2027 వన్డే ప్రపంచ కప్ వేదికలు ఫిక్స్.. ఎక్కడెక్కడంటే?

2027లో జరగనున్న ఐసీసీ పురుషుల క్రికెట్ ప్రపంచ కప్ కోసం సన్నాహాలు అధికారికంగా ప్రారంభమయ్యాయి. ఈ టోర్నమెంట్‌ను దక్షిణాఫ్రికా, జింబాబ్వే, నమీబియా సంయుక్తంగా నిర్వహించనున్నాయి. మొత్తం 54 మ్యాచ్‌లు ఆడబోతున్న ఈ మెగా ఈవెంట్ కోసం క్రికెట్ దక్షిణాఫ్రికా (CSA) స్టేడియాలను అధికారికంగా ప్రకటించింది.

దక్షిణాఫ్రికా, జింబాబ్వే సంయుక్తంగా ప్రపంచ కప్ నిర్వహించడం ఇది రెండోసారి. నమీబియా ఈ పెద్ద టోర్నమెంట్‌ను తొలి సారి నిర్వహించబోతోంది. ఈసారి టోర్నమెంట్ అంతర్జాతీయ క్రీడాకారులకు, ఫ్యాన్స్‌కు మరింత విభిన్నమైన, ఉత్సాహభరిత అనుభవాన్ని అందించడానికి CSA ప్రత్యేకంగా పథకాలు రూపొందించింది.

మ్యాచ్‌లు ఎక్కడ జరుగుతాయి..?

ప్రస్తుతం ఎంపికైన స్టేడియాలు:

• జోహన్నెస్‌బర్గ్ - వాండరర్స్ స్టేడియం
• కేప్ టౌన్ - న్యూలాండ్స్ క్రికెట్ గ్రౌండ్
• డర్బన్ - కింగ్స్‌మీడ్ క్రికెట్ గ్రౌండ్
• ప్రిటోరియా - సెంచూరియన్ పార్క్
• బ్లూమ్‌ఫోంటెయిన్ - మాంగాంగ్ ఓవల్
• గ్కెబెర్హా - సెయింట్ జార్జ్ పార్క్
• తూర్పు లండన్ - బఫెలో పార్క్
• పార్ల్ - బోలాండ్ పార్క్

దక్షిణాఫ్రికా మొత్తం 44 మ్యాచ్‌లకు ఆతిథ్యం ఇస్తుంది, మిగతా 10 మ్యాచ్‌లు జింబాబ్వే, నమీబియాలో జరుగుతాయి. CSA ప్రకారం, మ్యాచ్‌లు జోహన్నెస్‌బర్గ్, ప్రిటోరియా, కేప్ టౌన్, డర్బన్, గ్కెబెర్హా, బ్లూమ్‌ఫోంటెయిన్, తూర్పు లండన్, పార్ల్‌లలో జరుగుతాయని ఖరారు.

టోర్నమెంట్ ఫార్మాట్..

2027 ప్రపంచ కప్‌లో 14 జట్లు పాల్గొంటాయి. ఫార్మాట్ 2003 ప్రపంచ కప్‌లా ఉంటుంది: రెండు గ్రూపులుగా విభజించి, ప్రతి గ్రూపులో ఏడు జట్లు ఉంటాయి. గ్రూప్-స్టేజ్ తర్వాత, క్వార్టర్ ఫైనల్, సెమిఫైనల్, ఫైనల్ మ్యాచ్‌లు జరగనున్నాయి. 2003లో దక్షిణాఫ్రికా, జింబాబ్వే, కెన్యా సంయుక్తంగా నిర్వహించిన టోర్నమెంట్‌లో ఆస్ట్రేలియా జట్టు టైటిల్‌ను గెలిచింది.

ఇక దక్షిణాఫ్రికా మాజీ ఆర్థిక మంత్రి ట్రెవర్ మాన్యుయే స్థానిక నిర్వాహక కమిటీ అధ్యక్షునిగా నియమితులయ్యారు. CSA అధ్యక్షురాలు పెర్ల్ మాఫోషే మాట్లాడుతూ.. "వైవిధ్యభరితమైన, సమ్మిళిత, ఐక్యమైన దక్షిణాఫ్రికాను ప్రతిబింబించే ప్రపంచవ్యాప్తంగా స్ఫూర్తిదాయక ఈవెంట్‌ను నిర్వహించడం మా లక్ష్యం" అని పేర్కొన్నారు. అంతేకాకుండా స్థానిక ప్రాజెక్ట్‌లలో సాంకేతిక, భద్రతా, ఫ్యాన్ ఎంగేజ్‌మెంట్ అంశాలను కూడా CSA గణనీయంగా పరిగణలోకి తీసుకుంటుందని స్పష్టం చేశారు.

English summary

Preparations have officially begun for the ICC Men's Cricket World Cup to be held in 2027. The tournament will be jointly hosted by South Africa, Zimbabwe, and Namibia.