Titan: శని చంద్రుడు మీద అద్భుతం! చిన్న గాలి వీచినా..
విశ్వంలో భూమి తర్వాత ఉపరితలంపై ద్రవ రూపంలో నదులు, సరస్సులు ఉన్న ఏకైక ప్రపంచం 'టైటాన్'. అయితే, అక్కడ ప్రవహించేది మనలాంటి నీరు కాదు. మైనస్ 179 డిగ్రీల సెల్సియస్ అత్యంత శీతల ఉష్ణోగ్రత వద్ద ద్రవ రూపంలో ఉండే మీథేన్, ఈథేన్ వంటి తైల పదార్థాలు. మరి ఈ ద్రవాల్లో అలలు ఎలా ఉంటాయో తెలుసుకునేందుకు MIT పరిశోధకులు ఒక ప్రత్యేకమైన గణిత నమూనాను అభివృద్ధి చేశారు.
భూమితో పోలిస్తే టైటాన్ మీద గురుత్వాకర్షణ శక్తి చాలా తక్కువ (కేవలం 14 శాతం మాత్రమే). దీనివల్ల అక్కడ వీచే మెల్లని గాలి కూడా మీథేన్ సరస్సులలో భారీ అలలను లేవనెత్తుతుంది. "టైటాన్ తీరాన నిలబడితే మీకు చాలా తక్కువ గాలి వీస్తున్నట్లు అనిపిస్తుంది, కానీ మీ వైపు 10 అడుగుల ఎత్తులో నెమ్మదిగా కదులుతున్న భారీ అలలు రావడాన్ని చూస్తారు. ఇది భూమిపై మనం ఊహించలేము" అని ఈ పరిశోధనలో పాల్గొన్న శాస్త్రవేత్తలు వివరించారు. ఈ భారీ అలలే టైటాన్ తీరప్రాంతాల్లోని వింత ఆకృతులకు కారణమై ఉండవచ్చని భావిస్తున్నారు.
భూమిపై పరీక్షించి.. విశ్వంలోకి!
పరిశోధకులు తమ 'ప్లానెట్ వేవ్స్' మోడల్ను మొదట భూమిపైనే పరీక్షించారు. కెనడా-అమెరికా సరిహద్దులోని లేక్ సుపీరియర్లో గత 20 ఏళ్ల డేటాను ఈ మోడల్తో సరిపోల్చగా, ఫలితాలు ఖచ్చితంగా వచ్చాయి. దీంతో ఇతర గ్రహాల వాతావరణ పీడనం, ద్రవాల సాంద్రత, గురుత్వాకర్షణ ఆధారంగా అక్కడ అలలు ఎలా ఉంటాయో లెక్కగట్టడం సులువైంది. భవిష్యత్తులో టైటాన్ సరస్సుల్లోకి పంపే రోబోటిక్ నౌకలు లేదా ప్రోబ్లు అక్కడి భారీ అలల శక్తిని తట్టుకునేలా రూపొందించడానికి ఈ సమాచారం ఎంతో కీలకం కానుంది.
అంగారకుడిపై అలలు.. లావా సముద్రాల వరకు!
ఈ పరిశోధన కేవలం టైటాన్కే పరిమితం కాలేదు. బిలియన్ల ఏళ్ల క్రితం అంగారక గ్రహంపై నీరు ఉన్నప్పుడు అక్కడ అలలు ఎలా ఉండేవో కూడా ఇది విశ్లేషించింది. అలాగే సౌర వ్యవస్థకు ఆవల ఉన్న గ్రహాలపైనా ఈ మోడల్ను ప్రయోగించారు. ఉదాహరణకు, '55 క్యాంక్రీ ఇ' అనే గ్రహం మీద లావా సరస్సులు ఉండవచ్చని అంచనా. అక్కడ లావా చాలా చిక్కగా ఉండటం వల్ల, ఒక్క అల సృష్టించడానికి కూడా గంటకు 80 మైళ్ల వేగంతో వీచే బలమైన తుఫాను గాలులు అవసరమవుతాయని తేలింది.
మరోవైపు 'LHS 1140b' అనే సూపర్-ఎర్త్ మీద భూమి కంటే ఎక్కువ గురుత్వాకర్షణ ఉన్నందున, అక్కడ అలలు చాలా చిన్నవిగా ఉంటాయని ఈ మోడల్ చెబుతోంది. అంటే గ్రహాన్ని బట్టి, అక్కడ ఉండే ద్రవాన్ని బట్టి అలల స్వభావం పూర్తిగా మారిపోతుందన్నమాట!
Click it and Unblock the Notifications
Sign in with Google