చికాగోలో బతుకమ్మ పండుగ

అమెరికాలోని చికాగోలో ఈ నెల 19వ తేదీన చికాగో తెలంగాణ అసోసియేషన్ ఆధ్వర్యంలో బతుకమ్మ పండుగ, తెలంగాణ విమోచన దినోత్సవం జరిగాయి. బతుకమ్మ పండుగ మధ్యాహ్నం 12 నుంచి సాయంత్రం ఆరు గంటల వరకు జరిగింది. పురుషులు, మహిళలు, పిల్లలు పెద్ద యెత్తున చేరి పర్వదినాన్ని ఆనందోల్లాసాలతో నిర్వహించుకున్నారు. తెలంగాణ సాంస్కృతిక గేయాలాపనలతో కార్యక్రమం ప్రారంభమైంది. స్థానిక కళాకారులు తమ గానమాధుర్యంతో అలరించారు. గత ఎనిమిదేళ్లుగా చికాగోలో బతుకమ్మ పండుగ నిర్వహిస్తున్నారు.

ఈ సందర్భంగా పిల్లలకు, పెద్దలకు క్రీడాపోటీలు నిర్వహించి, బహుమతి ప్రదానం చేశారు. రంగు రంగుల పూలతో అలంకరించిన బతుకమ్మలను తీసుకొచ్చారు. పాటలు పాడుతూ బతుకమ్మ ఆడారు. నృత్యాలు, గేయాలాపనలు రెండు గంటలకు పైగా సాగాయి. ఆ తర్వాత బతుకమ్మలను పక్కనే గల సరస్సులో నిమజ్జనం చేశారు. ఉత్తమ బతుకమ్మకు మెమెంటో అందజేశారు.

చికాగో తెలంగాణ అసోసియేషన్ కార్యక్రమాలను, దాని ఉద్దేశ్యాలను కొందరు వక్తలు వివరించారు. తెలంగాణ విమోచన దినం గురించి కూడా వక్తలు ప్రసంగించారు. తెలంగాణ సాంస్కృతిక ఔన్నత్యం గురించి ప్రముఖ రచయిత బిఎస్ రాములు వివరించారు. కృష్ణ రంగరాజు, అశోక్ లక్ష్మణన్ వంటి వారు ఈ కార్యక్రమ నిర్వహణలో తమ వంతుగా సహకరించారు.