చంద్రబాబుకు బాలకృష్ణ ఎసరు?

By Pratap

Published: Friday, September 16, 2011, 13:17 [IST]

తెలుగుదేశం పార్టీ అధ్యక్షుడు నారా చంద్రబాబు నాయుడు వ్యూహంలో భాగంగానే సినీ హీరో బాలకృష్ణ ప్రత్యక్ష రాజకీయాల్లోకి వస్తున్నట్లు, తాను ఎన్నికల్లో పోటీ చేస్తానని ప్రకటించినట్లు బలమైన అభిప్రాయం ఒక వైవు వ్యక్తమవుతుండగా దానికి భిన్నమైన ప్రచారం కూడా జరుగుతోంది. చంద్రబాబు స్థానంలో పార్టీ పగ్గాలను చేతిలోకి తీసుకోవడానికే ఆయన ముందుకు వస్తున్నట్లు ప్రచారం జరుగుతోంది. పార్టీకి వూర్వ వైభవం కల్పించడం చంద్రబాబు వల్ల కాని పని అని, బాలకృష్ణ పార్టీని చేతుల్లోకి తీసుకుంటేనే అది సాధ్యమవుతుందని ఒక సామాజిక వర్గం బలంగా నమ్ముతున్నట్లు చెబుతున్నారు. అందులో భాగంగానే బాలకృష్ణ పూర్తి స్థాయిలో రాజకీయాల్లోకి రావాలని నిర్ణయించుకున్నారని చెబుతున్నారు.

పార్టీలో చిచ్చు పెట్టడానికి ప్రయత్నిస్తూ నారా లోకేష్ రాజకీయ ప్రవేశాన్ని అడ్డుకోవడానికి నందమూరి హరికృష్ణ, ఆయన కుమారుడు జూనియర్ ఎన్టీఆర్ ప్రయత్నాలకు విరుగుడుగా బాలకృష్ణను చంద్రబాబు ముందు పెడుతున్నారంటూ బలమైన అభిప్రాయం ముందుకు వచ్చింది. కానీ, రాష్ట్రంలో తెలుగుదేశం నాయకత్వాన్ని తన చేతుల్లోకి తీసుకోవాలని బాలకృష్ణపై ఒత్తిడి పెరుగుతున్నట్లు కూడా వార్తలు వస్తున్నాయి. చంద్రబాబు జాతీయ రాజకీయాల్లోకి వెళ్లవచ్చునని కూడా చెబుతున్నారు. ఇందుకు అవసరమైన ప్రాతిపదిక తయారవుతున్నట్లు చెబుతున్నారు.

ఒక సామాజిక వర్గానికి చెందిన ఎన్నారైలు బాలకృష్ణ పూర్తి స్థాయిలో పార్టీని చేతుల్లోకి తీసుకోవాలని కోరుతున్నారట. అందుకు అనుగుణంగా బాలకృష్ణతో ఎమ్మెల్యే పేరుతో ఓ సినిమా తీయడానికి కూడా వారు సన్నాహాలు చేస్తున్నట్లు ప్రచారం జరుగుతోంది. అదే నిజమైతే, దాని వెనక కేంద్ర మంత్రి, ఎన్టీ రామరావు కూతురు దగ్గుబాటి పురంధేశ్వరి పాత్ర కూడా ఉన్నట్లు అర్థం చేసుకోవాల్సి ఉంటుందని అంటున్నారు. తెలుగుదేశం పార్టీ చంద్రబాబు చేతుల్లోంచి తన తండ్రి ఎన్టీ రామారావు వారసుల చేతిలోకి రావాలని ఆమె గట్టిగా కోరుకుంటున్నట్లు చెబుతున్నారు.

Published On September 16, 2011