పండుగ ప్రత్యేక బస్సుల్లో మహిళల ఉచిత ప్రయాణం పై తేల్చేసిన RTC..!!

తెలుగు రాష్ట్రాల్లో సంక్రాంతి సందడి మొదలైంది. రేపటి నుంచి సెలవులు ప్రారంభం కానుండటం తో ఇక సొంత ఊర్లకు వెళ్లే వారు సిద్దం అవుతున్నారు. అటు ప్రయాణీకుల కోసం రైల్వే.. ఆర్టీసీ ప్రత్యేక సర్వీసులను సిద్దం చేసింది. తెలంగాణ ఆర్టీసీ పండుగ కోసం ప్రత్యేకంగా 6,431 సర్వీసు లను నడపాలని నిర్ణయించింది. అదే సమయంలో అదనపు ఛార్జీలను ప్రకటించింది. కాగా, ఈ స్పెషల్ బస్సుల్లో మహాలక్ష్మీ పథకం కింద మహిళలకు ఉచిత ప్రయాణం అమలు పైనా ఆర్టీసీ అధికారులు స్పష్టత ఇచ్చారు.

తెలంగాణ ఆర్టీసీ సంక్రాంతి వేళ వరుస నిర్ణయాలు తీసుకుంటోంది. సంక్రాంతి రద్దీకి అనుగుణం గా రాష్ట్రంలోని పలు ప్రాంతాలతో పాటుగా ఏపీకి పెద్ద మొత్తంలో స్పెషల్ బస్సులను కేటాయిస్తూ షెడ్యూల్ ఖరారు చేసింది. చెన్నై, బెంగళూరుకు ప్రత్యేక బస్సులను కేటాయించింది. పండుగ వేళ 6,431 ప్రత్యేక బస్సులను నడపాలని నిర్ణయించింది. ఈ నెల 9, 10, 12, 13 తేదీల్లో ప్రయాణికుల రద్దీ ఎక్కువగా ఉండే అవకాశం ఉండడంతో దానికి అనుగుణంగా బస్సులను సిద్దం చేసింది.

డిమాండ్ కు అనుగుణంగా రూట్లను ఖరారు చేయనుంది. అదే విధంగా ఈ నెల 18, 19 తేదీల్లో తిరుగు ప్రయాణ రద్దీకి సంబంధించి తగిన ఏర్పాట్లు చేసింది. హైదరాబాద్‌లో రద్దీ ప్రాంతాలైన ఎంజీబీఎస్, జేబీఎస్, ఉప్పల్ క్రాస్ రోడ్స్, ఆరాంఘర్, ఎల్బీనగర్ క్రాస్ రోడ్స్, కేపీహెచ్‌బీ, బోయినపల్లి , గచ్చిబౌలి తదితర ప్రాంతాల నుంచి ప్రత్యేక బస్సులను సంస్థ నడుపుతోంది. ప్రయాణీకుల కోసం ఈ ప్రాంతాల్లో ప్రత్యేక ఏర్పాట్లును చేస్తోంది.

కాగా, ప్రత్యేక బస్సుల నిర్వహణలో భాగంగా అదనపు ఛార్జీలను వసూలు చేస్తోంది. తెలంగాణతో పాటు ఇతర రాష్ట్రాలకు తిరిగే స్పెషల్ బస్సులకు మాత్రమే సవరించిన చార్జీలు వర్తిస్తాయని సంస్థ వెల్లడించింది. ఈ నెల 9, 10, 12,13 తేదీలతో పాటు తిరుగు ప్రయాణ రద్దీ ఎక్కువగా ఉండే 18, 19 తేదీల్లో మాత్రమే సవరించిన ఛార్జీలు అమల్లో ఉంటాయని, స్పెషల్ బస్సులు మినహా రెగ్యులర్ బస్సుల్లో సాధారణ ఛార్జీలే అమల్లో ఉంటాయని వెల్లడించింది.

అదే సమయం లో మహాలక్ష్మి పథకంలో భాగంగా సంక్రాంతికి నడిపే పల్లె వెలుగు, ఎక్స్ ప్రెస్, సిటీ ఆర్డినరి, మెట్రో ఎక్స్ ప్రెస్ బస్సుల్లో మహిళలకు ఉచిత బస్సు రవాణా సదుపాయం యథావిధిగా అమల్లో ఉంటుందని ఆర్టీసీ అధికారులు స్పష్టం చేసారు. టీజీఎస్ఆర్టీసీ బస్సుల్లో ముందస్తు రిజర్వేషన్ ను www.tgsrtcbus.in వెబ్ సైట్ లో బుక్ చేసుకోవాలని సూచించారు. ప్రత్యేక బస్సుల నిర్వహణ.. సమస్యల పైన ఫిర్యాదులు వస్తే పరిష్కారానికి అదనపు సిబ్బందిని కేటాయించారు.

English summary

TSRTC made key announcement over implementation of Free journey in Sankranti special buses