వంగవీటి రంగా జయంతి రోజున అభిమానులకు పిలుపునిచ్చిన రాధా

విజయవాడ: ఇవ్వాళ వంగవీటి మోహనరంగా 76వ జయంతి. ఈ సందర్భంగా ఆయన అభిమానులు ఉమ్మడి కృష్ణా జిల్లాల్లో పలు సామాజిక కార్యక్రమాలను నిర్వహిస్తోన్నారు. రంగా విగ్రహాలకు పూలమాలలు వేసి నివాళి అర్పించారు. విజయవాడలో రంగా కుమారుడు, తెలుగుదేశం పార్టీ నాయకుడు వంగవీటి రాధాకృష్ణ ఆయన విగ్రహానికి పూలమాల వేసి నివాళి అర్పించారు.

ఈ కార్యక్రమంలో మాజీ ఎమ్మెల్యే యలమంచిలి రవి, జనసేన పార్టీ నాయకులు పోతిన వెంకట మహేష్ సహా పలువురు నేతలు ఇందులో పాల్గొన్నారు. వంగవీటి రాధా-రంగ మిత్ర మండలి సభ్యులు ఏర్పాటు చేసిన కార్యక్రమంలో రాధాకృష్ణ పాల్గొన్నారు. ఈ సందర్భంగా ఆయన కీలక వ్యాఖ్యలు చేశారు.

తన తండ్రిని అభిమానులు కులం, మతం, పార్టీలకు అతీతంగా గుండెల్లో పెట్టుకున్నారని, ఓ నాయకుడు భౌతికంగా దూరమై ఇన్ని సంవత్సరాల తరువాత కూడా స్ఫూర్తిని ఇస్తోన్నారని పేర్కొన్నారు. బడుగు బలహీన వర్గాలు, పేదలకు ఆయన చేసిన మంచి ఏమిటనేది చిరస్మరణీయమని, అందుకు వారి అభిమానమే నిదర్శనమని చెప్పారు.

భవిష్యత్తులో రంగా అభిమానులందరూ ఏకం కావాలని, సామాజిక, రాజకీయ రంగాల్లో ఐకమత్యంగా ఉండాల్సిన అవసరం ఉందని పిలుపునిచ్చారు. రంగా పేరు చెప్పుకొని కొందరు నాయకులు రాజకీయాల్లో ఉన్నత స్థానానికి ఎదిగారని, ఇప్పుడు వారు పట్టించుకోవట్లేదని విమర్శించారు. రంగా పేరు చెప్పుకొంటోన్న పాలకులు ఆయన పేరును ఈ జిల్లాకు ఎందుకు పెట్టలేదని నిలదీశారు.

1987లో రంగా చైతన్య రథం అనే సినిమా నిర్మించారని, అది విడుదలకు నోచుకోలేదని రాధా అన్నారు. రంగా జయంతి సందర్భంగా యన అభిమానులు ఈ మూవీని అమెరికాలో విడుదల చేశారని తెలిపారు. త్వరలోనే తెలుగు రాష్ట్రాల్లో విడుదల చేయడానికి సన్నాహాలు చేస్తోన్నామని రాధా చెప్పారు.

English summary

TDP leader Vangaveeti Radha Krishna pays tributes to his father Vangaveeti Ranga on 76th birth anniversary.