అమెరికాలో ఆంజనేయ జయంతి

కొలరాడో: ఆంజనేయ స్వామి ఎక్కడ? అమెరికా ఎక్కడ? కొలరాడో లోని హిందూ దేవాలయంలో రాఖీ మౌంటెన్ హనుమాన్ సంస్థ ఆధ్వర్యంలో ఇటీవల హనుమాన్ జయంతి ఉత్సవాలు ఘనంగా జరిగాయి. హిందూ పురాణగాధల్లో గొప్ప భక్తుడు, పరాక్రమవంతుడుగా, శక్తియుక్తులకు ప్రతీకగా నిలిచిన హనుమంతుని జయంతి వేడుకలో 300 మంది భక్తులు పాల్గొన్నారు. ఉదయం 6:00 గంటలకు పూజా కార్యక్రమాలు ప్రారంభం కాగా భక్తులు 108 సార్లు హనుమాన్ చాలీసాను ఎంతో భక్తి పారవశ్యంతో ఆలపించారు.

హనుమాన్ జయంతి ఉత్సవంలో చాలిసా చదివే కార్యక్రమాన్ని ఫోర్ట్ కాలిన్స్‌కు చెందిన ధారా కార్టర్ నిర్వహించారు. రాజు వెంకటరమణ, అభ్యసింగై, మాస్టర్ సుషీల్ నల్ల, అరవింద్ గురుమైర్తి తబలా, హార్మోనియంలు వాయించారు. 108 సార్లు చాలిసాను చదువుతూ ఉండగా హనుమంతునికి పంచామృతాలతో అభిషేకం చేశారు. అభిషేకం అనంతరం హనుమాన్ సహస్ర నామాలను హారతి మరియు ప్రసాదాలను స్వామివారికి అర్పించారు. హనుమాన్ చాలీసాను పాడటంలో మరియు హనుమంతునిపై నిర్వహించిన క్విజ్ కాంపిటీషన్ లో చిన్నారులు చురుకుగా పాల్గొన్నారు.