CA పరీక్షల ఫలితాలు రిలీజ్.. టాపర్స్ వీళ్లే ???

CA ఫౌండేషన్‌, ఇంటర్మీడియట్‌ మరియు ఫైనల్‌ పరీక్షల ఫలితాలు రిలీజ్ అయ్యాయి. సెప్టెంబర్ 2025లో ఇండియన్ చార్టర్డ్ అకౌంటెంట్స్ ఇన్‌స్టిట్యూట్‌ (ICAI) ఈ పరీక్షలను నిర్వహించింది. కాగా ICAI ఈ రిజల్ట్స్ ని అధికారికంగా ప్రకటించింది. పరీక్షలకు హాజరైన అభ్యర్థులు తమ ఫలితాలను అధికారిక వెబ్‌సైట్ icai.nic.in ద్వారా చెక్ చేసుకోవచ్చు.

దేశవ్యాప్తంగా 458 కేంద్రాలలో సెప్టెంబర్ 12 నుండి 26 వరకు ఈ పరీక్షలు జరిగాయి. ఈసారి మొత్తం 81,852 మంది అభ్యర్థులు ఫైనల్ పరీక్షలకు హాజరయ్యారు. గ్రూప్ 1లో 51,955 మంది హాజరు కాగా.. 12,811 మంది (24.66%) ఉత్తీర్ణులయ్యారు. గ్రూప్ 2లో 32,273 మంది హాజరవ్వగా.. 8,151 మంది (25.26%) విజయం సాధించారు. రెండు గ్రూపులకు కలిపి 16,800 మంది హాజరైతే.. 2,727 మంది (16.23%) ఉత్తీర్ణత సాధించారు.

ఫైనల్ పరీక్షల టాపర్లు..

ఫైనల్ పరీక్షల్లో ముకుంద్ అగివాల్ 500 మార్కులతో (83.33%) అగ్రస్థానంలో నిలిచారు. తేజస్ ముండాడా 492 మార్కులతో (82%) రెండో స్థానంలో.. బాకుల్ గుప్తా 489 మార్కులతో (81.50%) మూడో స్థానంలో నిలిచారు.

CA ఇంటర్మీడియట్ ఫలితాలు 2025:

అలానే ఇంటర్మీడియట్ పరీక్షలకు మొత్తం 1,59,779 మంది అభ్యర్థులు హాజరయ్యారు. గ్రూప్ 1లో 9.43%, గ్రూప్ 2లో 27.14%, రెండు గ్రూపులకు కలిపి 10.06% ఉత్తీర్ణత నమోదైంది.

ఇంటర్మీడియట్ టాపర్లు:

నేహా ఖుర్వానీ 505/600 (84.17%) మార్కులతో మొదటి స్థానంలో నిలిచారు. కృతి శర్మ 503/600 (83.83%) మార్కులతో రెండో స్థానంలో, అక్షత్ బిరేంద్ర నౌటియాల్ 500/600 (83.33%) మార్కులతో మూడో స్థానంలో ఉన్నారు.

CA ఫౌండేషన్ ఫలితాలు 2025..

ఫౌండేషన్ పరీక్షలకు మొత్తం 98,827 మంది అభ్యర్థులు హాజరయ్యారు. వీరిలో 14,609 మంది ఉత్తీర్ణులయ్యారు, మొత్తం పాస్ పర్సెంటేజ్ 14.78%గా నమోదైంది.

ఫౌండేషన్ టాపర్లు:

చెన్నైకి చెందిన ఎల్. రాజలక్ష్మి 360 మార్కులతో (90%) మొదటి స్థానంలో నిలిచారు. సూరత్‌కు చెందిన ప్రేమ్ అగర్వాల్ 354 మార్కులతో (88.50%) రెండో స్థానంలో, ముంబైకి చెందిన నీల్ రాజేష్ షా 353 మార్కులతో (88.25%) మూడో స్థానంలో నిలిచారు.

ఇక 70% లేదా అంతకంటే ఎక్కువ మార్కులు సాధించిన విద్యార్థులను డిస్టింక్షన్‌లో పాసైనట్లుగా పరిగణిస్తారు. ఒకటి లేదా అంతకంటే ఎక్కువ గ్రూపులలో ఫెయిల్ అయిన విద్యార్థులు తదుపరి సెషన్‌లో మళ్లీ పరీక్షలు రాయాల్సి ఉంటుంది.

ఫలితాలు ఎలా చెక్ చేయాలంటే..?

• అభ్యర్థులు icai.nic.in అనే అధికారిక వెబ్‌సైట్‌ను సందర్శించాలి.
• "CA September 2025 Result" లింక్‌పై క్లిక్ చేయాలి.
• తమ కోర్సు (Foundation/Inter/Final) ఎంపిక చేసుకోవాలి.
• రోల్ నంబర్, రిజిస్ట్రేషన్ నంబర్ లేదా పిన్ నమోదు చేసి, "Submit" బటన్‌ను క్లిక్ చేయడం ద్వారా ఫలితాలను చూసుకోవచ్చు.
• భవిష్యత్తు అవసరాల నిమిత్తం స్కోర్‌కార్డ్‌ను డౌన్‌లోడ్ చేసుకోవడం మంచిది.

English summary

The results of CA Foundation, Intermediate and Final exams have been released. The Institute of Chartered Accountants of India (ICAI) conducted these exams in September 2025. ICAI has officially announced these results.