బాలయ్యకు బాబు బ్రేక్!

బాలకృష్ణ తెలుగుదేశం తరఫున రాష్ట్రంలోని ముఖ్యమైన పట్టణాలో బహిరంగ సభల్లో ప్రసంగించవలసి ఉంది. ఆయితే ఎన్నికలు దగ్గర పడుతున్నా ఆయన పర్యటన తేదీలు ఇంకా ఖరారు కాలేదు. చంద్రబాబు వ్యవహారశైలి నచ్చనందువల్లనే జూనియర్ ఎన్టీఆర్ పార్టీ ప్రచారానికి దూరంగా ఉంటున్నారన్న అభిప్రాయం ఉంది. బాలకృష్ణ విషయంలో అటువంటి వదంతులు లేకపోయినా ఎందువల్లనో ఆయన కూడా తెలుగుదేశం పార్టీ తరఫున ప్రచారంపై అంతగా ఆసక్తి చూపడం లేదు. షూటింగ్ లో బిజీగా ఉండడం వల్లనే బాబాయి పార్టీ వ్యవహారాలపై దృష్టి పెట్టలేకపోతున్నారని తారకరత్న నిన్న సమర్ధించారు.

చంద్రబాబు నాయుడితో అప్పుడప్పుడు బాలకృష్ణ వ్యక్తిగతంగా సమావేశమవుతూనే ఉన్నారు. మహాకూటమి ఏర్పడిన తరుణంలో బాలకృష్ణ సహాయం పెద్దగా లేకపోయినా గట్టెక్కగలమన్న విశ్వాసం చంద్రబాబు నాయుడికి వచ్చినట్టు తెలుస్తోంది. ముందు షూటింగ్ లు చూసుకోమని, బహిరంగ సభల్లో ప్రసంగించాల్సిన అవసరం వచ్చినప్పుడు తానే చెబుతానని చంద్రబాబు బాలయ్యకు వివరించినట్టు తెలుస్తోంది. తెలుగుదేశం పార్టీలో బాలయ్య బలపడకుండా చంద్రబాబు ఇప్పటి నుంచే జాగ్రత్త పడుతున్నట్టు కనిపిస్తోంది.