.

English summary

BJP MP Etala Rajender made interesting comments over party state presidnet post.