Alexander Graham Bell: 1892 నుంచి టెలిఫోన్ సృష్టికర్త చేసిన వింత ప్రయోగాలు
అలెగ్జాండర్ గ్రాహం బెల్ అనగానే మనకు టెలిఫోన్ మాత్రమే గుర్తుకొస్తుంది. టెలిఫోన్ కనిపెట్టి ప్రపంచ రూపురేఖలను మార్చేసిన మహనీయుడు ఆయన.. అయితే బెల్ కేవలం ఫోన్తోనే ఆగిపోలేదు. తన ఆలోచనలకు పదును పెట్టడానికి, వినూత్న ప్రయోగాలకు వేదికగా మార్చుకోవడానికి కెనడాలోని నోవా స్కోటియా ప్రాంతంలో 'బెయిన్ బ్రే' (Beinn Bhreagh) పేరిట 29 ఎకరాల భారీ ఎస్టేట్ను నిర్మించుకున్నారు. 1892-93 ప్రాంతంలో బ్రాస్ డి ఓర్ సరస్సు, కొండల మధ్య నిర్మించిన ఈ విశాలమైన భవనం కేవలం బెల్ కుటుంబానికి వేసవి విడిది మాత్రమే కాదు, ఆధునిక సైన్స్ అండ్ టెక్నాలజీకి సరికొత్త బాటలు వేసిన ఒక రహస్య రిసెర్చ్ సెంటర్.
అందమైన కొండల మధ్య అద్భుత నిర్మాణం
1885 నుంచి అలెగ్జాండర్ గ్రాహం బెల్, ఆయన భార్య మేబెల్ ఇక్కడి ప్రకృతి సౌందర్యానికి ముగ్ధులై ప్రశాంతంగా గడపడం ప్రారంభించారు. ఆ తర్వాత 1886లో అక్కడి స్థలాన్ని కొనుగోలు చేసి, దానికి గేలిక్ భాషలో 'అందమైన కొండ' అనే అర్థం వచ్చేలా 'బెయిన్ బ్రే' అని పేరు పెట్టారు. 1892లో బోస్టన్కు చెందిన ప్రముఖ ఆర్కిటెక్ట్ ఆర్థర్ జీ ఎవెరెట్ డిజైన్తో ఒక అద్భుతమైన మహల్ను నిర్మించారు. గుండ్రటి బురుజులు, రాతి పొయ్యిలు, విశాలమైన బాల్కనీలతో ఆకట్టుకునేలా రూపొందించిన ఈ భవనాన్ని బెల్ సతీమణి మేబెల్ అందమైన పూలతోటలు, కూరగాయల తోటలతో ప్రకృతి స్వర్గధామంగా తీర్చిదిద్దింది. మొదట శీతాకాలంలో రీఛార్జ్ అవ్వడానికి మాత్రమే దీనిని భావించినప్పటికీ, అక్కడ ఉన్న ప్రశాంతత నచ్చి సంవత్సరంలో ఎక్కువ కాలం ఇక్కడే గడపడం ప్రారంభించారు.
సకల శాస్త్రాలకు సజీవ ప్రయోగశాల
సహజమైన కొండ ప్రాంతం, పక్కనే ఉన్న విశాలమైన సరస్సు బెల్కు ప్రయోగాలకు కావలసినంత స్థలాన్ని ఇచ్చాయి. దాంతో కాలక్రమేణా ఈ ఎస్టేట్లో సొంత రోడ్లు, వర్క్షాప్లు, బోటు ఘాట్లు, గిడ్డంగులు, అత్యాధునిక ప్రయోగశాలలు వెలిశాయి. శబ్ద తరంగాల రవాణా, వైద్య రంగంలో వినూత్న పద్ధతులు, ఏరోనాటిక్స్, మెరైన్ ఇంజనీరింగ్, జీనెటిక్స్ మాత్రమే కాకుండా గొర్రెల పెంపకంలో కూడా బెల్ అనేక ప్రయోగాలు ఇక్కడే చేశారు. విశేషమేమిటంటే.. ఈ పరిశోధనల్లో ఆయన కేవలం సైంటిస్టులనే కాక, స్థానిక ప్రజలను కూడా భాగస్వాములను చేస్తూ ఉద్యోగాలు కల్పించేవారు. నిత్యం పండితులు, స్థానికులతో ఈ ఎస్టేట్ కొత్త ఆలోచనల అడ్డాగా విలసిల్లింది.
కెనడా ఆకాశంలో చరిత్ర సృష్టించిన ఫ్లైట్!
మానవుడు గాల్లో ఎగరాలనే కల నిజం చేయడానికి బెల్ ఎంతో కృషి చేశారు. ఈ ఎస్టేట్ వేదికగానే ఆయన చిత్రవిచిత్రమైన గాలిపటాలు, టెట్రాహెడ్రల్ ఆకారాలపై ప్రయోగాలు చేశారు. 1907లో తన భార్య మేబెల్ ఇచ్చిన ఆర్థిక ప్రోత్సాహంతో బెల్ 'ఏరియల్ ఎక్స్పెరిమెంట్ అసోసియేషన్'ను ప్రారంభించారు. ఈ సంస్థ తయారుచేసిన నాలుగు విమాన నమూనాలలో 'సిల్వర్ డార్ట్' అత్యంత ప్రసిద్ధి చెందింది. ఫిబ్రవరి 1909లో ఈ సిల్వర్ డార్ట్ విమానాన్ని బెయిన్ బ్రే ఎస్టేట్కు ఆనుకుని ఉన్న బ్రాస్ డి ఓర్ ఘనీభవించిన సరస్సుపై విజయవంతంగా ఎగరేశారు. కెనడా చరిత్రలోనే నియంత్రిత శక్తితో నడిచిన మొదటి విమాన ప్రయోగంగా ఇది రికార్డు సృష్టించింది.
నీటిపై విహరించే సూపర్బోట్ ఆవిష్కరణ
బెల్ దృష్టి కేవలం ఆకాశంపైనే కాదు, నీటిపైనా పడింది. అత్యంత వేగంగా ప్రయాణించే పడవలపై ఆయన విస్తృత పరిశోధనలు చేశారు. ఇందులో భాగంగా రూపొందిందే హెచ్డి-4 (HD-4) హైడ్రోఫాయిల్ బోట్. నీటి ప్రవాహ నిరోధకతను తగ్గిస్తూ, వేగం పుంజుకోగానే నీటిపైన తేలుతూ ప్రయాణించేలా ఉండే ఈ హైడ్రోఫాయిల్ సాంకేతికతను బెన్ బ్రే ఎస్టేట్లోని సరస్సులోనే ప్రయోగించి విజయం సాధించారు. శబ్ద తరంగాలు, ఏరోనాటిక్స్, మెరైన్ ఇంజనీరింగ్ ఇలా ప్రతీ రంగంలోనూ తనదైన ముద్ర వేసిన బెల్ పరిశోధనలకు ఈ ఎస్టేట్ ఒక నిశ్శబ్ద సాక్షిగా నిలిచింది.
వారసత్వ సంపదగా చారిత్రాత్మక కేంద్రం
తన జీవిత చరమాంకాన్ని ఈ అందమైన బెయిన్ బ్రే ఎస్టేట్లోనే గడిపిన అలెగ్జాండర్ గ్రాహం బెల్ 1922లో ఇక్కడే కన్నుమూశారు. ఆయన ఆవిష్కరణలకు, అపారమైన కృషికి గుర్తుగా కెనడా ప్రభుత్వం 2017లో ఈ బెయిన్ బ్రే హాల్ను 'నేషనల్ హిస్టారిక్ సైట్ ఆఫ్ కెనడా'గా గుర్తించింది. నేటికీ ప్రైవేట్ యాజమాన్యంలోనే ఉన్నప్పటికీ, నాటి రాతి పొయ్యిలు, ఇంటీరియర్ ఆకృతులు, మేబెల్ తీర్చిదిద్దిన తోటలు ఇప్పటికీ చెక్కుచెదరకుండా బెల్ జ్ఞాపకాలను పదిలంగా కాపాడుతున్నాయి.
Click it and Unblock the Notifications
Sign in with Google
