కెసిఆర్ పై మాజీ ఎమ్మెల్యేల ఆగ్రహం!

తెలంగాణ రాష్ట్ర సమితి అధ్యక్షుడు చంద్రశేఖరరావు మాట విని రాజీనామాలు చేసిన 10 మంది తెలంగాణ రాష్ట్ర సమితి ఎమ్మెల్యేలు ఉప ఎన్నికలు దగ్గరపడే కొద్దీ తమ నేతపై కారాలు మిరియాలు నూరుతున్నారు. ముందు మీరు రాజీనామా చేయండి, తర్వాత నేను కూడా రాజీనామా చేస్తానని చెప్పిన ఆయన ఇప్పుడు తన రాజీనామా గురించి మాట్లాడకపోవడం వారిలో చాలా మందికి ఆగ్రహం కలిగిస్తోంది. అయితే ఆయన రాజీనామా చేయకపోవడమే మంచిదని, ఆయన కూడా పోటీలో ఉంటే పది స్ధానాల్లో ప్రచారం కష్టమయ్యేదని ఆయనకు వీర విధేయుడైన ఒక మాజీ ఎమ్మెల్యే వ్యాఖ్యానించారు. ఒకవేళ కెసిఆర్ రాజీనామా చేసినా టీఅర్ ఎస్ మరో ఎంపీ విజయ శాంతి రాజీనామా చేసి ఉండేవారు కాదనిపిస్తోంది.

ఇలా ఉండగా ఉప ఎన్నికలు ఏకగ్రీవం కావాలన్న తెలంగాణ వాదుల ఆశలు నెరవేరేటట్టు లేవు. కాంగ్రెస్, తెలుగుదేశం అభ్యర్ధులు రంగంలో ఉండే అవకాశాలు కన్పిస్తున్నాయి. రాష్ట్రంలోని తెలంగాణలో ఖాళీ అయిన 12 శాసనసభా నియోజకవర్గాలకు ఆగస్టు 14వ తేదీ లోపు ఉప ఎన్నికలు నిర్వహిస్తామని భారత ఎన్నికల కమీషనర్ ఖురేషీ చెప్పారు. ఆగస్టు 14వ తేదీ లోపు ఎప్పుడైనా ఉప ఎన్నికలు జరుగుతాయని ఆయన చెప్పారు. అయితే, కచ్చితమైన తేదీని ఆయన చెప్పలేదు.తెలంగాణ రాష్ట్ర ఏర్పాటును డిమాండ్ చేస్తూ 10మంది తెలంగాణ రాష్ట్రసమితి (తెరాస) శాసనసభ్యులు, తెలుగుదేశం సభ్యుడు ఒకరు, బిజెపి సభ్యుడు ఒకరు రాజీనామా చేశారు. దీంతో ఆ 12 స్థానాలకు ఉప ఎన్నికలు నిర్వహించాల్సిన అవసరం ఏర్పడింది.