కొత్త కారు కొనేముందు TCS గురించి తెలుసుకోండి!

దేశంలో జీఎస్టీ రేట్లు తగ్గిన నేపథ్యంలో కొత్త కారు కొనాలని ఆలోచిస్తున్నారా? కొత్త జీఎస్టీ రేట్ల వల్ల కార్ల ధరలు తగ్గాయి. అయితే మీరు చెల్లించాల్సిన టీసీఎస్(Tax Collected at Source) గురించి తెలుసుకోవడం చాలా ముఖ్యం. ఈ కొత్త ధరలు సెప్టెంబర్ 22 నుంచి అమల్లోకి వస్తాయి.

టీసీఎస్ అంటే ఏమిటి, ఎప్పుడు చెల్లించాలి?

టీసీఎస్ (TCS) అనేది మీరు కారు కొనుగోలు చేసేటప్పుడు చెల్లించాల్సిన ఓ అడ్వాన్స్ ట్యాక్స్. ఇది కేంద్ర సర్కారు వసూలు చేసే పన్ను. మీ కారు ఎక్స్-షోరూమ్ ధర రూ.10 లక్షల కంటే ఎక్కువగా ఉంటే, డీలర్ మీ నుంచి 1% టీసీఎస్ వసూలు చేస్తాడు. ఉదాహరణకు, మీరు రూ.15 లక్షల విలువైన కారు కొనుగోలు చేస్తే.. మీరు రూ.15,000 టీసీఎస్ చెల్లించాలి. ఈ మొత్తం మీ మొత్తం చెల్లింపులో భాగంగా ఉంటుంది.

టీసీఎస్ డబ్బులు ఎక్కడికి వెళ్తాయి?
మీరు చెల్లించిన టీసీఎస్ డబ్బును డీలర్ నేరుగా ప్రభుత్వానికి జమ చేస్తాడు. ఈ మొత్తం మీ ఫారం 26AS, AISలో కనిపిస్తుంది. మీరు ఆదాయ పన్ను రిటర్న్ (ITR) దాఖలు చేసేటప్పుడు, ఈ టీసీఎస్ మొత్తాన్ని మీ మొత్తం పన్ను బాధ్యతలో సర్దుబాటు చేసుకోవచ్చు. ఒకవేళ మీరు అదనపు పన్ను చెల్లించినట్లయితే, మీకు ఆ మొత్తం రీఫండ్ అవుతుంది. అయితే, ఈ టీసీఎస్ మొత్తంపై మీకు ఎలాంటి వడ్డీ లభించదు.

కొత్త కారు కొనేటప్పుడు ఈ విషయాలు గుర్తుంచుకోండి
*మీ ఇన్వాయిస్‌లో టీసీఎస్ మొత్తం సరిగ్గా రాసి ఉందో లేదో తనిఖీ చేసుకోండి.

*చెల్లింపు చేసిన తర్వాత, డీలర్ నుంచి తప్పనిసరిగా ఫారం 27D తీసుకోండి.

*ఐటీఆర్ దాఖలు చేసేటప్పుడు ఈ మొత్తాన్ని సులభంగా సర్దుబాటు చేసుకోవచ్చు.

సెప్టెంబర్ 22 నుంచి జీఎస్టీ రేట్లు తగ్గడం వల్ల కార్ల ధరలు తగ్గుతాయి. అయితే, మీరు రూ.10 లక్షలకు మించి విలువైన కారు కొనుగోలు చేస్తే, ఒక శాతం టీసీఎస్ చెల్లించడం తప్పనిసరి. కాబట్టి, కారు కొనుగోలు చేయడానికి ముందు ఈ చిన్న ట్యాక్స్ లెక్కను తప్పకుండా అర్థం చేసుకోండి.

English summary

Planning to buy a new car after September 22? Learn all about TCS (Tax Collected at Source) on car purchases and how this 1% tax applies to vehicles priced over Rs.10 Lakhs.