విజయ్ దేవరకొండ మహోగ్రరూపం.. 'రణబాలి' గ్లింప్స్ రిలీజ్..

టాలీవుడ్ యంగ్ హీరో విజయ్ దేవరకొండ- దర్శకుడు రాహుల్ సాంకృత్యాయన్ కాంబోలో తెరకెక్కుతున్న సినిమాకు 'రణబాలి' అనే టైటిల్ ను ఖరారు చేశారు. ఈ మేరకు టైటిల్ గ్లింప్స్ ను విడుదల చేశారు. బ్రిటిష్ కాలంలో దేశ ప్రజలు ముఖ్యంగా రాయలసీమ ప్రజలు ఎదుర్కొన్న సమస్యలు, కరవు, వలసలు నేపథ్యంలో సినిమా తెరకెక్కనుంది. టైటిల్ గ్లింప్స్ లో బ్రిటిష్ ప్రభుత్వం ఆకృత్యాలను కళ్లకు కట్టినట్లు చూపించారు డైరెక్టర్ రాహుల్ సాంకృత్యాయన్. టైటిల్ గ్లింప్స్ చూస్తుంటేనే సినిమా ఏ రేంజ్ లో ఉంటుందో అర్థం అవుతోంది.

రౌడీ హీరో విజయ్ దేవరకొండ వరుస సినిమాలతో దూసుకెళ్తున్నాడు. హిట్- ప్లాఫ్ టాక్ తో సంబంధం లేకుండా సినిమాలు చేసుకుంటూ వెళ్తున్నాడు. గతేడాది కింగ్డమ్ మూవీతో వచ్చిన విజయ్ దేవరకొండ.. తాజాగా రణబాలి చిత్రం చేస్తున్నాడు. ఈ మూవీకి రాహుల్ సాంకృత్యాయన్ దర్శకుడు. మైత్రీ మూవీ మేకర్స్ నిర్మాణ సంస్థ ఈ మూవీని ప్రతిష్టాత్మకంగా తెరకెక్కిస్తోంది. ఇందుకు సంబంధించిన టైటిల్ గ్లింప్స్ ను జనవరి 26 గణతంత్ర దినోత్సవం సందర్భంగా రిలీజ్ చేశారు.

ఈ టైటిల్ గ్లింప్స్ లో బ్రిటిష్ ప్రభుత్వం ఆకృత్యాలు కరవు, ఆకలి కేకలు, వలసలు, మారణహోమం, అలాగే ఆనాటి ఆర్థిక, భౌగోలిక పరిస్థితులు, మరుగున పడిన చరిత్రను బయటకు తీసే ప్రయత్నం చేశారు డైరెక్టర్ రాహుల్ సాంకృత్యాయన్. ఈ మూవీలో విజయ్ దేవరకొండ రణబాలి అనే యోధుడి పాత్రలో నటిస్తున్నాడు. గ్లింప్స్ చివరిలో విజయ్ గుర్రంపై స్వారీ చేస్తూ ఓ బ్రిటిష్ అధికారుడ్ని తాళ్లతో ఈడ్చుకుంటూ వెళ్తున్నట్లు చూపించారు.

ఇక ఈ మూవీని సెప్టెంబర్ 11 న ప్రపంచవ్యాప్తంగా విడుదల చేయనున్నారు. తెలుగుతోపాటు హిందీ, తమిళం, మలయాళం, కన్నడ భాషల్లో ఈ మూవీని రిలీజ్ చేయనున్నట్లు చిత్ర యూనిట్ పేర్కొంది. ఈ మూవీలో విజయ్ దేవరకొండ సరసన రష్మిక మందాన్న కీలక పాత్రలో నటిస్తోంది.