సముద్రంలో మునిగి స్టార్ హీరో కన్నుమూత- ఫిల్మ్ ఇండస్ట్రీలో తీవ్ర విషాదం

ప్రముఖ యువనటుడు రాహుల్ కన్నుమూశారు. షూటింగ్‌ జరుగుతున్న సమయంలో చోటుచేసుకున్న ప్రమాదంలో ఆయన మరణించారు. ఆయన వయస్సు 42 సంవత్సరాలే. ఆయనకు భార్య, కుమారుడు ఉన్నారు. ఈ హఠాత్ మరణవార్త చిత్ర పరిశ్రమను, ఆయన అభిమానులను తీవ్ర దిగ్భ్రాంతికి గురిచేసింది. ఆయన మృతితో చిత్ర పరిశ్రమలో విషాదఛాయలు అలముకున్నాయి. ఈ ఘటనపై పోలీసులు కేసు నమోదుచేశారు. దర్యాప్తు చేపట్టారు.

రాహుల్ పూర్తి పేరు.. రాహుల్ అరుణోదయ బెనర్జీ. బెంగాలీ నటుడు. స్టార్ జల్సా టీవీలో ప్రసారమవుతున్న భోలే బాబా పర్ కరేగా అనే పాపులర్ సీరియల్‌లో లీడ్ క్యారెక్టర్ లో నటిస్తోన్నారు. ఈ సీరియల్ షూటింగ్ నిమిత్తం మొత్తం యూనిట్ పశ్చిమ బెంగాల్ లోని దీఘా సమీపంలోని తల్సారి బీచ్‌కు వెళ్ళింది. షూటింగ్ పూర్తయిన తర్వాత రాహుల్ తన సీరియల్ సహనటితో కలిసి సముద్ర తీరంలో నడుస్తూ, అలల ఆనందాన్ని ఆస్వాదించడానికి వెళ్ళారు.

అదే సమయంలో ఆయన అలల ఉధృతికి కొట్టుకుపోయాడు. ఈ విషయాన్ని గమనించిన అక్కడే ఉన్న టెక్నీషియన్లు వెంటనే కాపాడేందుకు పరుగులు తీసి, సముద్రం లోపలి నుండి బయటకు తీసుకురాగలిగారు. అప్పటికీ ఆయన కొనఊపరితో ఉన్నారు. వెంటనే దగ్గర్లోని దీఘా ఆసుపత్రికి తరలించగా మార్గమధ్యంలోనే తుదిశ్వాస విడిచారు. ఆయన మరణానికి అసలు కారణం నీటిలో మునిగిపోవడమా లేక ఆకస్మిక గుండెపోటా అనేది తెలియరాలేదు.

రాహుల్ బెనర్జీ ఆకస్మిక మరణం పట్ల పశ్చిమ బెంగాల్ ముఖ్యమంత్రి మమతా బెనర్జీ తీవ్ర దిగ్భ్రాంతిని వ్యక్తం చేశారు. ఆయన కుటుంబ సభ్యులకు ప్రగాఢ సానుభూతి తెలిపారు. తనకు ఇష్టమైన నటులలో రాహుల్ బెనర్జీ ఒకడని, చాలా మంచి మనిషి అని పేర్కొన్నారు. మృదు స్వభావిగా బెంగాలీ చిత్ర, టీవీ పరిశ్రమలో తనకంటూ ఓ ప్రత్యేక గుర్తింపును తెచ్చుకున్నాడని గుర్తు చేసుకున్నారు. ఈ క్లిష్ట సమయంలో ఆయన కుటుంబానికి అండగా ఉంటామని అన్నారు.

బుల్లితెరపై ప్రవేశించడానికి ముందు ఆయన అనేక నాటకాల్లో నటించారు. జీ బంగ్లాలో ప్రసారమైన ప్రసిద్ధ కార్యక్రమం 'ఖేల్'లో ఆదిత్య పాత్ర పోషించి ప్రేక్షకులను ఆకట్టుకున్నారు. ఈ విజయంతో ఆయనకు సినిమా అవకాశాలు లభించాయి. ఆయన పాడ్‌కాస్ట్ ప్రోగ్రాం సహజ్ కథ కూడా చాలా ప్రజాదరణ పొందింది. రాహుల్ అనేక చిత్రాలలో నటించడంతో పాటు, చాలా కాలం పాటు పలు సీరియల్స్‌లో లీడ్ క్యారెక్టర్లల్లో నటించారు.

2008లో చిరోదిని తుమి జే అమర్ బ్లాక్‌బస్టర్‌తో ఆయనకు స్టార్ డమ్ లభించింది. 2014లో తుమి ఆస్బే బోలే, 2016లో జుల్ఫికర్, 2018లో బ్యోమ్‌కేష్ గోత్రో, బిదాయ్ బ్యోమ్‌కేష్, 2025లో 'ది అకాడమీ ఆఫ్ ఫైన్ ఆర్ట్స్' వంటివి ఉన్నాయి. టీవీలో హర్ గౌరీ పైసే హోటల్, మోహన్న వంటి సీరియల్స్‌లోనూ నటించారు. చిరోదిని తుమి జే ఆమార్ చిత్రంతో పరిచయమైన ప్రముఖ నటి ప్రియాంక సర్కార్‌ను పెళ్లాడారు.

English summary

Popular Actor Pronounced Dead Following Sea Incident Near Digha West Bengal-Odisha Border Industry in Shock. He died on Sunday after drowning in the sea at Talsari beach in West Bengal Odisha, film industry sources said. ఈ హఠాత్ మరణవార్త చిత్ర పరిశ్రమను, ఆయన అభిమానులను తీవ్ర దిగ్భ్రాంతికి గురిచేసింది. ఆయన మృతితో చిత్ర పరిశ్రమలో విషాదఛాయలు అలముకున్నాయి.