షార్లెట్‌లో తెలుగు సంబరం.. మిషిగన్‌లో నాట్స్ కొత్త అధ్యాయం..!
అమెరికా గడ్డపై తెలుగు భాష, సంస్కృతి పరిమళాలు ఘనంగా వికసించాయి. ఉత్తర అమెరికాలోని ప్రముఖ నగరాల్లో తెలుగు సమాజం అత్యంత ఉత్సాహంగా జరిపిన వేడుకలు, సేవా కార్యక్రమాలు ప్రవాసాంధ్రుల ఐక్యతను, మన మూలాల పట్ల ఉన్న ప్రేమాభిమానాలను చాటిచెప్పాయి. అమెరికాలోని షార్లెట్ నగరంలో షార్లెట్ తెలుగు సంబరాలు 2026 అత్యంత వైభవంగా జరిగాయి. చిన్నారుల నుంచి పెద్దల వరకు అందరూ ఉత్సాహంగా పాల్గొన్న ఈ వేడుకల్లో సాంస్కృతిక కార్యక్రమాలు ప్రేక్షకులను మురిపించాయి.
శాస్త్రీయ సంగీతం, సాంప్రదాయ నృత్యాలు, ఉర్రూతలూగించే ఫ్రీస్టైల్ డ్యాన్స్‌లతో ప్రాంగణమంతా కోలాహలంగా మారింది. పిల్లల్లో శాస్త్రీయ దృక్పథాన్ని పెంపొందించేందుకు ఏర్పాటు చేసిన 'సైన్స్ ఫెస్ట్' ఈ వేడుకల్లో ప్రత్యేక ఆకర్షణగా నిలిచింది. తొమ్మిది రకాల శాస్త్రీయ అంశాలను ప్రయోగాలు, డెమోన్స్ట్రేషన్ల ద్వారా సులభంగా వివరించారు. ముఖ్యంగా డ్రై ఐస్ ప్రయోగాలు, ప్లాస్మా బాల్ ప్రదర్శనలు పిల్లలను, పెద్దలను విశేషంగా ఆకట్టుకున్నాయి. తానా, జీటీఏ, ఆప్టా వంటి ప్రముఖ తెలుగు సంస్థల భాగస్వామ్యంతో ఈ కార్యక్రమం దిగ్విజయంగా సాగింది. నాట్స్ అధ్యక్షుడు రాజ్ అల్లాడా ప్రత్యేకంగా హాజరై సందడి చేశారు. ఈ సందర్భంగా ఒక్కరోజే 800 కొత్త రిజిస్ట్రేషన్లు నమోదు కావడం విశేషం.
ఈ వేడుకలను విజయవంతం చేసిన కళాకారులు, చిన్నారులు, తల్లిదండ్రులు, వాలంటీర్లు, స్పాన్సర్లు, తెలుగు సంస్థల ప్రతినిధులు మరియు ప్రేక్షకులకు నిర్వాహకులు హృదయపూర్వక కృతజ్ఞతలు తెలిపారు.తెలుగు సంస్కృతి పరిరక్షణ, సేవా కార్యక్రమాల విస్తరణ, యువత భాగస్వామ్యమే లక్ష్యంగా నార్త్ అమెరికన్ తెలుగు సొసైటీ తన పరిధిని మరింత విస్తరించింది. మిషిగన్‌లోని ఫార్మింగ్టన్ హిల్స్‌ వేదికగా కొత్త చాప్టర్‌ను ఘనంగా ప్రారంభించింది.
కార్యక్రమంలో నాట్స్ చైర్మన్ కిషోర్ కంచర్ల మాట్లాడుతూ.. ఆపదలో ఉన్న తెలుగు వారికి నాట్స్ హెల్ప్‌లైన్ ద్వారా అందిస్తున్న అత్యవసర సేవలను వివరించారు. అధ్యక్షుడు రాజ్ అల్లాడా మాట్లాడుతూ నాట్స్ ఎల్లప్పుడూ సమాజ సేవకే ప్రథమ ప్రాధాన్యం ఇస్తుందని స్పష్టం చేశారు. స్థానిక విద్యార్థులు ప్రదర్శించిన కూచిపూడి నృత్యాలు ఆకట్టుకోగా.. ఆప్టా, డెట్రాయిట్ తెలుగు అసోసియేషన్, డెట్రాయిట్ తెలంగాణ కమ్యూనిటీ, ఇండియన్ ఓవర్సీస్ కాంగ్రెస్ ప్రతినిధులు పాల్గొని తమ మద్దతు తెలిపారు.
మిషిగన్ చాప్టర్ ఆధ్వర్యంలో మహిళల ఆరోగ్యం, సాధికారత, యువ నాయకత్వం, క్రీడలు, కుటుంబ కార్యక్రమాలు, తెలుగు భాషా సంస్కృతుల పరిరక్షణే ధ్యేయంగా ప్రతి మూడు నెలలకు కనీసం ఒక ప్రధాన సేవా కార్యక్రమాన్ని నిర్వహించాలని నిర్ణయించారు.
Click it and Unblock the Notifications
Sign in with Google
