IPL 2026: ఆ జట్లకు రోహిత్ పంపిన హెచ్చరిక..! గవాస్కర్ విశ్లేషణ..!

ఇండియన్ ప్రీమియర్ లీగ్ (IPL 2026)లో భాగంగా లక్నో సూపర్ జెయింట్స్ తో జరిగిన మ్యాచ్ లో రీఎంట్రీ ఇచ్చిన ముంబై ఇండియన్స్ ఓపెనర్ రోహిత్ శర్మ (Rohit Sharma).. తొలి మ్యాచ్ లోనే అదరగొట్టాడు. 44 బంతుల్లోనే 84 పరుగులు చేసి ముంబైను టాప్ లో నిలిపాడు. దీంతో ముంబై జట్టు చాలా కాలం తర్వాత ఓ మ్యాచ్ గెలిచింది. దీంతో ఈ మ్యాచ్ లో కీలక పాత్ర పోషించిన రోహిత్ శర్మతో పాటు ముంబై ఇండియన్స్ పైనా అంచనాలు పెరిగిపోయాయి.

రోహిత్ శర్మ ఆడిన సూపర్ ఇన్నింగ్స్ పై క్రికెట్ దిగ్గజం, కామెంటేటర్ సునీల్ గవాస్కర్ (Sunil Gavaskar) ప్రశంసల వర్షం కురిపించాడు. గత ఏడాదిగా రోహిత్ శర్మను నిశితంగా గమనిస్తున్నానని, వైట్-బాల్ క్రికెట్, ఐపీఎల్‌లో కెప్టెన్సీ నుంచి తొలగించినప్పటి నుంచి, అతను తన బ్యాటింగ్‌పై ఎక్కువ దృష్టి పెట్టాడని తెలిపాడు. ఆసీస్ తో జరిగిన వన్డే సిరీస్‌లో పరుగులు సాధించాడని, స్వదేశంలో జరిగిన సిరీస్‌లో రాణించాడని, ఇప్పుడు ఐపీఎల్‌లో కూడా అదే చేస్తున్నాడని తెలిపాడు. రోహిత్ ఇదే రీతిలో బ్యాటింగ్ కొనసాగిస్తే, 'మెన్ ఇన్ బ్లూ అండ్ గోల్డ్' ప్లేఆఫ్ రేసులో ఇతర జట్లకు ఇబ్బందులు సృష్టించగలరని తేల్చేశాడు.

ఐపీఎల్‌లో రోహిత్ సాధారణంగా ఒక సీజన్‌లో 400 నుండి 500 పరుగులు చేస్తాడని, కానీ అతని ఇన్నింగ్స్‌ ప్రభావవంతంగా ఉంటాయని గవాస్కర్ తెలిపాడు. అతను 80కి పైగా పరుగులు చేసిన ఇన్నింగ్స్‌లు ఎక్కువగా ఆడకపోయినా, అతను 40 నుండి 50 పరుగులతో ప్రారంభించే ఇన్నింగ్స్‌లు జట్టుకు ఆరంభంలోనే ఊపునిస్తాయన్నాడు. అతని ఆటలో మార్పు స్పష్టంగా కనిపిస్తోందన్నాడు. అతను ఇప్పుడు క్రీజులో ఎక్కువ సేపు నిలబడి, మరింత పెద్ద ప్రభావాన్ని చూపాలనుకుంటున్నాడని పేర్కొన్నాడు. ఈ 84 పరుగుల ఇన్నింగ్స్‌లో, మనం రోహిత్ శర్మ యొక్క విలక్షణమైన షాట్లన్నింటినీ చూశామని, పుల్ షాట్ స్పష్టంగా కనిపించిందని, షార్ట్ బాల్స్‌ను స్టాండ్స్‌లోకి పంపేశాడని తెలిపాడు. ఫుల్ లెంగ్త్ బంతులను కవర్ మీదుగా డ్రైవ్ చేశాడని, లాంగ్ ఆఫ్ వైపు కూడా సులభంగా గాల్లోకి లేపాడన్నాడు. అతను ఇదే ఫామ్‌ను కొనసాగిస్తే, మిగిలిన మ్యాచ్‌లలో ముంబై ఇండియన్స్ అనేక జట్ల ప్లేఆఫ్ ఆశలకు గండి కొడుతుందని హెచ్చరించాడు.