బాలయ్యను నమ్మలేకపోతున్న లక్ష్మీ పార్వతి

బాలకృష్ణ తన ఇంటికి రావడం "అమ్మా" అని నోరారా పిలవడంతో లక్ష్మీపార్వతికి కొంత సేపు కాళ్లు నేలమీద నిలవలేదు. ఆ సంఘటన మీడియా వారికి సంచలనంగా కన్పించడంతో సహజంగానే ఓవర్ యాక్షన్ వల్ల పెను సంచలనంగా మారింది. ఇక్కడ యాక్షన్ చేసింది బాలకృష్ణ అయితే ఓవరాక్షన్ చేసింది లక్ష్మీపార్వతి, రేటింగ్స్ కోసం తపించే టీవీ చానళ్ళు. బాలయ్య వచ్చిన విషయం తెలిసిన వెంటనే లక్ష్మీపార్వతికి టీవీ చానళ్ళ నుంచి ఫోన్లు రాసాగాయి. అమె కొన్ని టీవీ చానళ్ళకు వెళ్ళి ప్రత్యేక ఇంటర్వ్యూలు ఇచ్చారు. అప్పుడు అమె బాలయ్య సుగుణాల గురించి, నటనా ప్రతిభ గురించి, ఎన్టీఆర్ నట వారసత్వం గురించి ఎక్కువగా మాట్లాడారు.

అప్పుడు బాలయ్యను తన ఇంటికి ఎందుకు పంపించారో లక్ష్మీపార్వతికి అనుభవంలోకి వచ్చినట్టుంది. ఇటీవల ఒక టీవీ చాన్ల్ కి ఇచ్చిన కార్యక్రమంలో ఆమె ఎన్టీఆర్ కుటుంబ సభ్యుల మీద దాదాపు దుమ్మెత్తి పోశారు. ప్రజలు పార్టీ కోసం ఇచ్చిన డబ్బును కూడా తన నుంచి లాక్కుని, తాను రాజకీయాల నుంచి పూర్తిగా వైదొలగేలా చేయాలన్నది ఎన్టీఆర్ కుటుంబ సభ్యుల కుట్ర అని ఆమె వెల్లడించారు. బాలయ్య వెనుక చంద్రబాబు, హరికృష్ణల కుట్రలు ఉన్నాయని, అంత తేలిగ్గా నమ్మేసి ఎక్కడా సంతకాలు పెట్ట వద్దని పార్వతి సలహాదారులు వారించినట్టు తెలుస్తోంది. ఇప్పుడు చంద్రబాబుకు బద్ధ శత్రువుగా ఉన్న దగ్గుబాటిని కూడా అమె ఫోన్ లో సలహా అడిగినట్టు చెబుతున్నారు. ఆయన కూడా జాగ్రత్తగా ఉండమని సలహా ఇచ్చారట.