T20 World Cup 2026: మళ్లీ టీమ్ లోకి ఆ తెలుగు ప్లేయర్-టీమిండియాకు భారీ ఊరట..!

టీ20 వరల్డ్ కప్ (t20 world cup 2026) ఆరంభానికి ముందు టీమిండియాకు మరో గుడ్ న్యూస్ అందింది. తాజాగా న్యూజీలాండ్ తో స్వదేశంలో జరిగిన టీ20 సిరీస్ ను ఏకంగా 4-1 తేడాతో గెల్చుకున్న భారత జట్టు ఇప్పుడు మెగా టోర్నీ కోసం సిద్దమవుతోంది. ఇలాంటి సమయంలో కివీస్ తో టీ20 సిరీస్ కు దూరమైన ఈ కీలక ఆటగాడు జట్టులోకి వచ్చేందుకు గ్రీన్ సిగ్నల్ లభించింది. దీంతో అతను త్వరలో టీమిండియా ఆడే రెండు వార్మప్ గేమ్ లలో ఆడి ఫిట్ నెస్ నిరూపించుకునేందుకు సిద్ధమవుతున్నాడు.

మళ్లీ టీమ్ లోకి తిలక్ వర్మ (tilak varma)

హైదరాబాదీ లెఫ్ట్ హ్యాండర్ తిలక్ వర్మ (tilak varma) గతంలో గాయపడి ఆపరేషన్ చేయించుకున్నాడు. దీంతో బెంగళూరులోని జాకీయ క్రికెట్ అకాడమీలో ఉంటూ గాయం నుంచి కోలుకున్నాడు. తాజాగా అతని పరిస్ధితిని సమీక్షించిన బీసీసీఐ.. టీ20 వరల్డ్ కప్ లో ఆడేందుకు గ్రీన్ సిగ్నల్ ఇచ్చింది. దీంతో తిలక్ వర్మ ఇప్పుడు టీ20 వరల్డ్ కప్ కు ముందు జరిగే రెండు వార్మప్ మ్యాచ్ ల్లోనూ ఆడేందుకు సిద్దమవుతున్నాడు. ఇందులో ఫిట్ నెస్ నిరూపించుకుంటే ఇక మెగా టోర్నీలో తిలక్ ఆడటం లాంఛనమే.

గాాయం నుంచి కోలుకుని

ఈ ఏడాది జనవరి ప్రారంభంలో రంజీ ట్రోఫీ మ్యాచ్ సందర్భంగా గాయం కావడంతో తిలక్ వర్మ వృషణాలకు శస్త్రచికిత్స జరిగింది. దీంతో తిలక్ వర్మ దాదాపు నెల రోజులుగా ఆటకు దూరంగా ఉన్నాడు. అతన్ని బెంగళూరులోని బీసీసీఐ సెంటర్ ఆఫ్ ఎక్సలెన్స్ కు పంపి ఇంటెన్సివ్ ట్రైనింగ్ ఇప్పించారు. ఈ నేపథ్యంలో తిలక్ వర్మ తాజాగా హై-ఇంటెన్సిటీ సిమ్యులేషన్ మ్యాచ్‌లో విజయవంతంగా ఉత్తీర్ణత సాధించాడు. దీంతో అతనికి టీ20 వరల్డ్ కప్ ఆడేందుకు అనుమతి లభించింది.

వార్మప్ మ్యాచ్ లకు రెడీ

రేపు నవీ ముంబైలోని డీవై పాటిల్ స్టేడియంలో అమెరికా జట్టుతో జరిగే ఇండియా-ఏ వార్మప్ మ్యాచ్ లో తిలక్ వర్మ ఆడబోతున్నాడు. ఆ తర్వాత అధికారికంగా సీనియర్ జట్టుతో చేరతాడు. అనంతరం దక్షిణాఫ్రికాతో ఫిబ్రవరి 4న జరిగే భారత జట్టు వార్మప్ మ్యాచ్ లో ఆడేందుకు అవకాశం కల్పిస్తారు. అక్కడా నిరూపించుకుంటే టీమిండియాలో అతని స్ధానానికి ఢోకా లేనట్లే.