పోటీపై తండ్రి దారిలో బాలకృష్ణ?

By Srinivas

Published: Monday, January 16, 2012, 12:35 [IST]

దివంగత నందమూరి తారక రామారావు నట వారసుడిగా అశేష అభిమానులను సంపాదించుకున్న నందమూరి బాలకృష్ణ రాజకీయ వారసుడిగా కూడా వచ్చేందుకు సిద్ధం కావడంతో తెలుగుదేశం పార్టీ వర్గాల్లో ఇప్పుడు ఆయన రాజకీయ ఆరంగేట్రంపై జోరుగా చర్చ జరుగుతోంది. ఎన్నికలకు మరో రెండేళ్లు ఉండగానే బాలకృష్ణ ఎక్కడి నుండి పోటీ చేయాలనే అంశంపై టిడిపిలో చర్చ జరుగుతోందట. పార్టీ కార్యకర్తల్లోనూ ఎక్కడి నుండి పోటీ చేస్తారనే ఉత్కంఠ అప్పుడే ప్రారంభమైంది. దివంగత ఎన్టీఆర్ ఆంధ్ర, రాయలసీమ, తెలంగాణ ప్రాంతాల నుండి పోటీ చేసి తన సత్తా చాటారు. బాలయ్య కూడా అలాగే మూడు ప్రాంతాల నుండి పోటీకి సై అంటారా అనే ఆసక్తికర చర్చ సాగుతోందట. పార్టీ ఆదేశిస్తే తెలంగాణ ప్రాంతం నుండి కూడా పోటీకి సిద్ధమని బాలయ్య ప్రకటించారు. అయితే ప్రస్తుత పరిస్థితుల్లో ఆ ప్రాంతం నుండి కష్టమేననే పలువురు అభిప్రాయపడుతున్నారు. రాయలసీమ ప్రాంతమైతే టిడిపి పుట్టినప్పటి నుండి వరుస విజయాలు సాధిస్తున్న హిందూపురం నుండి పోటీ చేస్తారనే ఊహాగానాలు వినిపిస్తున్నాయి.

కోస్తా నుండి అయితే దివంగత ఎన్టీఆర్ పుట్టిన నిమ్మకూరు గ్రామం ఉన్న పెనుమలూరు నియోజకవర్గం నుండి పోటీ చేస్తారనే వాదనలు వినిపిస్తున్నాయి. తెలంగాణ, సీమ కంటే కోస్తా నుండే పోటీ చేయడానికే ఎక్కువగా ఆస్కారం ఉందనే అభిప్రాయాలు వ్యక్తమవుతున్నాయి. అలాగే అసెంబ్లీ నియోజకవర్గం కాకుండా పార్లమెంటు నియోజకవర్గం నుండి పోటీ చేయాలని టిడిపి వర్గాలు భావిస్తున్నాయి. ఆయన అసెంబ్లీ నియోజకవర్గం నుండి పోటీ చేస్తే కేవలం రెండు మూడు నియోజకవర్గాల్లోనే ప్రభావం ఉంటుందని, అదే ఏదైనా పార్లమెంటు నియోజకవర్గం నుండి పోటీ చేస్తే చుట్టుపక్కల ఐదారు పార్లమెంటు నియోజకవర్గాల్లో తద్వారా దాదాపు ఎక్కువ మొత్తంలో అసెంబ్లీ నియోజకవర్గాల్లో ప్రభావం ఉంటుందని టిడిపి వర్గాలు భావిస్తున్నాయి.

Published On January 16, 2012