మన కన్నా ఈ కుక్క జీవితం రాయల్ గా ఉంది!

సాధారణంగా ఉద్యోగులు పదవీ విరమణ చేసినప్పుడు వారు చేసిన సేవలకు గుర్తింపుగా పదవీ విరమణ కార్యక్రమాన్ని నిర్వహించి వారు చేసిన సేవలను గుర్తు చేసుకుంటాం. అందరూ కలిసి సత్కారాలను కూడా చేస్తూ ఉంటాం. ఇలా చేయడం ఎప్పటి నుంచో వస్తున్న ఆనవాయితీ. అయితే మనుషులకే కాదు కుక్కలకు కూడా సన్మానాలు జరుగుతుంటాయి. ఈ విషయం మీకు తెలుసా..

పోలీసు జాగిలానికి కూడా ఘనంగా పదవీ విరమణ
పోలీస్ శాఖలో పనిచేసే పోలీసులకు మాత్రమే కాదు, పోలీస్ శాఖలో కీలకంగా పనిచేసే రిటైర్ అయిన పోలీసు జాగిలాలకు కూడా ఘనంగా పదవీ విరమణ కార్యక్రమాన్ని నిర్వహిస్తారు. పోలీస్ శాఖలో ట్రైనింగ్ ఇచ్చిన తర్వాత ఆ జాగిలం నేర నియంత్రణలో కీలక భూమిక పోషిస్తూ శాంతిభద్రతల పరిరక్షణలో తన సేవలను అందిస్తుంది. అటువంటి జాగిలం పదవీ విరమణ చేస్తే దానికి అందించే గౌరవమే వేరు.

బ్రోనోకు శాలువా కప్పి పూలదండ వేసి సన్మానం
తాజాగా వరంగల్ పోలీస్ కమిషనరేట్ లో 12 వసంతాలు సేవలందించిన పోలీస్ జాగిలం బ్రోనోకు పోలీస్ అధికారులు పదవీ విరమణ కార్యక్రమాన్ని నిర్వహించారు. ఈ సందర్బంగా వరంగల్ పోలీస్ కమిషనర్ సుధీర్ఘ కాలంగా సేవలందించిన బ్రోనో ను ఘనంగా సత్కరించారు. బ్రోనోకు శాలువా కప్పి పూలదండ వేసి ఘనంగా సన్మానం చేశారు.

15 కేసుల నిందితులను గుర్తించటంలో కీలకంగా పోలీస్ జాగిలం
ట్రాకర్ జాగిలంగా గుర్తించబడిన బ్రోనో పోలీస్ శాఖలో చేరిన నాటి నుండి 15 కేసుల నిందితులను గుర్తించడంతో పాటు జాతీయ పోలీస్ డ్యూటీ మీట్లలో బ్రోనో పలు పతకాలను సాధించింది. ప్రస్తుతం దీని శిక్షకుడిగా హెడ్ కానిస్టేబుల్ ఆనంద్ వ్యవహరించారు.సుదీర్ఘకాలం వరంగల్ పోలీస్ కమిషనరేట్ లో సేవలందించిన బ్రోనోను ఉద్దేశించి మాట్లాడిన వరంగల్ పోలీస్ కమిషనర్ సన్ ప్రీత్ సింగ్ పోలీస్ శాఖలో జాగిల విభాగం చాలా కీలకమైందిగా పేర్కొన్నారు.

కేసులను ఛేదించడంలో పోలీసు జాగిలాల పాత్ర
నేరస్తులను పట్టుకోవడంతో పాటు, పేలుడు పదార్థాలను, మత్తుపదార్థాలను గుర్తించడంలో పోలీస్ జాగిలాలు కీలక భూమిక పోషిస్తున్నాయని ఆయన అన్నారు. వరంగల్ పోలీస్ కమిషనరేట్ లో అనేక కేసులను ఛేదించడంలో పోలీసు జాగిలాల పాత్ర ఎంతో ఉందని, ప్రస్తుతం పదవి విరమణ పొందిన బ్రోనో పోలీసు శాఖలో ఎన్నో గుర్తించదగిన సేవలను అందించిందని అన్నారు.

English summary

A grand retirement ceremony is also held for retired police dog who work in key roles in the police department. The Warangal Police Commissioner felicitated Brono a police dog, who has served for a long time.