పాలపుంత సరిహద్దులు దాటి.. సరికొత్త ప్రపంచాన్ని చూసిన హబుల్!
మానవ ఊహకు అందని రోదసి లోతుల్లో శాస్త్రవేత్తలు ఒక విస్మయపరిచే రహస్యాన్ని ఛేదించారు. విశ్వం ఆవిర్భావం, నక్షత్ర వీధుల పుట్టుక వెనుక ఉన్న మిస్టరీలను విప్పేందుకు నాసాకు చెందిన 'హబుల్' టెలిస్కోప్ అత్యంత ప్రాధాన్యమున్న ఒక అరుదైన ఆవిష్కరణను చేసింది. మన పాలపుంత సరిహద్దులు దాటి.. ఎక్కడో కోట్లాది కాంతి సంవత్సరాల దూరంలో వెలుగులీనుతున్న ఒక నక్షత్రాల ప్రవాహాన్ని శాస్త్రవేత్తలు తొలిసారిగా పసిగట్టారు. ఈ ఆవిష్కరణ ఖగోళ శాస్త్రంలోనే సరికొత్త అధ్యయనానికి తెరలేపింది.
నాసా హబుల్ టెలిస్కోప్ సేకరించిన పాత నివేదికలను నిశితంగా పరిశీలించినప్పుడు ఈ నక్షత్రాల రహదారి బయటపడింది. భూమికి దాదాపు 115 మిలియన్ కాంతి సంవత్సరాల దూరంలో ఉన్న ఒక అస్పష్టమైన గెలాక్సీలో ఈ ప్రవాహం దాగి ఉంది. ఒకప్పుడు దట్టంగా పేరుకుపోయిన నక్షత్రాల సమూహం , అక్కడి గెలాక్సీ తీవ్ర గురుత్వాకర్షణ శక్తికి గురై క్రమంగా విడిపోవడం వల్ల ఈ సుదీర్ఘ నక్షత్రాల వరుస ఏర్పడిందని గుర్తించారు. మన పాలపుంతలో ఇలాంటివి కొన్ని కనిపించినప్పటికీ, బయటి గెలాక్సీలో ఒక స్పష్టమైన నక్షత్ర ప్రవాహాన్ని కనుగొనడం చరిత్రలో ఇదే తొలిసారి.
విశ్వపు నిశ్శబ్ద విషం 'డార్క్ మేటర్' గుట్టు విప్పేలా!
ఖగోళ శాస్త్రవేత్తలకు నేటికీ నిరూపించలేని అతిపెద్ద చిక్కుముడి 'డార్క్ మేటర్'. విశ్వంలో దాదాపు 80 నుంచి 85 శాతం భాగం ఈ అదృశ్య పదార్థమే ఆక్రమించిందని అంచనా వేస్తున్నప్పటికీ, దాన్ని నేరుగా చూడటం ఎవరికీ సాధ్యపడలేదు. అయితే, ఈ నక్షత్రాల ప్రవాహంపై గెలాక్సీ గురుత్వాకర్షణ శక్తి ఎలా పని చేస్తుందో అధ్యయనం చేయడం ద్వారా, అక్కడ ఎంత పరిమాణంలో డార్క్ మేటర్ ఉందో అంచనా వేయవచ్చని పరిశోధకులు చెబుతున్నారు. ఇప్పటివరకు మన గెలాక్సీకే పరిమితమైన ఈ పరిశోధన విధానం, ఇప్పుడు ఇతర విశ్వాంతరాళాలకు విస్తరించడం సైంటిస్టుల్లో తీవ్ర ఉత్సుకతను నింపింది.
వెలుగులు తక్కువ.. వ్యాప్తి ఎక్కువ ఉన్న వింత గెలాక్సీ
ఈ నక్షత్రాల సముదాయం 'UGC 9050-Dw1' అనే ఒక అరుదైన గెలాక్సీ పరిధిలో కనుగొనబడింది. ఇవి అత్యంత తక్కువ కాంతిని కలిగి ఉండి, విశాలమైన విస్తీర్ణంలో వ్యాపించి ఉంటాయి. వీటిలోని విపరీతమైన గురుత్వాకర్షణ శక్తి కారణంగానే నక్షత్రాల క్లస్టర్ నుంచి నక్షత్రాలు బయటకు లాగబడి ఒక దారము లాంటి నిర్మాణంగా మారాయని పరిశోధకులు స్పష్టం చేశారు. ఈ కనుగోలు ద్వారా విశ్వం ఎలా రూపాంతరం చెందింది, వివిధ గెలాక్సీల నిర్మాణం వెనుక ఉన్న అసలు బలాలేమిటో తెలుసుకోవడానికి బాటలు పడినట్లయింది.
Click it and Unblock the Notifications
Sign in with Google